| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
២. ភោជនទាយកត្ថេរអបទានំ
2. Bhojanadāyakattheraapadānaṃ
៤.
4.
‘‘សុជាតោ សាលលដ្ឋីវ, សោភញ្ជនមិវុគ្គតោ;
‘‘Sujāto sālalaṭṭhīva, sobhañjanamivuggato;
ឥន្ទលដ្ឋិរិវាកាសេ, វិរោចតិ សទា ជិនោ។
Indalaṭṭhirivākāse, virocati sadā jino.
៥.
5.
‘‘តស្ស ទេវាតិទេវស្ស, វេស្សភុស្ស មហេសិនោ;
‘‘Tassa devātidevassa, vessabhussa mahesino;
អទាសិ ភោជនមហំ, វិប្បសន្នេន ចេតសា។
Adāsi bhojanamahaṃ, vippasannena cetasā.
៦.
6.
‘‘តំ មេ ពុទ្ធោ អនុមោទិ, សយម្ភូ អបរាជិតោ;
‘‘Taṃ me buddho anumodi, sayambhū aparājito;
ភវេ និព្ពត្តមានម្ហិ, ផលំ និព្ពត្តតូ តវ។
Bhave nibbattamānamhi, phalaṃ nibbattatū tava.
៧.
7.
‘‘ឯកត្តិំសេ ឥតោ កប្បេ, យំ ទានមទទិំ តទា;
‘‘Ekattiṃse ito kappe, yaṃ dānamadadiṃ tadā;
ទុគ្គតិំ នាភិជានាមិ, ភោជនស្ស ឥទំ ផលំ។
Duggatiṃ nābhijānāmi, bhojanassa idaṃ phalaṃ.
៨.
8.
‘‘បញ្ចវីសេ ឥតោ កប្បេ, ឯកោ អាសិំ អមិត្តកោ;
‘‘Pañcavīse ito kappe, eko āsiṃ amittako;
សត្តរតនសម្បន្នោ, ចក្កវត្តី មហព្ពលោ។
Sattaratanasampanno, cakkavattī mahabbalo.
៩.
9.
‘‘បដិសម្ភិទា ចតស្សោ…បេ.… កតំ ពុទ្ធស្ស សាសនំ’’។
‘‘Paṭisambhidā catasso…pe… kataṃ buddhassa sāsanaṃ’’.
ឥត្ថំ សុទំ អាយស្មា ភោជនទាយកោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā bhojanadāyako thero imā gāthāyo abhāsitthāti.
ភោជនទាយកត្ថេរស្សាបទានំ ទុតិយំ។
Bhojanadāyakattherassāpadānaṃ dutiyaṃ.
