| Library / Tipiṭaka / តិបិដក • Tipiṭaka / ពុទ្ធវំសបាឡិ • Buddhavaṃsapāḷi |
២៨. ពុទ្ធបកិណ្ណកកណ្ឌំ
28. Buddhapakiṇṇakakaṇḍaṃ
១.
1.
អបរិមេយ្យិតោ កប្បេ, ចតុរោ អាសុំ វិនាយកា;
Aparimeyyito kappe, caturo āsuṃ vināyakā;
តណ្ហង្ករោ មេធង្ករោ, អថោបិ សរណង្ករោ;
Taṇhaṅkaro medhaṅkaro, athopi saraṇaṅkaro;
ទីបង្ករោ ច សម្ពុទ្ធោ, ឯកកប្បម្ហិ តេ ជិនា។
Dīpaṅkaro ca sambuddho, ekakappamhi te jinā.
២.
2.
ទីបង្ករស្ស អបរេន, កោណ្ឌញ្ញោ នាម នាយកោ;
Dīpaṅkarassa aparena, koṇḍañño nāma nāyako;
ឯកោវ ឯកកប្បម្ហិ, តារេសិ ជនតំ ពហុំ។
Ekova ekakappamhi, tāresi janataṃ bahuṃ.
៣.
3.
ទីបង្ករស្ស ភគវតោ, កោណ្ឌញ្ញស្ស ច សត្ថុនោ;
Dīpaṅkarassa bhagavato, koṇḍaññassa ca satthuno;
ឯតេសំ អន្តរា កប្បា, គណនាតោ អសង្ខិយា។
Etesaṃ antarā kappā, gaṇanāto asaṅkhiyā.
៤.
4.
កោណ្ឌញ្ញស្ស អបរេន, មង្គលោ នាម នាយកោ;
Koṇḍaññassa aparena, maṅgalo nāma nāyako;
តេសម្បិ អន្តរា កប្បា, គណនាតោ អសង្ខិយា។
Tesampi antarā kappā, gaṇanāto asaṅkhiyā.
៥.
5.
មង្គលោ ច សុមនោ ច, រេវតោ សោភិតោ មុនិ;
Maṅgalo ca sumano ca, revato sobhito muni;
តេបិ ពុទ្ធា ឯកកប្បេ, ចក្ខុមន្តោ បភង្ករា។
Tepi buddhā ekakappe, cakkhumanto pabhaṅkarā.
៦.
6.
សោភិតស្ស អបរេន, អនោមទស្សី មហាយសោ;
Sobhitassa aparena, anomadassī mahāyaso;
តេសម្បិ អន្តរា កប្បា, គណនាតោ អសង្ខិយា។
Tesampi antarā kappā, gaṇanāto asaṅkhiyā.
៧.
7.
អនោមទស្សី បទុមោ, នារទោ ចាបិ នាយកោ;
Anomadassī padumo, nārado cāpi nāyako;
តេបិ ពុទ្ធា ឯកកប្បេ, តមន្តការកា មុនី។
Tepi buddhā ekakappe, tamantakārakā munī.
៨.
8.
នារទស្ស អបរេន, បទុមុត្តរោ នាម នាយកោ;
Nāradassa aparena, padumuttaro nāma nāyako;
ឯកកប្បម្ហិ ឧប្បន្នោ, តារេសិ ជនតំ ពហុំ។
Ekakappamhi uppanno, tāresi janataṃ bahuṃ.
៩.
9.
នារទស្ស ភគវតោ, បទុមុត្តរស្ស សត្ថុនោ;
Nāradassa bhagavato, padumuttarassa satthuno;
តេសម្បិ អន្តរា កប្បា, គណនាតោ អសង្ខិយា។
Tesampi antarā kappā, gaṇanāto asaṅkhiyā.
១០.
10.
កប្បសតសហស្សម្ហិ , ឯកោ អាសិ មហាមុនិ;
Kappasatasahassamhi , eko āsi mahāmuni;
បទុមុត្តរោ លោកវិទូ, អាហុតីនំ បដិគ្គហោ។
Padumuttaro lokavidū, āhutīnaṃ paṭiggaho.
១១.
11.
សុមេធោ ច សុជាតោ ច, ឱរតោ បទុមុត្តរា។
Sumedho ca sujāto ca, orato padumuttarā.
១២.
12.
បិយទស្សី អត្ថទស្សី, ធម្មទស្សី ច នាយកា។
Piyadassī atthadassī, dhammadassī ca nāyakā.
១៣.
13.
ឱរតោ ច សុជាតស្ស, សម្ពុទ្ធា ទ្វិបទុត្តមា;
Orato ca sujātassa, sambuddhā dvipaduttamā;
ឯកកប្បម្ហិ តេ ពុទ្ធា, លោកេ អប្បដិបុគ្គលា។
Ekakappamhi te buddhā, loke appaṭipuggalā.
១៤.
14.
ចតុន្នវុតិតោ កប្បេ, ឯកោ អាសិ មហាមុនិ;
Catunnavutito kappe, eko āsi mahāmuni;
សិទ្ធត្ថោ សោ លោកវិទូ, សល្លកត្តោ អនុត្តរោ។
Siddhattho so lokavidū, sallakatto anuttaro.
១៥.
15.
ទ្វេនវុតេ ឥតោ កប្បេ, ទុវេ អាសុំ វិនាយកា;
Dvenavute ito kappe, duve āsuṃ vināyakā;
តិស្សោ ផុស្សោ ច សម្ពុទ្ធា, អសមា អប្បដិបុគ្គលា។
Tisso phusso ca sambuddhā, asamā appaṭipuggalā.
១៦.
16.
ឯកនវុតិតោ កប្បេ, វិបស្សី នាម នាយកោ;
Ekanavutito kappe, vipassī nāma nāyako;
សោបិ ពុទ្ធោ ការុណិកោ, សត្តេ មោចេសិ ពន្ធនា។
Sopi buddho kāruṇiko, satte mocesi bandhanā.
១៧.
17.
ឯកតិំសេ ឥតោ កប្បេ, ទុវេ អាសុំ វិនាយកា;
Ekatiṃse ito kappe, duve āsuṃ vināyakā;
សិខី ច វេស្សភូ ចេវ, អសមា អប្បដិបុគ្គលា។
Sikhī ca vessabhū ceva, asamā appaṭipuggalā.
១៨.
18.
ឥមម្ហិ ភទ្ទកេ កប្បេ, តយោ អាសុំ វិនាយកា;
Imamhi bhaddake kappe, tayo āsuṃ vināyakā;
កកុសន្ធោ កោណាគមនោ, កស្សបោ ចាបិ នាយកោ។
Kakusandho koṇāgamano, kassapo cāpi nāyako.
១៩.
19.
អហមេតរហិ សម្ពុទ្ធោ, មេត្តេយ្យោ ចាបិ ហេស្សតិ;
Ahametarahi sambuddho, metteyyo cāpi hessati;
ឯតេបិមេ បញ្ច ពុទ្ធា, ធីរា លោកានុកម្បកា។
Etepime pañca buddhā, dhīrā lokānukampakā.
២០.
20.
ឯតេសំ ធម្មរាជូនំ, អញ្ញេសំនេកកោដិនំ;
Etesaṃ dhammarājūnaṃ, aññesaṃnekakoṭinaṃ;
អាចិក្ខិត្វាន តំ មគ្គំ, និព្ពុតា តេ សសាវកាតិ។
Ācikkhitvāna taṃ maggaṃ, nibbutā te sasāvakāti.
ពុទ្ធបកិណ្ណកកណ្ឌំ និដ្ឋិតំ។
Buddhapakiṇṇakakaṇḍaṃ niṭṭhitaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ពុទ្ធវំស-អដ្ឋកថា • Buddhavaṃsa-aṭṭhakathā / ២៨. ពុទ្ធបកិណ្ណកកថា • 28. Buddhapakiṇṇakakathā
