| Library / Tipiṭaka / തിപിടക • Tipiṭaka / മഹാവിഭങ്ഗ-അട്ഠകഥാ • Mahāvibhaṅga-aṭṭhakathā |
൩. ഭിക്ഖുനുപസ്സയസിക്ഖാപദവണ്ണനാ
3. Bhikkhunupassayasikkhāpadavaṇṇanā
൧൬൨. തതിയസിക്ഖാപദേ – അഞ്ഞത്ര സമയാ ഓവദതി ആപത്തി പാചിത്തിയസ്സാതിആദീസു അട്ഠഹി ഗരുധമ്മേഹി ഓവദന്തസ്സേവ പാചിത്തിയം, അഞ്ഞേന ധമ്മേന ദുക്കടന്തി വേദിതബ്ബം. ഏകതോഉപസമ്പന്നായാതി ഭിക്ഖുനിസങ്ഘേ ഉപസമ്പന്നായ, ഭിക്ഖുസങ്ഘേ ഉപസമ്പന്നായ പന ഓവദതോ പാചിത്തിയമേവ. ഇതോ പരമ്പി യത്ഥ യത്ഥ ‘‘ഏകതോഉപസമ്പന്നാ’’തി വുച്ചതി, സബ്ബത്ഥ അയമേവ അത്ഥോ ദട്ഠബ്ബോ. സേസം ഉത്താനമേവ.
162. Tatiyasikkhāpade – aññatra samayā ovadati āpatti pācittiyassātiādīsu aṭṭhahi garudhammehi ovadantasseva pācittiyaṃ, aññena dhammena dukkaṭanti veditabbaṃ. Ekatoupasampannāyāti bhikkhunisaṅghe upasampannāya, bhikkhusaṅghe upasampannāya pana ovadato pācittiyameva. Ito parampi yattha yattha ‘‘ekatoupasampannā’’ti vuccati, sabbattha ayameva attho daṭṭhabbo. Sesaṃ uttānameva.
കഥിനസമുട്ഠാനം – കായവാചതോ, കായവാചാചിത്തതോ ച സമുട്ഠാതി, കിരിയം, നോസഞ്ഞാവിമോക്ഖം, അചിത്തകം, പണ്ണത്തിവജ്ജം, കായകമ്മം, വചീകമ്മം, തിചിത്തം, തിവേദനന്തി.
Kathinasamuṭṭhānaṃ – kāyavācato, kāyavācācittato ca samuṭṭhāti, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, vacīkammaṃ, ticittaṃ, tivedananti.
ഭിക്ഖുനുപസ്സയസിക്ഖാപദം തതിയം.
Bhikkhunupassayasikkhāpadaṃ tatiyaṃ.
ഇദം പനേത്ഥ മഹാപച്ചരിയം വുത്തം പകിണ്ണകം – അസമ്മതോ ചേ ഭിക്ഖു അത്ഥങ്ഗതേ സൂരിയേ ഭിക്ഖുനുപസ്സയം ഉപസങ്കമിത്വാ അട്ഠഹി ഗരുധമ്മേഹി ഓവദതി, തീണി പാചിത്തിയാനി. അഞ്ഞേന ധമ്മേന ഓവദതോ ദ്വേ ദുക്കടാനി, ഏകം പാചിത്തിയം. കഥം? അസമ്മതമൂലകം ദുക്കടം, ഉപസ്സയം ഗന്ത്വാ അഞ്ഞേന ധമ്മേന ഓവദനമൂലകം ദുക്കടം, അത്ഥങ്ഗതേ സൂരിയേ ഓവദനമൂലകം പാചിത്തിയന്തി. സമ്മതസ്സ അത്ഥങ്ഗതേ സൂരിയേ തത്ഥ ഗന്ത്വാ അട്ഠഹി ഗരുധമ്മേഹി ഓവദന്തസ്സ ഏകാ അനാപത്തി, ദ്വേ പാചിത്തിയാനി. കഥം? സമ്മതത്താ അനാപത്തി, അത്ഥങ്ഗതേ സൂരിയേ ഓവദനമൂലകം ഏകം, ഗന്ത്വാ ഗരുധമ്മേഹി ഓവദനമൂലകം ഏകന്തി ദ്വേ പാചിത്തിയാനി. തസ്സേവ അഞ്ഞേന ധമ്മേന ഓവദതോ ഏകാ അനാപത്തി, ഏകം ദുക്കടം, ഏകം പാചിത്തിയം. കഥം? സമ്മതത്താ അനാപത്തി, ഗന്ത്വാ അഞ്ഞേന ധമ്മേന ഓവദനമൂലകം ദുക്കടം, അത്ഥങ്ഗതേ സൂരിയേ ഓവദനമൂലകം പാചിത്തിയന്തി. ദിവാ പന ഗന്ത്വാ ഓവദതോ സമ്മതസ്സ ച അസമ്മതസ്സ ച രത്തിം ഓവദനമൂലകം ഏകം പാചിത്തിയം അപനേത്വാ അവസേസാ ആപത്താനാപത്തിയോ വേദിതബ്ബാതി.
Idaṃ panettha mahāpaccariyaṃ vuttaṃ pakiṇṇakaṃ – asammato ce bhikkhu atthaṅgate sūriye bhikkhunupassayaṃ upasaṅkamitvā aṭṭhahi garudhammehi ovadati, tīṇi pācittiyāni. Aññena dhammena ovadato dve dukkaṭāni, ekaṃ pācittiyaṃ. Kathaṃ? Asammatamūlakaṃ dukkaṭaṃ, upassayaṃ gantvā aññena dhammena ovadanamūlakaṃ dukkaṭaṃ, atthaṅgate sūriye ovadanamūlakaṃ pācittiyanti. Sammatassa atthaṅgate sūriye tattha gantvā aṭṭhahi garudhammehi ovadantassa ekā anāpatti, dve pācittiyāni. Kathaṃ? Sammatattā anāpatti, atthaṅgate sūriye ovadanamūlakaṃ ekaṃ, gantvā garudhammehi ovadanamūlakaṃ ekanti dve pācittiyāni. Tasseva aññena dhammena ovadato ekā anāpatti, ekaṃ dukkaṭaṃ, ekaṃ pācittiyaṃ. Kathaṃ? Sammatattā anāpatti, gantvā aññena dhammena ovadanamūlakaṃ dukkaṭaṃ, atthaṅgate sūriye ovadanamūlakaṃ pācittiyanti. Divā pana gantvā ovadato sammatassa ca asammatassa ca rattiṃ ovadanamūlakaṃ ekaṃ pācittiyaṃ apanetvā avasesā āpattānāpattiyo veditabbāti.
പകിണ്ണകകഥാ നിട്ഠിതാ.
Pakiṇṇakakathā niṭṭhitā.
Related texts:
തിപിടക (മൂല) • Tipiṭaka (Mūla) / വിനയപിടക • Vinayapiṭaka / മഹാവിഭങ്ഗ • Mahāvibhaṅga / ൩. ഓവാദവഗ്ഗോ • 3. Ovādavaggo
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / സാരത്ഥദീപനീ-ടീകാ • Sāratthadīpanī-ṭīkā / ൩. ഭിക്ഖുനുപസ്സയസിക്ഖാപദവണ്ണനാ • 3. Bhikkhunupassayasikkhāpadavaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / വജിരബുദ്ധി-ടീകാ • Vajirabuddhi-ṭīkā / ൩. ഭിക്ഖുനുപസ്സയസിക്ഖാപദവണ്ണനാ • 3. Bhikkhunupassayasikkhāpadavaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / വിമതിവിനോദനീ-ടീകാ • Vimativinodanī-ṭīkā / ൩. ഭിക്ഖുനുപസ്സയസിക്ഖാപദവണ്ണനാ • 3. Bhikkhunupassayasikkhāpadavaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / പാചിത്യാദിയോജനാപാളി • Pācityādiyojanāpāḷi / ൩. ഭിക്ഖുനുപസ്സയസിക്ഖാപദം • 3. Bhikkhunupassayasikkhāpadaṃ
