| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៤. ភិសាលុវទាយកត្ថេរអបទានវណ្ណនា
4. Bhisāluvadāyakattheraapadānavaṇṇanā
កាននំ វនមោគ្គយ្ហាតិអាទិកំ អាយស្មតោ ភិសាលុវទាយកត្ថេរស្ស អបទានំ។ អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ វិបស្សិស្ស ភគវតោ កាលេ ហិមវន្តស្ស សមីបេ អរញ្ញាវាសេ វសន្តោ វនមូលផលាហារោ វិវេកវសេនាគតំ វិបស្សិំ ភគវន្តំ ទិស្វា បសន្នមានសោ បញ្ចភិសាលុវេ អទាសិ។ ភគវា តស្ស ចិត្តំ បសាទេតុំ បស្សន្តស្សេវ បរិភុញ្ជិ។ សោ តេន ចិត្តប្បសាទេន កាលំ កត្វា តុសិតាទីសុ សម្បត្តិមនុភវិត្វា បច្ឆា មនុស្សសម្បត្តិញ្ច អនុភវិត្វា ឥមស្មិំ ពុទ្ធុប្បាទេ ឯកស្មិំ កុលគេហេ និព្ពត្តោ វិភវសម្បត្តិំ បត្តោ តំ បហាយ សាសនេ បព្ពជិតោ នចិរស្សេវ អរហត្តំ បាបុណិ។
Kānanaṃvanamoggayhātiādikaṃ āyasmato bhisāluvadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle himavantassa samīpe araññāvāse vasanto vanamūlaphalāhāro vivekavasenāgataṃ vipassiṃ bhagavantaṃ disvā pasannamānaso pañcabhisāluve adāsi. Bhagavā tassa cittaṃ pasādetuṃ passantasseva paribhuñji. So tena cittappasādena kālaṃ katvā tusitādīsu sampattimanubhavitvā pacchā manussasampattiñca anubhavitvā imasmiṃ buddhuppāde ekasmiṃ kulagehe nibbatto vibhavasampattiṃ patto taṃ pahāya sāsane pabbajito nacirasseva arahattaṃ pāpuṇi.
១៣. សោ តតោ អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ កាននំ វនមោគ្គយ្ហាតិអាទិមាហ។ តំ ហេដ្ឋា វុត្តត្ថមេវ។ វសាមិ វិបិនេ អហន្តិ វិវេកវាសោ អហំ វសាមីតិ សម្ពន្ធោ។ សេសំ ឧត្តានត្ថមេវាតិ។
13. So tato attano pubbakammaṃ saritvā somanassajāto pubbacaritāpadānaṃ pakāsento kānanaṃ vanamoggayhātiādimāha. Taṃ heṭṭhā vuttatthameva. Vasāmi vipine ahanti vivekavāso ahaṃ vasāmīti sambandho. Sesaṃ uttānatthamevāti.
ភិសាលុវទាយកត្ថេរអបទានវណ្ណនា សមត្តា។
Bhisāluvadāyakattheraapadānavaṇṇanā samattā.
ឆដ្ឋភាណវារវណ្ណនា និដ្ឋិតា។
Chaṭṭhabhāṇavāravaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៤. ភិសាលុវទាយកត្ថេរអបទានំ • 4. Bhisāluvadāyakattheraapadānaṃ
