| Library / Tipiṭaka / ติปิฎก • Tipiṭaka / จริยาปิฎกปาฬิ • Cariyāpiṭakapāḷi |
๓. อโยฆรจริยา
3. Ayogharacariyā
๒๔.
24.
‘‘ปุนาปรํ ยทา โหมิ, กาสิราชสฺส อตฺรโช;
‘‘Punāparaṃ yadā homi, kāsirājassa atrajo;
อโยฆรมฺหิ สํวโฑฺฒ, นาเมนาสิ อโยฆโรฯ
Ayogharamhi saṃvaḍḍho, nāmenāsi ayogharo.
๒๕.
25.
‘‘ทุเกฺขน ชีวิโต ลโทฺธ, สํปีเฬ ปติโปสิโต;
‘‘Dukkhena jīvito laddho, saṃpīḷe patiposito;
อเชฺชว ปุตฺต ปฎิปชฺช, เกวลํ วสุธํ อิมํฯ
Ajjeva putta paṭipajja, kevalaṃ vasudhaṃ imaṃ.
๒๖.
26.
‘‘สรฎฺฐกํ สนิคมํ, สชนํ วนฺทิตฺว ขตฺติยํ;
‘‘Saraṭṭhakaṃ sanigamaṃ, sajanaṃ vanditva khattiyaṃ;
อญฺชลิํ ปคฺคเหตฺวาน, อิทํ วจนมพฺรวิํฯ
Añjaliṃ paggahetvāna, idaṃ vacanamabraviṃ.
๒๗.
27.
‘‘‘เย เกจิ มหิยา สตฺตา, หีนมุกฺกฎฺฐมชฺฌิมา;
‘‘‘Ye keci mahiyā sattā, hīnamukkaṭṭhamajjhimā;
นิรารกฺขา สเก เคเห, วฑฺฒนฺติ สกญาติภิฯ
Nirārakkhā sake gehe, vaḍḍhanti sakañātibhi.
๒๘.
28.
‘‘‘อิทํ โลเก อุตฺตริยํ, สํปีเฬ มม โปสนํ;
‘‘‘Idaṃ loke uttariyaṃ, saṃpīḷe mama posanaṃ;
อโยฆรมฺหิ สํวโฑฺฒ, อปฺปเภ จนฺทสูริเยฯ
Ayogharamhi saṃvaḍḍho, appabhe candasūriye.
๒๙.
29.
‘‘‘ปูติกุณปสมฺปุณฺณา, มุจฺจิตฺวา มาตุ กุจฺฉิโต;
‘‘‘Pūtikuṇapasampuṇṇā, muccitvā mātu kucchito;
ตโต โฆรตเร ทุเกฺข, ปุน ปกฺขิตฺตโยฆเรฯ
Tato ghoratare dukkhe, puna pakkhittayoghare.
๓๐.
30.
‘‘‘ยทิหํ ตาทิสํ ปตฺวา, ทุกฺขํ ปรมทารุณํ;
‘‘‘Yadihaṃ tādisaṃ patvā, dukkhaṃ paramadāruṇaṃ;
๓๑.
31.
‘‘‘อุกฺกณฺฐิโตมฺหิ กาเยน, รเชฺชนมฺหิ อนตฺถิโก;
‘‘‘Ukkaṇṭhitomhi kāyena, rajjenamhi anatthiko;
นิพฺพุติํ ปริเยสิสฺสํ, ยตฺถ มํ มจฺจุ น มทฺทิเย’ฯ
Nibbutiṃ pariyesissaṃ, yattha maṃ maccu na maddiye’.
๓๒.
32.
‘‘เอวาหํ จินฺตยิตฺวาน, วิรวเนฺต มหาชเน;
‘‘Evāhaṃ cintayitvāna, viravante mahājane;
นาโคว พนฺธนํ เฉตฺวา, ปาวิสิํ กานนํ วนํฯ
Nāgova bandhanaṃ chetvā, pāvisiṃ kānanaṃ vanaṃ.
๓๓.
33.
‘‘มาตาปิตา น เม เทสฺสา, นปิ เม เทสฺสํ มหายสํ;
‘‘Mātāpitā na me dessā, napi me dessaṃ mahāyasaṃ;
สพฺพญฺญุตํ ปิยํ มยฺหํ, ตสฺมา รชฺชํ ปริจฺจชิ’’นฺติฯ
Sabbaññutaṃ piyaṃ mayhaṃ, tasmā rajjaṃ pariccaji’’nti.
อโยฆรจริยํ ตติยํฯ
Ayogharacariyaṃ tatiyaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / จริยาปิฎก-อฎฺฐกถา • Cariyāpiṭaka-aṭṭhakathā / ๓. อโยฆรจริยาวณฺณนา • 3. Ayogharacariyāvaṇṇanā
