| Library / Tipiṭaka / തിപിടക • Tipiṭaka / ബുദ്ധവംസപാളി • Buddhavaṃsapāḷi |
൨൮. ബുദ്ധപകിണ്ണകകണ്ഡം
28. Buddhapakiṇṇakakaṇḍaṃ
൧.
1.
അപരിമേയ്യിതോ കപ്പേ, ചതുരോ ആസും വിനായകാ;
Aparimeyyito kappe, caturo āsuṃ vināyakā;
തണ്ഹങ്കരോ മേധങ്കരോ, അഥോപി സരണങ്കരോ;
Taṇhaṅkaro medhaṅkaro, athopi saraṇaṅkaro;
ദീപങ്കരോ ച സമ്ബുദ്ധോ, ഏകകപ്പമ്ഹി തേ ജിനാ.
Dīpaṅkaro ca sambuddho, ekakappamhi te jinā.
൨.
2.
ദീപങ്കരസ്സ അപരേന, കോണ്ഡഞ്ഞോ നാമ നായകോ;
Dīpaṅkarassa aparena, koṇḍañño nāma nāyako;
ഏകോവ ഏകകപ്പമ്ഹി, താരേസി ജനതം ബഹും.
Ekova ekakappamhi, tāresi janataṃ bahuṃ.
൩.
3.
ദീപങ്കരസ്സ ഭഗവതോ, കോണ്ഡഞ്ഞസ്സ ച സത്ഥുനോ;
Dīpaṅkarassa bhagavato, koṇḍaññassa ca satthuno;
ഏതേസം അന്തരാ കപ്പാ, ഗണനാതോ അസങ്ഖിയാ.
Etesaṃ antarā kappā, gaṇanāto asaṅkhiyā.
൪.
4.
കോണ്ഡഞ്ഞസ്സ അപരേന, മങ്ഗലോ നാമ നായകോ;
Koṇḍaññassa aparena, maṅgalo nāma nāyako;
തേസമ്പി അന്തരാ കപ്പാ, ഗണനാതോ അസങ്ഖിയാ.
Tesampi antarā kappā, gaṇanāto asaṅkhiyā.
൫.
5.
മങ്ഗലോ ച സുമനോ ച, രേവതോ സോഭിതോ മുനി;
Maṅgalo ca sumano ca, revato sobhito muni;
തേപി ബുദ്ധാ ഏകകപ്പേ, ചക്ഖുമന്തോ പഭങ്കരാ.
Tepi buddhā ekakappe, cakkhumanto pabhaṅkarā.
൬.
6.
സോഭിതസ്സ അപരേന, അനോമദസ്സീ മഹായസോ;
Sobhitassa aparena, anomadassī mahāyaso;
തേസമ്പി അന്തരാ കപ്പാ, ഗണനാതോ അസങ്ഖിയാ.
Tesampi antarā kappā, gaṇanāto asaṅkhiyā.
൭.
7.
അനോമദസ്സീ പദുമോ, നാരദോ ചാപി നായകോ;
Anomadassī padumo, nārado cāpi nāyako;
തേപി ബുദ്ധാ ഏകകപ്പേ, തമന്തകാരകാ മുനീ.
Tepi buddhā ekakappe, tamantakārakā munī.
൮.
8.
നാരദസ്സ അപരേന, പദുമുത്തരോ നാമ നായകോ;
Nāradassa aparena, padumuttaro nāma nāyako;
ഏകകപ്പമ്ഹി ഉപ്പന്നോ, താരേസി ജനതം ബഹും.
Ekakappamhi uppanno, tāresi janataṃ bahuṃ.
൯.
9.
നാരദസ്സ ഭഗവതോ, പദുമുത്തരസ്സ സത്ഥുനോ;
Nāradassa bhagavato, padumuttarassa satthuno;
തേസമ്പി അന്തരാ കപ്പാ, ഗണനാതോ അസങ്ഖിയാ.
Tesampi antarā kappā, gaṇanāto asaṅkhiyā.
൧൦.
10.
കപ്പസതസഹസ്സമ്ഹി , ഏകോ ആസി മഹാമുനി;
Kappasatasahassamhi , eko āsi mahāmuni;
പദുമുത്തരോ ലോകവിദൂ, ആഹുതീനം പടിഗ്ഗഹോ.
Padumuttaro lokavidū, āhutīnaṃ paṭiggaho.
൧൧.
11.
സുമേധോ ച സുജാതോ ച, ഓരതോ പദുമുത്തരാ.
Sumedho ca sujāto ca, orato padumuttarā.
൧൨.
12.
പിയദസ്സീ അത്ഥദസ്സീ, ധമ്മദസ്സീ ച നായകാ.
Piyadassī atthadassī, dhammadassī ca nāyakā.
൧൩.
13.
ഓരതോ ച സുജാതസ്സ, സമ്ബുദ്ധാ ദ്വിപദുത്തമാ;
Orato ca sujātassa, sambuddhā dvipaduttamā;
ഏകകപ്പമ്ഹി തേ ബുദ്ധാ, ലോകേ അപ്പടിപുഗ്ഗലാ.
Ekakappamhi te buddhā, loke appaṭipuggalā.
൧൪.
14.
ചതുന്നവുതിതോ കപ്പേ, ഏകോ ആസി മഹാമുനി;
Catunnavutito kappe, eko āsi mahāmuni;
സിദ്ധത്ഥോ സോ ലോകവിദൂ, സല്ലകത്തോ അനുത്തരോ.
Siddhattho so lokavidū, sallakatto anuttaro.
൧൫.
15.
ദ്വേനവുതേ ഇതോ കപ്പേ, ദുവേ ആസും വിനായകാ;
Dvenavute ito kappe, duve āsuṃ vināyakā;
തിസ്സോ ഫുസ്സോ ച സമ്ബുദ്ധാ, അസമാ അപ്പടിപുഗ്ഗലാ.
Tisso phusso ca sambuddhā, asamā appaṭipuggalā.
൧൬.
16.
ഏകനവുതിതോ കപ്പേ, വിപസ്സീ നാമ നായകോ;
Ekanavutito kappe, vipassī nāma nāyako;
സോപി ബുദ്ധോ കാരുണികോ, സത്തേ മോചേസി ബന്ധനാ.
Sopi buddho kāruṇiko, satte mocesi bandhanā.
൧൭.
17.
ഏകതിംസേ ഇതോ കപ്പേ, ദുവേ ആസും വിനായകാ;
Ekatiṃse ito kappe, duve āsuṃ vināyakā;
സിഖീ ച വേസ്സഭൂ ചേവ, അസമാ അപ്പടിപുഗ്ഗലാ.
Sikhī ca vessabhū ceva, asamā appaṭipuggalā.
൧൮.
18.
ഇമമ്ഹി ഭദ്ദകേ കപ്പേ, തയോ ആസും വിനായകാ;
Imamhi bhaddake kappe, tayo āsuṃ vināyakā;
കകുസന്ധോ കോണാഗമനോ, കസ്സപോ ചാപി നായകോ.
Kakusandho koṇāgamano, kassapo cāpi nāyako.
൧൯.
19.
അഹമേതരഹി സമ്ബുദ്ധോ, മേത്തേയ്യോ ചാപി ഹേസ്സതി;
Ahametarahi sambuddho, metteyyo cāpi hessati;
ഏതേപിമേ പഞ്ച ബുദ്ധാ, ധീരാ ലോകാനുകമ്പകാ.
Etepime pañca buddhā, dhīrā lokānukampakā.
൨൦.
20.
ഏതേസം ധമ്മരാജൂനം, അഞ്ഞേസംനേകകോടിനം;
Etesaṃ dhammarājūnaṃ, aññesaṃnekakoṭinaṃ;
ആചിക്ഖിത്വാന തം മഗ്ഗം, നിബ്ബുതാ തേ സസാവകാതി.
Ācikkhitvāna taṃ maggaṃ, nibbutā te sasāvakāti.
ബുദ്ധപകിണ്ണകകണ്ഡം നിട്ഠിതം.
Buddhapakiṇṇakakaṇḍaṃ niṭṭhitaṃ.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / ഖുദ്ദകനികായ (അട്ഠകഥാ) • Khuddakanikāya (aṭṭhakathā) / ബുദ്ധവംസ-അട്ഠകഥാ • Buddhavaṃsa-aṭṭhakathā / ൨൮. ബുദ്ധപകിണ്ണകകഥാ • 28. Buddhapakiṇṇakakathā
