| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၅. ဥပ္ပာဒသံယုတ္တံ
5. Uppādasaṃyuttaṃ
၁. စက္ခုသုတ္တံ
1. Cakkhusuttaṃ
၃၁၂. သာဝတ္ထိနိဒာနံ ။ ‘‘ယော ခော, ဘိက္ခဝေ, စက္ခုသ္သ ဥပ္ပာဒော ဌိတိ အဘိနိဗ္ဗတ္တိ ပာတုဘာဝော, ဒုက္ခသ္သေသော ဥပ္ပာဒော, ရောဂာနံ ဌိတိ, ဇရာမရဏသ္သ ပာတုဘာဝော။ ယော သောတသ္သ ဥပ္ပာဒော ဌိတိ။ပေ.။ ယော ဃာနသ္သ ဥပ္ပာဒော ဌိတိ။ ယော ဇိဝ္ဟာယ ဥပ္ပာဒော ဌိတိ။ ယော ကာယသ္သ ဥပ္ပာဒော ဌိတိ။ ယော မနသ္သ ဥပ္ပာဒော ဌိတိ အဘိနိဗ္ဗတ္တိ ပာတုဘာဝော, ဒုက္ခသ္သေသော ဥပ္ပာဒော, ရောဂာနံ ဌိတိ, ဇရာမရဏသ္သ ပာတုဘာဝော။ ယော စ, ဘိက္ခဝေ, စက္ခုသ္သ နိရောဓော ဝူပသမော အတ္ထင္ဂမော, ဒုက္ခသ္သေသော နိရောဓော, ရောဂာနံ ဝူပသမော, ဇရာမရဏသ္သ အတ္ထင္ဂမော။ ယော သောတသ္သ နိရောဓော။ပေ.။ ယော ဃာနသ္သ နိရောဓော။ ယော ဇိဝ္ဟာယ နိရောဓော။ ယော ကာယသ္သ နိရောဓော။ ယော မနသ္သ နိရောဓော ဝူပသမော အတ္ထင္ဂမော, ဒုက္ခသ္သေသော နိရောဓော, ရောဂာနံ ဝူပသမော, ဇရာမရဏသ္သ အတ္ထင္ဂမော’’တိ။ ပဌမံ။
312. Sāvatthinidānaṃ . ‘‘Yo kho, bhikkhave, cakkhussa uppādo ṭhiti abhinibbatti pātubhāvo, dukkhasseso uppādo, rogānaṃ ṭhiti, jarāmaraṇassa pātubhāvo. Yo sotassa uppādo ṭhiti…pe… yo ghānassa uppādo ṭhiti… yo jivhāya uppādo ṭhiti… yo kāyassa uppādo ṭhiti… yo manassa uppādo ṭhiti abhinibbatti pātubhāvo, dukkhasseso uppādo, rogānaṃ ṭhiti, jarāmaraṇassa pātubhāvo. Yo ca, bhikkhave, cakkhussa nirodho vūpasamo atthaṅgamo, dukkhasseso nirodho, rogānaṃ vūpasamo, jarāmaraṇassa atthaṅgamo. Yo sotassa nirodho…pe… yo ghānassa nirodho… yo jivhāya nirodho… yo kāyassa nirodho… yo manassa nirodho vūpasamo atthaṅgamo, dukkhasseso nirodho, rogānaṃ vūpasamo, jarāmaraṇassa atthaṅgamo’’ti. Paṭhamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၅. ဥပ္ပာဒသံယုတ္တဝဏ္ဏနာ • 5. Uppādasaṃyuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၅. ဥပ္ပာဒသံယုတ္တဝဏ္ဏနာ • 5. Uppādasaṃyuttavaṇṇanā
