| Library / Tipiṭaka / திபிடக • Tipiṭaka / அபதா³னபாளி • Apadānapāḷi |
38. போ³தி⁴வந்த³னவக்³கோ³
38. Bodhivandanavaggo
1. போ³தி⁴வந்த³கத்தே²ரஅபதா³னங்
1. Bodhivandakattheraapadānaṃ
1.
1.
‘‘பாடலிங் ஹரிதங் தி³ஸ்வா, பாத³பங் த⁴ரணீருஹங்;
‘‘Pāṭaliṃ haritaṃ disvā, pādapaṃ dharaṇīruhaṃ;
ஏகங்ஸங் அஞ்ஜலிங் கத்வா, அவந்தி³ங் பாடலிங் அஹங்.
Ekaṃsaṃ añjaliṃ katvā, avandiṃ pāṭaliṃ ahaṃ.
2.
2.
‘‘அஞ்ஜலிங் பக்³க³ஹெத்வான, க³ருங் கத்வான மானஸங்;
‘‘Añjaliṃ paggahetvāna, garuṃ katvāna mānasaṃ;
அந்தோஸுத்³த⁴ங் ப³ஹிஸுத்³த⁴ங், ஸுவிமுத்தமனாஸவங்.
Antosuddhaṃ bahisuddhaṃ, suvimuttamanāsavaṃ.
3.
3.
‘‘விபஸ்ஸிங் லோகமஹிதங், கருணாஞாணஸாக³ரங்;
‘‘Vipassiṃ lokamahitaṃ, karuṇāñāṇasāgaraṃ;
ஸம்முகா² விய ஸம்பு³த்³த⁴ங், அவந்தி³ங் பாடலிங் அஹங்.
Sammukhā viya sambuddhaṃ, avandiṃ pāṭaliṃ ahaṃ.
4.
4.
‘‘ஏகனவுதிதோ கப்பே, யங் போ³தி⁴மபி⁴வந்த³ஹங்;
‘‘Ekanavutito kappe, yaṃ bodhimabhivandahaṃ;
து³க்³க³திங் நாபி⁴ஜானாமி, வந்த³னாய இத³ங் ப²லங்.
Duggatiṃ nābhijānāmi, vandanāya idaṃ phalaṃ.
5.
5.
‘‘படிஸம்பி⁴தா³ சதஸ்ஸோ, விமொக்கா²பி ச அட்டி²மே;
‘‘Paṭisambhidā catasso, vimokkhāpi ca aṭṭhime;
ச²ளபி⁴ஞ்ஞா ஸச்சி²கதா, கதங் பு³த்³த⁴ஸ்ஸ ஸாஸனங்’’.
Chaḷabhiññā sacchikatā, kataṃ buddhassa sāsanaṃ’’.
இத்த²ங் ஸுத³ங் ஆயஸ்மா போ³தி⁴வந்த³கோ தே²ரோ இமா கா³தா²யோ அபா⁴ஸித்தா²தி.
Itthaṃ sudaṃ āyasmā bodhivandako thero imā gāthāyo abhāsitthāti.
போ³தி⁴வந்த³கத்தே²ரஸ்ஸாபதா³னங் பட²மங்.
Bodhivandakattherassāpadānaṃ paṭhamaṃ.
