| Library / Tipiṭaka / තිපිටක • Tipiṭaka / චරියාපිටකපාළි • Cariyāpiṭakapāḷi |
3. අයොඝරචරියා
3. Ayogharacariyā
24.
24.
‘‘පුනාපරං යදා හොමි, කාසිරාජස්ස අත්රජො;
‘‘Punāparaṃ yadā homi, kāsirājassa atrajo;
අයොඝරම්හි සංවඩ්ඪො, නාමෙනාසි අයොඝරො.
Ayogharamhi saṃvaḍḍho, nāmenāsi ayogharo.
25.
25.
‘‘දුක්ඛෙන ජීවිතො ලද්ධො, සංපීළෙ පතිපොසිතො;
‘‘Dukkhena jīvito laddho, saṃpīḷe patiposito;
අජ්ජෙව පුත්ත පටිපජ්ජ, කෙවලං වසුධං ඉමං.
Ajjeva putta paṭipajja, kevalaṃ vasudhaṃ imaṃ.
26.
26.
‘‘සරට්ඨකං සනිගමං, සජනං වන්දිත්ව ඛත්තියං;
‘‘Saraṭṭhakaṃ sanigamaṃ, sajanaṃ vanditva khattiyaṃ;
අඤ්ජලිං පග්ගහෙත්වාන, ඉදං වචනමබ්රවිං.
Añjaliṃ paggahetvāna, idaṃ vacanamabraviṃ.
27.
27.
‘‘‘යෙ කෙචි මහියා සත්තා, හීනමුක්කට්ඨමජ්ඣිමා;
‘‘‘Ye keci mahiyā sattā, hīnamukkaṭṭhamajjhimā;
නිරාරක්ඛා සකෙ ගෙහෙ, වඩ්ඪන්ති සකඤාතිභි.
Nirārakkhā sake gehe, vaḍḍhanti sakañātibhi.
28.
28.
‘‘‘ඉදං ලොකෙ උත්තරියං, සංපීළෙ මම පොසනං;
‘‘‘Idaṃ loke uttariyaṃ, saṃpīḷe mama posanaṃ;
අයොඝරම්හි සංවඩ්ඪො, අප්පභෙ චන්දසූරියෙ.
Ayogharamhi saṃvaḍḍho, appabhe candasūriye.
29.
29.
‘‘‘පූතිකුණපසම්පුණ්ණා, මුච්චිත්වා මාතු කුච්ඡිතො;
‘‘‘Pūtikuṇapasampuṇṇā, muccitvā mātu kucchito;
තතො ඝොරතරෙ දුක්ඛෙ, පුන පක්ඛිත්තයොඝරෙ.
Tato ghoratare dukkhe, puna pakkhittayoghare.
30.
30.
‘‘‘යදිහං තාදිසං පත්වා, දුක්ඛං පරමදාරුණං;
‘‘‘Yadihaṃ tādisaṃ patvā, dukkhaṃ paramadāruṇaṃ;
31.
31.
‘‘‘උක්කණ්ඨිතොම්හි කායෙන, රජ්ජෙනම්හි අනත්ථිකො;
‘‘‘Ukkaṇṭhitomhi kāyena, rajjenamhi anatthiko;
නිබ්බුතිං පරියෙසිස්සං, යත්ථ මං මච්චු න මද්දියෙ’.
Nibbutiṃ pariyesissaṃ, yattha maṃ maccu na maddiye’.
32.
32.
‘‘එවාහං චින්තයිත්වාන, විරවන්තෙ මහාජනෙ;
‘‘Evāhaṃ cintayitvāna, viravante mahājane;
නාගොව බන්ධනං ඡෙත්වා, පාවිසිං කානනං වනං.
Nāgova bandhanaṃ chetvā, pāvisiṃ kānanaṃ vanaṃ.
33.
33.
‘‘මාතාපිතා න මෙ දෙස්සා, නපි මෙ දෙස්සං මහායසං;
‘‘Mātāpitā na me dessā, napi me dessaṃ mahāyasaṃ;
සබ්බඤ්ඤුතං පියං මය්හං, තස්මා රජ්ජං පරිච්චජි’’න්ති.
Sabbaññutaṃ piyaṃ mayhaṃ, tasmā rajjaṃ pariccaji’’nti.
අයොඝරචරියං තතියං.
Ayogharacariyaṃ tatiyaṃ.
Footnotes:
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / චරියාපිටක-අට්ඨකථා • Cariyāpiṭaka-aṭṭhakathā / 3. අයොඝරචරියාවණ්ණනා • 3. Ayogharacariyāvaṇṇanā
