| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৬. সতিৰগ্গো
6. Sativaggo
১. কাযপিযাযনপঞ্হো
1. Kāyapiyāyanapañho
১. রাজা আহ ‘‘ভন্তে নাগসেন, পিযো পব্বজিতানং কাযো’’তি? ‘‘ন খো, মহারাজ, পিযো পব্বজিতানং কাযো’’তি। ‘‘অথ কিস্স নু খো, ভন্তে, কেলাযথ মমাযথা’’তি? ‘‘কিং পন তে, মহারাজ, কদাচি করহচি সঙ্গামগতস্স কণ্ডপ্পহারো হোতী’’তি? ‘‘আম, ভন্তে, হোতী’’তি। ‘‘কিংনু খো , মহারাজ, সো ৰণো আলেপেন চ আলিম্পীযতি তেলেন চ মক্খীযতি সুখুমেন চ চোল়পট্টেন পলিৰেঠীযতী’’তি? ‘‘আম, ভন্তে, আলেপেন চ আলিম্পীযতি তেলেন চ মক্খীযতি সুখুমেন চ চোল়পট্টেন পলিৰেঠীযতী’’তি। ‘‘কিংনু খো, মহারাজ, পিযো তে ৰণো, তেন আলেপেন চ আলিম্পীযতি তেলেন চ মক্খীযতি সুখুমেন চ চোল়পট্টেন পলিৰেঠীযতী’’তি? ‘‘ন মে, ভন্তে, পিযো ৰণো, অপি চ মংসস্স রুহনত্থায আলেপেন চ আলিম্পীযতি তেলেন চ মক্খীযতি সুখুমেন চ চোল়পট্টেন পলিৰেঠীযতী’’তি। ‘‘এৰমেৰ খো, মহারাজ, অপ্পিযো পব্বজিতানং কাযো, অথ চ পব্বজিতা অনজ্ঝোসিতা কাযং পরিহরন্তি ব্রহ্মচরিযানুগ্গহায। অপি চ খো, মহারাজ, ৰণূপমো কাযো ৰুত্তো ভগৰতা, তেন পব্বজিতা ৰণমিৰ কাযং পরিহরন্তি অনজ্ঝোসিতা। ভাসিতম্পেতং মহারাজ ভগৰতা –
1. Rājā āha ‘‘bhante nāgasena, piyo pabbajitānaṃ kāyo’’ti? ‘‘Na kho, mahārāja, piyo pabbajitānaṃ kāyo’’ti. ‘‘Atha kissa nu kho, bhante, kelāyatha mamāyathā’’ti? ‘‘Kiṃ pana te, mahārāja, kadāci karahaci saṅgāmagatassa kaṇḍappahāro hotī’’ti? ‘‘Āma, bhante, hotī’’ti. ‘‘Kiṃnu kho , mahārāja, so vaṇo ālepena ca ālimpīyati telena ca makkhīyati sukhumena ca coḷapaṭṭena paliveṭhīyatī’’ti? ‘‘Āma, bhante, ālepena ca ālimpīyati telena ca makkhīyati sukhumena ca coḷapaṭṭena paliveṭhīyatī’’ti. ‘‘Kiṃnu kho, mahārāja, piyo te vaṇo, tena ālepena ca ālimpīyati telena ca makkhīyati sukhumena ca coḷapaṭṭena paliveṭhīyatī’’ti? ‘‘Na me, bhante, piyo vaṇo, api ca maṃsassa ruhanatthāya ālepena ca ālimpīyati telena ca makkhīyati sukhumena ca coḷapaṭṭena paliveṭhīyatī’’ti. ‘‘Evameva kho, mahārāja, appiyo pabbajitānaṃ kāyo, atha ca pabbajitā anajjhositā kāyaṃ pariharanti brahmacariyānuggahāya. Api ca kho, mahārāja, vaṇūpamo kāyo vutto bhagavatā, tena pabbajitā vaṇamiva kāyaṃ pariharanti anajjhositā. Bhāsitampetaṃ mahārāja bhagavatā –
‘‘‘অল্লচম্মপটিচ্ছন্নো, নৰদ্ৰারো মহাৰণো।
‘‘‘Allacammapaṭicchanno, navadvāro mahāvaṇo;
সমন্ততো পগ্ঘরতি, অসুচিপূতিগন্ধিযো’’’তি॥
Samantato paggharati, asucipūtigandhiyo’’’ti.
‘‘কল্লোসি, ভন্তে নাগসেনা’’তি।
‘‘Kallosi, bhante nāgasenā’’ti.
কাযপিযাযনপঞ্হো পঠমো।
Kāyapiyāyanapañho paṭhamo.
