| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
২. বুদ্ধগুণসতিপটিলাভপঞ্হো
2. Buddhaguṇasatipaṭilābhapañho
২. রাজা আহ ‘‘ভন্তে নাগসেন, তুম্হে এতং ভণথ ‘যো ৰস্সসতং অকুসলং করেয্য, মরণকালে চ একং বুদ্ধগুণং সতিং পটিলভেয্য, সো দেৰেসু উপ্পজ্জেয্যা’তি এতং ন সদ্দহামি, এৰঞ্চ পন ৰদেথ ‘এতেন পাণাতিপাতেন নিরযে উপ্পজ্জেয্যা’তি এতম্পি ন সদ্দহামী’’তি।
2. Rājā āha ‘‘bhante nāgasena, tumhe etaṃ bhaṇatha ‘yo vassasataṃ akusalaṃ kareyya, maraṇakāle ca ekaṃ buddhaguṇaṃ satiṃ paṭilabheyya, so devesu uppajjeyyā’ti etaṃ na saddahāmi, evañca pana vadetha ‘etena pāṇātipātena niraye uppajjeyyā’ti etampi na saddahāmī’’ti.
‘‘তং কিং মঞ্ঞসি, মহারাজ, খুদ্দকোপি পাসাণো ৰিনা নাৰায উদকে উপ্পিলৰেয্যা’’তি । ‘‘ন হি, ভন্তে’’তি। ‘‘কিং নু খো, মহারাজ, ৰাহসতম্পি পাসাণানং নাৰায আরোপিতং উদকে উপ্পিলৰেয্যা’’তি? ‘‘আম, ভন্তে’’তি। ‘‘যথা, মহারাজ, নাৰা, এৰং কুসলানি কম্মানি দট্ঠব্বানী’’তি।
‘‘Taṃ kiṃ maññasi, mahārāja, khuddakopi pāsāṇo vinā nāvāya udake uppilaveyyā’’ti . ‘‘Na hi, bhante’’ti. ‘‘Kiṃ nu kho, mahārāja, vāhasatampi pāsāṇānaṃ nāvāya āropitaṃ udake uppilaveyyā’’ti? ‘‘Āma, bhante’’ti. ‘‘Yathā, mahārāja, nāvā, evaṃ kusalāni kammāni daṭṭhabbānī’’ti.
‘‘কল্লোসি, ভন্তে নাগসেনা’’তি।
‘‘Kallosi, bhante nāgasenā’’ti.
বুদ্ধগুণসতিপটিলাভপঞ্হো দুতিযো।
Buddhaguṇasatipaṭilābhapañho dutiyo.
