| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
২. বুদ্ধস্স অনুত্তরভাৰপঞ্হো
2. Buddhassa anuttarabhāvapañho
২. রাজা আহ ‘‘ভন্তে নাগসেন, বুদ্ধো অনুত্তরো’’তি? ‘‘আম, মহারাজ, ভগৰা অনুত্তরো’’তি। ‘‘কথং, ভন্তে নাগসেন, অদিট্ঠপুব্বং জানাসি ‘বুদ্ধো অনুত্তরো’’’তি? ‘‘তং কিং মঞ্ঞসি, মহারাজ, যেহি অদিট্ঠপুব্বো মহাসমুদ্দো, জানেয্যুং তে, মহারাজ, মহন্তো খো মহাসমুদ্দো গম্ভীরো অপ্পমেয্যো দুপ্পরিযোগাহো, যত্থিমা পঞ্চ মহানদিযো সততং সমিতং অপ্পেন্তি, সেয্যথিদং, গঙ্গা যমুনা অচিরৰতী সরভূ মহী, নেৰ তস্স ঊনত্তং ৰা পূরত্তং ৰা পঞ্ঞাযতী’’তি ? ‘‘আম, ভন্তে, জানেয্যু’’ন্তি। ‘‘এৰমেৰ খো, মহারাজ, সাৰকে মহন্তে পরিনিব্বুতে পস্সিত্ৰা জানামি ‘ভগৰা অনুত্তরো’’’তি।
2. Rājā āha ‘‘bhante nāgasena, buddho anuttaro’’ti? ‘‘Āma, mahārāja, bhagavā anuttaro’’ti. ‘‘Kathaṃ, bhante nāgasena, adiṭṭhapubbaṃ jānāsi ‘buddho anuttaro’’’ti? ‘‘Taṃ kiṃ maññasi, mahārāja, yehi adiṭṭhapubbo mahāsamuddo, jāneyyuṃ te, mahārāja, mahanto kho mahāsamuddo gambhīro appameyyo duppariyogāho, yatthimā pañca mahānadiyo satataṃ samitaṃ appenti, seyyathidaṃ, gaṅgā yamunā aciravatī sarabhū mahī, neva tassa ūnattaṃ vā pūrattaṃ vā paññāyatī’’ti ? ‘‘Āma, bhante, jāneyyu’’nti. ‘‘Evameva kho, mahārāja, sāvake mahante parinibbute passitvā jānāmi ‘bhagavā anuttaro’’’ti.
‘‘কল্লোসি, ভন্তে নাগসেনা’’তি।
‘‘Kallosi, bhante nāgasenā’’ti.
বুদ্ধস্স অনুত্তরভাৰপঞ্হো দুতিযো।
Buddhassa anuttarabhāvapañho dutiyo.
