| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
២១. ឯកវីសតិមវគ្គោ
21. Ekavīsatimavaggo
(២០១) ២. អវិវិត្តកថា
(201) 2. Avivittakathā
៨៧៩. បុថុជ្ជនោ តេធាតុកេហិ ធម្មេហិ អវិវិត្តោតិ? អាមន្តា។ បុថុជ្ជនោ តេធាតុកេហិ ផស្សេហិ…បេ.… តេធាតុកាហិ វេទនាហិ… សញ្ញាហិ … ចេតនាហិ… ចិត្តេហិ… សទ្ធាហិ… វីរិយេហិ… សតីហិ… សមាធីហិ…បេ.… តេធាតុកាហិ បញ្ញាហិ អវិវិត្តោតិ? ន ហេវំ វត្តព្ពេ…បេ.…។
879. Puthujjano tedhātukehi dhammehi avivittoti? Āmantā. Puthujjano tedhātukehi phassehi…pe… tedhātukāhi vedanāhi… saññāhi … cetanāhi… cittehi… saddhāhi… vīriyehi… satīhi… samādhīhi…pe… tedhātukāhi paññāhi avivittoti? Na hevaṃ vattabbe…pe….
បុថុជ្ជនោ តេធាតុកេហិ កម្មេហិ អវិវិត្តោតិ? អាមន្តា។ យស្មិំ ខណេ បុថុជ្ជនោ ចីវរំ ទេតិ, តស្មិំ ខណេ បឋមំ ឈានំ ឧបសម្បជ្ជ វិហរតិ…បេ.… អាកាសានញ្ចាយតនំ ឧបសម្បជ្ជ វិហរតីតិ? ន ហេវំ វត្តព្ពេ…បេ.… យស្មិំ ខណេ បុថុជ្ជនោ បិណ្ឌបាតំ ទេតិ…បេ.… សេនាសនំ ទេតិ…បេ.… គិលានបច្ចយភេសជ្ជបរិក្ខារំ ទេតិ, តស្មិំ ខណេ ចតុត្ថំ ឈានំ ឧបសម្បជ្ជ វិហរតិ… នេវសញ្ញានាសញ្ញាយតនំ ឧបសម្បជ្ជ វិហរតីតិ? ន ហេវំ វត្តព្ពេ…បេ.…។
Puthujjano tedhātukehi kammehi avivittoti? Āmantā. Yasmiṃ khaṇe puthujjano cīvaraṃ deti, tasmiṃ khaṇe paṭhamaṃ jhānaṃ upasampajja viharati…pe… ākāsānañcāyatanaṃ upasampajja viharatīti? Na hevaṃ vattabbe…pe… yasmiṃ khaṇe puthujjano piṇḍapātaṃ deti…pe… senāsanaṃ deti…pe… gilānapaccayabhesajjaparikkhāraṃ deti, tasmiṃ khaṇe catutthaṃ jhānaṃ upasampajja viharati… nevasaññānāsaññāyatanaṃ upasampajja viharatīti? Na hevaṃ vattabbe…pe….
៨៨០. ន វត្តព្ពំ – ‘‘បុថុជ្ជនោ តេធាតុកេហិ កម្មេហិ អវិវិត្តោ’’តិ? អាមន្តា ។ បុថុជ្ជនស្ស រូបធាតុអរូបធាតូបគំ កម្មំ បរិញ្ញាតន្តិ? ន ហេវំ វត្តព្ពេ។ តេន ហិ បុថុជ្ជនោ តេធាតុកេហិ កម្មេហិ អវិវិត្តោតិ…បេ.…។
880. Na vattabbaṃ – ‘‘puthujjano tedhātukehi kammehi avivitto’’ti? Āmantā . Puthujjanassa rūpadhātuarūpadhātūpagaṃ kammaṃ pariññātanti? Na hevaṃ vattabbe. Tena hi puthujjano tedhātukehi kammehi avivittoti…pe….
អវិវិត្តកថា និដ្ឋិតា។
Avivittakathā niṭṭhitā.
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ២. អវិវិត្តកថាវណ្ណនា • 2. Avivittakathāvaṇṇanā
