| Library / Tipiṭaka / ತಿಪಿಟಕ • Tipiṭaka / ಇತಿವುತ್ತಕಪಾಳಿ • Itivuttakapāḷi |
೬. ಅವುಟ್ಠಿಕಸುತ್ತಂ
6. Avuṭṭhikasuttaṃ
೭೫. ವುತ್ತಞ್ಹೇತಂ ಭಗವತಾ, ವುತ್ತಮರಹತಾತಿ ಮೇ ಸುತಂ –
75. Vuttañhetaṃ bhagavatā, vuttamarahatāti me sutaṃ –
‘‘ತಯೋಮೇ, ಭಿಕ್ಖವೇ, ಪುಗ್ಗಲಾ ಸನ್ತೋ ಸಂವಿಜ್ಜಮಾನಾ ಲೋಕಸ್ಮಿಂ। ಕತಮೇ ತಯೋ? ಅವುಟ್ಠಿಕಸಮೋ , ಪದೇಸವಸ್ಸೀ, ಸಬ್ಬತ್ಥಾಭಿವಸ್ಸೀ।
‘‘Tayome, bhikkhave, puggalā santo saṃvijjamānā lokasmiṃ. Katame tayo? Avuṭṭhikasamo , padesavassī, sabbatthābhivassī.
‘‘ಕಥಞ್ಚ , ಭಿಕ್ಖವೇ, ಪುಗ್ಗಲೋ ಅವುಟ್ಠಿಕಸಮೋ ಹೋತಿ? ಇಧ, ಭಿಕ್ಖವೇ, ಏಕಚ್ಚೋ ಪುಗ್ಗಲೋ ಸಬ್ಬೇಸಞ್ಞೇವ ನ ದಾತಾ ಹೋತಿ, ಸಮಣಬ್ರಾಹ್ಮಣಕಪಣದ್ಧಿಕವನಿಬ್ಬಕಯಾಚಕಾನಂ 1 ಅನ್ನಂ ಪಾನಂ ವತ್ಥಂ ಯಾನಂ ಮಾಲಾಗನ್ಧವಿಲೇಪನಂ ಸೇಯ್ಯಾವಸಥಪದೀಪೇಯ್ಯಂ। ಏವಂ ಖೋ, ಭಿಕ್ಖವೇ, ಪುಗ್ಗಲೋ ಅವುಟ್ಠಿಕಸಮೋ ಹೋತಿ।
‘‘Kathañca , bhikkhave, puggalo avuṭṭhikasamo hoti? Idha, bhikkhave, ekacco puggalo sabbesaññeva na dātā hoti, samaṇabrāhmaṇakapaṇaddhikavanibbakayācakānaṃ 2 annaṃ pānaṃ vatthaṃ yānaṃ mālāgandhavilepanaṃ seyyāvasathapadīpeyyaṃ. Evaṃ kho, bhikkhave, puggalo avuṭṭhikasamo hoti.
‘‘ಕಥಞ್ಚ, ಭಿಕ್ಖವೇ, ಪುಗ್ಗಲೋ ಪದೇಸವಸ್ಸೀ ಹೋತಿ? ಇಧ, ಭಿಕ್ಖವೇ, ಏಕಚ್ಚೋ ಪುಗ್ಗಲೋ ಏಕಚ್ಚಾನಂ ದಾತಾ (ಹೋತಿ) 3, ಏಕಚ್ಚಾನಂ ನ ದಾತಾ ಹೋತಿ ಸಮಣಬ್ರಾಹ್ಮಣಕಪಣದ್ಧಿಕವನಿಬ್ಬಕಯಾಚಕಾನಂ ಅನ್ನಂ ಪಾನಂ ವತ್ಥಂ ಯಾನಂ ಮಾಲಾಗನ್ಧವಿಲೇಪನಂ ಸೇಯ್ಯಾವಸಥಪದೀಪೇಯ್ಯಂ। ಏವಂ ಖೋ, ಭಿಕ್ಖವೇ, ಪುಗ್ಗಲೋ ಪದೇಸವಸ್ಸೀ ಹೋತಿ।
‘‘Kathañca, bhikkhave, puggalo padesavassī hoti? Idha, bhikkhave, ekacco puggalo ekaccānaṃ dātā (hoti) 4, ekaccānaṃ na dātā hoti samaṇabrāhmaṇakapaṇaddhikavanibbakayācakānaṃ annaṃ pānaṃ vatthaṃ yānaṃ mālāgandhavilepanaṃ seyyāvasathapadīpeyyaṃ. Evaṃ kho, bhikkhave, puggalo padesavassī hoti.
‘‘ಕಥಞ್ಚ, ಭಿಕ್ಖವೇ, ಪುಗ್ಗಲೋ ಸಬ್ಬತ್ಥಾಭಿವಸ್ಸೀ ಹೋತಿ? ಇಧ, ಭಿಕ್ಖವೇ, ಏಕಚ್ಚೋ ಪುಗ್ಗಲೋ ಸಬ್ಬೇಸಂವ ದೇತಿ, ಸಮಣಬ್ರಾಹ್ಮಣಕಪಣದ್ಧಿಕವನಿಬ್ಬಕಯಾಚಕಾನಂ ಅನ್ನಂ ಪಾನಂ ವತ್ಥಂ ಯಾನಂ ಮಾಲಾಗನ್ಧವಿಲೇಪನಂ ಸೇಯ್ಯಾವಸಥಪದೀಪೇಯ್ಯಂ। ಏವಂ ಖೋ, ಭಿಕ್ಖವೇ, ಪುಗ್ಗಲೋ ಸಬ್ಬತ್ಥಾಭಿವಸ್ಸೀ ಹೋತಿ। ಇಮೇ ಖೋ, ಭಿಕ್ಖವೇ, ತಯೋ ಪುಗ್ಗಲಾ ಸನ್ತೋ ಸಂವಿಜ್ಜಮಾನಾ ಲೋಕಸ್ಮಿ’’ನ್ತಿ। ಏತಮತ್ಥಂ ಭಗವಾ ಅವೋಚ। ತತ್ಥೇತಂ ಇತಿ ವುಚ್ಚತಿ –
‘‘Kathañca, bhikkhave, puggalo sabbatthābhivassī hoti? Idha, bhikkhave, ekacco puggalo sabbesaṃva deti, samaṇabrāhmaṇakapaṇaddhikavanibbakayācakānaṃ annaṃ pānaṃ vatthaṃ yānaṃ mālāgandhavilepanaṃ seyyāvasathapadīpeyyaṃ. Evaṃ kho, bhikkhave, puggalo sabbatthābhivassī hoti. Ime kho, bhikkhave, tayo puggalā santo saṃvijjamānā lokasmi’’nti. Etamatthaṃ bhagavā avoca. Tatthetaṃ iti vuccati –
‘‘ನ ಸಮಣೇ ನ ಬ್ರಾಹ್ಮಣೇ, ನ ಕಪಣದ್ಧಿಕವನಿಬ್ಬಕೇ।
‘‘Na samaṇe na brāhmaṇe, na kapaṇaddhikavanibbake;
ಲದ್ಧಾನ ಸಂವಿಭಾಜೇತಿ, ಅನ್ನಂ ಪಾನಞ್ಚ ಭೋಜನಂ।
Laddhāna saṃvibhājeti, annaṃ pānañca bhojanaṃ;
ತಂ ವೇ ಅವುಟ್ಠಿಕಸಮೋತಿ, ಆಹು ನಂ ಪುರಿಸಾಧಮಂ॥
Taṃ ve avuṭṭhikasamoti, āhu naṃ purisādhamaṃ.
‘‘ಏಕಚ್ಚಾನಂ ನ ದದಾತಿ, ಏಕಚ್ಚಾನಂ ಪವೇಚ್ಛತಿ।
‘‘Ekaccānaṃ na dadāti, ekaccānaṃ pavecchati;
ತಂ ವೇ ಪದೇಸವಸ್ಸೀತಿ, ಆಹು ಮೇಧಾವಿನೋ ಜನಾ॥
Taṃ ve padesavassīti, āhu medhāvino janā.
‘‘ಸುಭಿಕ್ಖವಾಚೋ ಪುರಿಸೋ, ಸಬ್ಬಭೂತಾನುಕಮ್ಪಕೋ।
‘‘Subhikkhavāco puriso, sabbabhūtānukampako;
ಆಮೋದಮಾನೋ ಪಕಿರೇತಿ, ದೇಥ ದೇಥಾತಿ ಭಾಸತಿ॥
Āmodamāno pakireti, detha dethāti bhāsati.
‘‘ಯಥಾಪಿ ಮೇಘೋ ಥನಯಿತ್ವಾ, ಗಜ್ಜಯಿತ್ವಾ ಪವಸ್ಸತಿ।
‘‘Yathāpi megho thanayitvā, gajjayitvā pavassati;
‘‘ಏವಮೇವ ಇಧೇಕಚ್ಚೋ, ಪುಗ್ಗಲೋ ಹೋತಿ ತಾದಿಸೋ।
‘‘Evameva idhekacco, puggalo hoti tādiso;
ಧಮ್ಮೇನ ಸಂಹರಿತ್ವಾನ, ಉಟ್ಠಾನಾಧಿಗತಂ ಧನಂ।
Dhammena saṃharitvāna, uṭṭhānādhigataṃ dhanaṃ;
ತಪ್ಪೇತಿ ಅನ್ನಪಾನೇನ, ಸಮ್ಮಾ ಪತ್ತೇ ವನಿಬ್ಬಕೇ’’ತಿ॥
Tappeti annapānena, sammā patte vanibbake’’ti.
ಅಯಮ್ಪಿ ಅತ್ಥೋ ವುತ್ತೋ ಭಗವತಾ, ಇತಿ ಮೇ ಸುತನ್ತಿ। ಛಟ್ಠಂ।
Ayampi attho vutto bhagavatā, iti me sutanti. Chaṭṭhaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಇತಿವುತ್ತಕ-ಅಟ್ಠಕಥಾ • Itivuttaka-aṭṭhakathā / ೬. ಅವುಟ್ಠಿಕಸುತ್ತವಣ್ಣನಾ • 6. Avuṭṭhikasuttavaṇṇanā
