| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৪. ব্রহ্মলোকপঞ্হো
4. Brahmalokapañho
৪. রাজা আহ ‘‘ভন্তে নাগসেন, কীৰদূরো ইতো ব্রহ্মলোকো’’তি? ‘‘দূরো খো, মহারাজ, ইতো ব্রহ্মলোকো কূটাগারমত্তা সিলা তম্হা পতিতা অহোরত্তেন অট্ঠচত্তালীসযোজনসহস্সানি ভস্সমানা চতূহি মাসেহি পথৰিযং পতিট্ঠহেয্যা’’তি।
4. Rājā āha ‘‘bhante nāgasena, kīvadūro ito brahmaloko’’ti? ‘‘Dūro kho, mahārāja, ito brahmaloko kūṭāgāramattā silā tamhā patitā ahorattena aṭṭhacattālīsayojanasahassāni bhassamānā catūhi māsehi pathaviyaṃ patiṭṭhaheyyā’’ti.
‘‘ভন্তে নাগসেন, তুম্হে এৰং ভণথ ‘সেয্যথাপি বলৰা পুরিসো সমিঞ্জিতং ৰা বাহং পসারেয্য , পসারিতং ৰা বাহং সমিঞ্জেয্য, এৰমেৰ ইদ্ধিমা ভিক্খু চেতোৰসিপ্পত্তো জম্বুদীপে অন্তরহিতো ব্রহ্মলোকে পাতুভৰেয্যা’তি এতং ৰচনং ন সদ্দহামি, এৰং অতিসীঘং তাৰ বহূনি যোজনসতানি গচ্ছিস্সতী’’তি।
‘‘Bhante nāgasena, tumhe evaṃ bhaṇatha ‘seyyathāpi balavā puriso samiñjitaṃ vā bāhaṃ pasāreyya , pasāritaṃ vā bāhaṃ samiñjeyya, evameva iddhimā bhikkhu cetovasippatto jambudīpe antarahito brahmaloke pātubhaveyyā’ti etaṃ vacanaṃ na saddahāmi, evaṃ atisīghaṃ tāva bahūni yojanasatāni gacchissatī’’ti.
থেরো আহ ‘‘কুহিং পন, মহারাজ, তৰ জাতভূমী’’তি? ‘‘অত্থি, ভন্তে, অলসন্দো নাম দীপো, তত্থাহং জাতো’’তি। ‘‘কীৰ দূরো, মহারাজ, ইতো অলসন্দো হোতী’’তি? ‘‘দ্ৰিমত্তানি, ভন্তে, যোজনসতানী’’তি। ‘‘অভিজানাসি নু ত্ৰং, মহারাজ, তত্থ কিঞ্চিদেৰ করণীযং করিত্ৰা সরিতা’’তি? ‘‘আম, ভন্তে, সরামী’’তি। ‘‘লহুং খো ত্ৰং, মহারাজ, গতোসি দ্ৰিমত্তানি যোজনসতানী’’তি।
Thero āha ‘‘kuhiṃ pana, mahārāja, tava jātabhūmī’’ti? ‘‘Atthi, bhante, alasando nāma dīpo, tatthāhaṃ jāto’’ti. ‘‘Kīva dūro, mahārāja, ito alasando hotī’’ti? ‘‘Dvimattāni, bhante, yojanasatānī’’ti. ‘‘Abhijānāsi nu tvaṃ, mahārāja, tattha kiñcideva karaṇīyaṃ karitvā saritā’’ti? ‘‘Āma, bhante, sarāmī’’ti. ‘‘Lahuṃ kho tvaṃ, mahārāja, gatosi dvimattāni yojanasatānī’’ti.
‘‘কল্লোসি, ভন্তে নাগসেনা’’তি।
‘‘Kallosi, bhante nāgasenā’’ti.
ব্রহ্মলোকপঞ্হো চতুত্থো।
Brahmalokapañho catuttho.
