| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
១០. ពុទ្ធុបដ្ឋាកត្ថេរអបទានំ
10. Buddhupaṭṭhākattheraapadānaṃ
៥៦.
56.
‘‘វិបស្សិស្ស ភគវតោ, អហោសិំ សង្ខធម្មកោ;
‘‘Vipassissa bhagavato, ahosiṃ saṅkhadhammako;
និច្ចុបដ្ឋានយុត្តោម្ហិ, សុគតស្ស មហេសិនោ។
Niccupaṭṭhānayuttomhi, sugatassa mahesino.
៥៧.
57.
‘‘ឧបដ្ឋានផលំ បស្ស, លោកនាថស្ស តាទិនោ;
‘‘Upaṭṭhānaphalaṃ passa, lokanāthassa tādino;
សដ្ឋិតូរិយសហស្សានិ, បរិវារេន្តិ មំ សទា។
Saṭṭhitūriyasahassāni, parivārenti maṃ sadā.
៥៨.
58.
‘‘ឯកនវុតិតោ កប្បេ, ឧបដ្ឋហិំ មហាឥសិំ;
‘‘Ekanavutito kappe, upaṭṭhahiṃ mahāisiṃ;
ទុគ្គតិំ នាភិជានាមិ, ឧបដ្ឋានស្សិទំ ផលំ។
Duggatiṃ nābhijānāmi, upaṭṭhānassidaṃ phalaṃ.
៥៩.
59.
សោឡសាសិំសុ រាជានោ, ចក្កវត្តី មហព្ពលា។
Soḷasāsiṃsu rājāno, cakkavattī mahabbalā.
៦០.
60.
‘‘បដិសម្ភិទា ចតស្សោ…បេ.… កតំ ពុទ្ធស្ស សាសនំ’’។
‘‘Paṭisambhidā catasso…pe… kataṃ buddhassa sāsanaṃ’’.
ឥត្ថំ សុទំ អាយស្មា ពុទ្ធុបដ្ឋាកោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā buddhupaṭṭhāko thero imā gāthāyo abhāsitthāti.
ពុទ្ធុបដ្ឋាកត្ថេរស្សាបទានំ ទសមំ។
Buddhupaṭṭhākattherassāpadānaṃ dasamaṃ.
សុធាវគ្គោ ទសមោ។
Sudhāvaggo dasamo.
តស្សុទ្ទានំ –
Tassuddānaṃ –
សុធា សុចិន្តិ ចេឡញ្ច, សូចី ច គន្ធមាលិយោ;
Sudhā sucinti ceḷañca, sūcī ca gandhamāliyo;
តិបុប្ផិយោ មធុសេនា, វេយ្យាវច្ចោ ចុបដ្ឋកោ;
Tipupphiyo madhusenā, veyyāvacco cupaṭṭhako;
សមសដ្ឋិ ច គាថាយោ, អស្មិំ វគ្គេ បកិត្តិតា។
Samasaṭṭhi ca gāthāyo, asmiṃ vagge pakittitā.
អថ វគ្គុទ្ទានំ –
Atha vagguddānaṃ –
ពុទ្ធវគ្គោ ហិ បឋមោ, សីហាសនិ សុភូតិ ច;
Buddhavaggo hi paṭhamo, sīhāsani subhūti ca;
កុណ្ឌធានោ ឧបាលិ ច, ពីជនិសកចិន្តិ ច។
Kuṇḍadhāno upāli ca, bījanisakacinti ca.
នាគសមាលោ តិមិរោ, សុធាវគ្គេន តេ ទស;
Nāgasamālo timiro, sudhāvaggena te dasa;
ចតុទ្ទសសតា គាថា, បញ្ចបញ្ញាសមេវ ច។
Catuddasasatā gāthā, pañcapaññāsameva ca.
ពុទ្ធវគ្គទសកំ។
Buddhavaggadasakaṃ.
បឋមសតកំ សមត្តំ។
Paṭhamasatakaṃ samattaṃ.
Footnotes:
