| Library / Tipiṭaka / ติปิฎก • Tipiṭaka / พุทฺธวํสปาฬิ • Buddhavaṃsapāḷi |
๒๘. พุทฺธปกิณฺณกกณฺฑํ
28. Buddhapakiṇṇakakaṇḍaṃ
๑.
1.
อปริเมยฺยิโต กเปฺป, จตุโร อาสุํ วินายกา;
Aparimeyyito kappe, caturo āsuṃ vināyakā;
ตณฺหงฺกโร เมธงฺกโร, อโถปิ สรณงฺกโร;
Taṇhaṅkaro medhaṅkaro, athopi saraṇaṅkaro;
ทีปงฺกโร จ สมฺพุโทฺธ, เอกกปฺปมฺหิ เต ชินาฯ
Dīpaṅkaro ca sambuddho, ekakappamhi te jinā.
๒.
2.
ทีปงฺกรสฺส อปเรน, โกณฺฑโญฺญ นาม นายโก;
Dīpaṅkarassa aparena, koṇḍañño nāma nāyako;
เอโกว เอกกปฺปมฺหิ, ตาเรสิ ชนตํ พหุํฯ
Ekova ekakappamhi, tāresi janataṃ bahuṃ.
๓.
3.
ทีปงฺกรสฺส ภควโต, โกณฺฑญฺญสฺส จ สตฺถุโน;
Dīpaṅkarassa bhagavato, koṇḍaññassa ca satthuno;
เอเตสํ อนฺตรา กปฺปา, คณนาโต อสงฺขิยาฯ
Etesaṃ antarā kappā, gaṇanāto asaṅkhiyā.
๔.
4.
โกณฺฑญฺญสฺส อปเรน, มงฺคโล นาม นายโก;
Koṇḍaññassa aparena, maṅgalo nāma nāyako;
เตสมฺปิ อนฺตรา กปฺปา, คณนาโต อสงฺขิยาฯ
Tesampi antarā kappā, gaṇanāto asaṅkhiyā.
๕.
5.
มงฺคโล จ สุมโน จ, เรวโต โสภิโต มุนิ;
Maṅgalo ca sumano ca, revato sobhito muni;
เตปิ พุทฺธา เอกกเปฺป, จกฺขุมโนฺต ปภงฺกราฯ
Tepi buddhā ekakappe, cakkhumanto pabhaṅkarā.
๖.
6.
โสภิตสฺส อปเรน, อโนมทสฺสี มหายโส;
Sobhitassa aparena, anomadassī mahāyaso;
เตสมฺปิ อนฺตรา กปฺปา, คณนาโต อสงฺขิยาฯ
Tesampi antarā kappā, gaṇanāto asaṅkhiyā.
๗.
7.
อโนมทสฺสี ปทุโม, นารโท จาปิ นายโก;
Anomadassī padumo, nārado cāpi nāyako;
เตปิ พุทฺธา เอกกเปฺป, ตมนฺตการกา มุนีฯ
Tepi buddhā ekakappe, tamantakārakā munī.
๘.
8.
นารทสฺส อปเรน, ปทุมุตฺตโร นาม นายโก;
Nāradassa aparena, padumuttaro nāma nāyako;
เอกกปฺปมฺหิ อุปฺปโนฺน, ตาเรสิ ชนตํ พหุํฯ
Ekakappamhi uppanno, tāresi janataṃ bahuṃ.
๙.
9.
นารทสฺส ภควโต, ปทุมุตฺตรสฺส สตฺถุโน;
Nāradassa bhagavato, padumuttarassa satthuno;
เตสมฺปิ อนฺตรา กปฺปา, คณนาโต อสงฺขิยาฯ
Tesampi antarā kappā, gaṇanāto asaṅkhiyā.
๑๐.
10.
กปฺปสตสหสฺสมฺหิ , เอโก อาสิ มหามุนิ;
Kappasatasahassamhi , eko āsi mahāmuni;
ปทุมุตฺตโร โลกวิทู, อาหุตีนํ ปฎิคฺคโหฯ
Padumuttaro lokavidū, āhutīnaṃ paṭiggaho.
๑๑.
11.
สุเมโธ จ สุชาโต จ, โอรโต ปทุมุตฺตราฯ
Sumedho ca sujāto ca, orato padumuttarā.
๑๒.
12.
ปิยทสฺสี อตฺถทสฺสี, ธมฺมทสฺสี จ นายกาฯ
Piyadassī atthadassī, dhammadassī ca nāyakā.
๑๓.
13.
โอรโต จ สุชาตสฺส, สมฺพุทฺธา ทฺวิปทุตฺตมา;
Orato ca sujātassa, sambuddhā dvipaduttamā;
เอกกปฺปมฺหิ เต พุทฺธา, โลเก อปฺปฎิปุคฺคลาฯ
Ekakappamhi te buddhā, loke appaṭipuggalā.
๑๔.
14.
จตุนฺนวุติโต กเปฺป, เอโก อาสิ มหามุนิ;
Catunnavutito kappe, eko āsi mahāmuni;
สิทฺธโตฺถ โส โลกวิทู, สลฺลกโตฺต อนุตฺตโรฯ
Siddhattho so lokavidū, sallakatto anuttaro.
๑๕.
15.
เทฺวนวุเต อิโต กเปฺป, ทุเว อาสุํ วินายกา;
Dvenavute ito kappe, duve āsuṃ vināyakā;
ติโสฺส ผุโสฺส จ สมฺพุทฺธา, อสมา อปฺปฎิปุคฺคลาฯ
Tisso phusso ca sambuddhā, asamā appaṭipuggalā.
๑๖.
16.
เอกนวุติโต กเปฺป, วิปสฺสี นาม นายโก;
Ekanavutito kappe, vipassī nāma nāyako;
โสปิ พุโทฺธ การุณิโก, สเตฺต โมเจสิ พนฺธนาฯ
Sopi buddho kāruṇiko, satte mocesi bandhanā.
๑๗.
17.
เอกติํเส อิโต กเปฺป, ทุเว อาสุํ วินายกา;
Ekatiṃse ito kappe, duve āsuṃ vināyakā;
สิขี จ เวสฺสภู เจว, อสมา อปฺปฎิปุคฺคลาฯ
Sikhī ca vessabhū ceva, asamā appaṭipuggalā.
๑๘.
18.
อิมมฺหิ ภทฺทเก กเปฺป, ตโย อาสุํ วินายกา;
Imamhi bhaddake kappe, tayo āsuṃ vināyakā;
กกุสโนฺธ โกณาคมโน, กสฺสโป จาปิ นายโกฯ
Kakusandho koṇāgamano, kassapo cāpi nāyako.
๑๙.
19.
อหเมตรหิ สมฺพุโทฺธ, เมเตฺตโยฺย จาปิ เหสฺสติ;
Ahametarahi sambuddho, metteyyo cāpi hessati;
เอเตปิเม ปญฺจ พุทฺธา, ธีรา โลกานุกมฺปกาฯ
Etepime pañca buddhā, dhīrā lokānukampakā.
๒๐.
20.
เอเตสํ ธมฺมราชูนํ, อเญฺญสํเนกโกฎินํ;
Etesaṃ dhammarājūnaṃ, aññesaṃnekakoṭinaṃ;
อาจิกฺขิตฺวาน ตํ มคฺคํ, นิพฺพุตา เต สสาวกาติฯ
Ācikkhitvāna taṃ maggaṃ, nibbutā te sasāvakāti.
พุทฺธปกิณฺณกกณฺฑํ นิฎฺฐิตํฯ
Buddhapakiṇṇakakaṇḍaṃ niṭṭhitaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / พุทฺธวํส-อฎฺฐกถา • Buddhavaṃsa-aṭṭhakathā / ๒๘. พุทฺธปกิณฺณกกถา • 28. Buddhapakiṇṇakakathā
