| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
៤. ភិសាលុវទាយកត្ថេរអបទានំ
4. Bhisāluvadāyakattheraapadānaṃ
១៣.
13.
‘‘កាននំ វនមោគយ្ហ, វសាមិ វិបិនេ អហំ;
‘‘Kānanaṃ vanamogayha, vasāmi vipine ahaṃ;
វិបស្សិំ អទ្ទសំ ពុទ្ធំ, អាហុតីនំ បដិគ្គហំ។
Vipassiṃ addasaṃ buddhaṃ, āhutīnaṃ paṭiggahaṃ.
១៤.
14.
‘‘ភិសាលុវញ្ច បាទាសិំ, ឧទកំ ហត្ថធោវនំ;
‘‘Bhisāluvañca pādāsiṃ, udakaṃ hatthadhovanaṃ;
វន្ទិត្វា សិរសា បាទេ, បក្កាមិ ឧត្តរាមុខោ។
Vanditvā sirasā pāde, pakkāmi uttarāmukho.
១៥.
15.
‘‘ឯកនវុតិតោ កប្បេ, ភិសាលុវមទំ តទា;
‘‘Ekanavutito kappe, bhisāluvamadaṃ tadā;
ទុគ្គតិំ នាភិជានាមិ, បុញ្ញកម្មស្សិទំ ផលំ។
Duggatiṃ nābhijānāmi, puññakammassidaṃ phalaṃ.
១៦.
16.
‘‘ឥតោ តតិយកេ កប្បេ, ភិសសម្មតខត្តិយោ;
‘‘Ito tatiyake kappe, bhisasammatakhattiyo;
សត្តរតនសម្បន្នោ, ចក្កវត្តី មហព្ពលោ។
Sattaratanasampanno, cakkavattī mahabbalo.
១៧.
17.
‘‘បដិសម្ភិទា ចតស្សោ…បេ.… កតំ ពុទ្ធស្ស សាសនំ’’។
‘‘Paṭisambhidā catasso…pe… kataṃ buddhassa sāsanaṃ’’.
ឥត្ថំ សុទំ អាយស្មា ភិសាលុវទាយកោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā bhisāluvadāyako thero imā gāthāyo abhāsitthāti.
ភិសាលុវទាយកត្ថេរស្សាបទានំ ចតុត្ថំ។
Bhisāluvadāyakattherassāpadānaṃ catutthaṃ.
ឆដ្ឋភាណវារំ។
Chaṭṭhabhāṇavāraṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / អបទាន-អដ្ឋកថា • Apadāna-aṭṭhakathā / ៤. ភិសាលុវទាយកត្ថេរអបទានវណ្ណនា • 4. Bhisāluvadāyakattheraapadānavaṇṇanā
