| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
১০. বুদ্ধনিদস্সনপঞ্হো
10. Buddhanidassanapañho
১০. রাজা আহ ‘‘ভন্তে নাগসেন, বুদ্ধো অত্থী’’তি? ‘‘আম, মহারাজ, ভগৰা অত্থী’’তি। ‘‘সক্কা পন, ভন্তে নাগসেন, বুদ্ধো নিদস্সেতুং ইধৰা ইধৰা’’তি? ‘‘পরিনিব্বুতো, মহারাজ, ভগৰা অনুপাদিসেসায নিব্বানধাতুযা, ন সক্কা ভগৰা নিদস্সেতুং ‘ইধ ৰা ইধ ৰা’’’তি।
10. Rājā āha ‘‘bhante nāgasena, buddho atthī’’ti? ‘‘Āma, mahārāja, bhagavā atthī’’ti. ‘‘Sakkā pana, bhante nāgasena, buddho nidassetuṃ idhavā idhavā’’ti? ‘‘Parinibbuto, mahārāja, bhagavā anupādisesāya nibbānadhātuyā, na sakkā bhagavā nidassetuṃ ‘idha vā idha vā’’’ti.
‘‘ওপম্মং করোহী’’তি। ‘‘তং কিং মঞ্ঞসি, মহারাজ, মহতো অগ্গিক্খন্ধস্স জলমানস্স যা অচ্চি অত্থঙ্গতা, সক্কা সা অচ্চি দস্সেতুং ‘ইধ ৰা ইধ ৰা’’’তি? ‘‘ন হি, ভন্তে, নিরুদ্ধা সা অচ্চি অপ্পঞ্ঞত্তিং গতা’’তি। ‘‘এৰমেৰ খো, মহারাজ, ভগৰা অনুপাদিসেসায নিব্বানধাতুযা পরিনিব্বুতো অত্থঙ্গতো, ন সক্কা ভগৰা নিদস্সেতুং ‘ইধ ৰা ইধ ৰা’ তি, ধম্মকাযেন পন খো, মহারাজ, সক্কা ভগৰা নিদস্সেতুং। ধম্মো হি, মহারাজ, ভগৰতা দেসিতো’’তি।
‘‘Opammaṃ karohī’’ti. ‘‘Taṃ kiṃ maññasi, mahārāja, mahato aggikkhandhassa jalamānassa yā acci atthaṅgatā, sakkā sā acci dassetuṃ ‘idha vā idha vā’’’ti? ‘‘Na hi, bhante, niruddhā sā acci appaññattiṃ gatā’’ti. ‘‘Evameva kho, mahārāja, bhagavā anupādisesāya nibbānadhātuyā parinibbuto atthaṅgato, na sakkā bhagavā nidassetuṃ ‘idha vā idha vā’ ti, dhammakāyena pana kho, mahārāja, sakkā bhagavā nidassetuṃ. Dhammo hi, mahārāja, bhagavatā desito’’ti.
‘‘কল্লোসি, ভন্তে নাগসেনা’’তি।
‘‘Kallosi, bhante nāgasenā’’ti.
বুদ্ধনিদস্সনপঞ্হো দসমো।
Buddhanidassanapañho dasamo.
বুদ্ধৰগ্গো পঞ্চমো।
Buddhavaggo pañcamo.
ইমস্মিং ৰগ্গে দস পঞ্হা।
Imasmiṃ vagge dasa pañhā.
