| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၅. ဘီတာသုတ္တဝဏ္ဏနာ
5. Bhītāsuttavaṇṇanā
၇၅. ကိံ သူဓ ဘီတာတိ ဧတ္ထ သု-ဣဓာတိ နိပာတမတ္တန္တိ အာဟ ‘‘ကိံ ဘီတာ’’တိ? မဂ္ဂော စ နေကာယတနပ္ပဝုတ္တောတိ အနေကကာရဏံ နာနာဝိဓာဓိဂမောကာသံ ကတ္ဝာ ပဝုတ္တော ကထိတော။ တေနာဟ ‘‘အဋ္ဌတိံသာရမ္မဏဝသေနာ’’တိအာဒိ။ ဧဝံ သန္တေတိ ဧဝံ သဗ္ဗသာဓာရဏာနေကာယတနေဟိ နိဗ္ဗာနဂာမိမဂ္ဂသ္သ တုမ္ဟေဟိ ပဝေဒိတတ္တာ လဗ္ဘမာနေ ခေမေ မဂ္ဂေ ကိံ ဘီတာယံ ဇနတာ ဥပ္ပထဘူတာ ဝိပရီတဒိဋ္ဌိတော ဂဏ္ဟီတိ အတ္ထော? ဧဝံ ဒေဝတာ ယထိစ္ဆာယ ပုရိမဒ္ဓေန အတ္တနာ ယထာစိန္တိတမတ္ထံ သတ္ထု ပဝေဒိတာ, ပစ္ဆိမဒ္ဓေန အတ္တနော သံသယံ ပုစ္ဆတိ။ ဗဟုပညာတိ ပုထုပည။ ဥသ္သန္နပညာတိ အဓိကပညာ။ ဌပေတ္ဝာတိ သံယမေတ္ဝာ။ သံဝိဘာဂီတိ အာဟာရပရိဘောဂေ သမ္မဒေဝ ဝိဘဇနသီလော။ တေနာဟ ‘‘အစ္ဆရာယာ’’တိအာဒိ။ ဝုတ္တတ္ထမေဝ ဟေဋ္ဌာ။
75.Kiṃ sūdha bhītāti ettha su-idhāti nipātamattanti āha ‘‘kiṃ bhītā’’ti? Maggo ca nekāyatanappavuttoti anekakāraṇaṃ nānāvidhādhigamokāsaṃ katvā pavutto kathito. Tenāha ‘‘aṭṭhatiṃsārammaṇavasenā’’tiādi. Evaṃ santeti evaṃ sabbasādhāraṇānekāyatanehi nibbānagāmimaggassa tumhehi paveditattā labbhamāne kheme magge kiṃ bhītāyaṃ janatā uppathabhūtā viparītadiṭṭhito gaṇhīti attho? Evaṃ devatā yathicchāya purimaddhena attanā yathācintitamatthaṃ satthu paveditā, pacchimaddhena attano saṃsayaṃ pucchati. Bahupaññāti puthupañña. Ussannapaññāti adhikapaññā. Ṭhapetvāti saṃyametvā. Saṃvibhāgīti āhāraparibhoge sammadeva vibhajanasīlo. Tenāha ‘‘accharāyā’’tiādi. Vuttatthameva heṭṭhā.
မနေနာတိ မနောဂဟဏေန။ ပုဗ္ဗသုဒ္ဓိအင္ဂန္တိ ပုဗ္ဗဘာဂသုဒ္ဓိဘူတံ အင္ဂံ။ စတူသူတိ ဝုတ္တအင္ဂပရိယာပန္နံ။ ယညဥပက္ခရောတိ ဒာနသ္သ သာဓနံ။ ဧတေသု ဓမ္မေသူတိ ဧတေသု သဒ္ဓာဒိဂုဏေသု။ ယထာ ဟိ သဒ္ဓော ပစ္စယံ ပစ္စုပဋ္ဌပေတ္ဝာ ဝတ္ထုပရိစ္စာဂသ္သ ဝိသေသပစ္စယော ကမ္မဖလသ္သ ပရလောကသ္သ စ ပစ္စက္ခတော ဝိယ ပတ္တိယာယနတော, ဧဝံ မုဒုဟဒယော။ မုဒုဟဒယော ဟိ အနုဒယံ ပတ္ဝာ ယံ ကိဉ္စိ အတ္တနော သန္တကံ ပရေသံ ဒေတိ။ ယော စ သံဝိဘာဂသီလော, သော အပ္ပကသ္မိမ္ပိ အတ္တနော သန္တကေ ပရေဟိ သာဓာရဏဘောဂီ ဟောတိ။ ဝဒညူ ဝဒာနိယတာယ ယာဂိနောဝ ယုတ္တံ ယုတ္တကာလံ ဉတ္ဝာ အတ္ထိကာနံ မနောရထံ ပူရေတီတိ ဝုတ္တံ ‘‘ဣတိ။ပေ.။ စတူသူတိ အာဟာ’’တိ။
Manenāti manogahaṇena. Pubbasuddhiaṅganti pubbabhāgasuddhibhūtaṃ aṅgaṃ. Catūsūti vuttaaṅgapariyāpannaṃ. Yaññaupakkharoti dānassa sādhanaṃ. Etesu dhammesūti etesu saddhādiguṇesu. Yathā hi saddho paccayaṃ paccupaṭṭhapetvā vatthupariccāgassa visesapaccayo kammaphalassa paralokassa ca paccakkhato viya pattiyāyanato, evaṃ muduhadayo. Muduhadayo hi anudayaṃ patvā yaṃ kiñci attano santakaṃ paresaṃ deti. Yo ca saṃvibhāgasīlo, so appakasmimpi attano santake parehi sādhāraṇabhogī hoti. Vadaññū vadāniyatāya yāginova yuttaṃ yuttakālaṃ ñatvā atthikānaṃ manorathaṃ pūretīti vuttaṃ ‘‘iti…pe… catūsūti āhā’’ti.
ဝာစန္တိအာဒီနိ တီဏိ အင္ဂာနိ တိဝိဓသီလသမ္ပတ္တိဒီပနတော။ သမ္ပန္နသီလော ဟိ ပရလောကံ န ဘာသေယ္ယ။ သဒ္ဓော ဧကံ အင္ဂံ ပယောဂာသယသုဒ္ဓိဒီပနတော။ သုဒ္ဓာသယသ္သ သမ္မာပယောဂေ ဌိတသ္သ ကထံ ပရလောကတော ဘယန္တိ။ ဒုကဝသေန စတုရင္ဂယောဇနာ ဒုကနယော။ ဧတေသု စတူသု ဓမ္မေသု ဌိတောတိ ဧတေသု ယထာဝုတ္တဒုကသင္ဂဟေသု စတူသု ဂုဏေသု ပတိဋ္ဌိတော။
Vācantiādīni tīṇi aṅgāni tividhasīlasampattidīpanato. Sampannasīlo hi paralokaṃ na bhāseyya. Saddho ekaṃ aṅgaṃ payogāsayasuddhidīpanato. Suddhāsayassa sammāpayoge ṭhitassa kathaṃ paralokato bhayanti. Dukavasena caturaṅgayojanā dukanayo. Etesu catūsu dhammesu ṭhitoti etesu yathāvuttadukasaṅgahesu catūsu guṇesu patiṭṭhito.
ဘီတာသုတ္တဝဏ္ဏနာ နိဋ္ဌိတာ။
Bhītāsuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၅. ဘီတာသုတ္တံ • 5. Bhītāsuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၅. ဘီတာသုတ္တဝဏ္ဏနာ • 5. Bhītāsuttavaṇṇanā
