| Library / Tipiṭaka / តិបិដក • Tipiṭaka / សារត្ថទីបនី-ដីកា • Sāratthadīpanī-ṭīkā |
៤. ភោជនវគ្គោ
4. Bhojanavaggo
១. អាវសថបិណ្ឌសិក្ខាបទវណ្ណនា
1. Āvasathapiṇḍasikkhāpadavaṇṇanā
២០៦. ភោជនវគ្គស្ស បឋមសិក្ខាបទេ អទ្ធយោជនំ វា យោជនំ វា គន្តុំ សក្កោតីតិ ឯត្ថ តត្តកំ គន្តុំ សក្កោន្តស្សបិ តាវតកំ គន្ត្វា អលទ្ធភិក្ខស្ស ឥតោ ភុញ្ជិតុំ វដ្ដតិ។ ឥមេសំយេវាតិ ឥមេសំ បាសណ្ឌានំយេវ។ ឯត្តកានន្តិ ឥមស្មិំ បាសណ្ឌេ ឯត្តកានំ។ ឯកទិវសំ ភុញ្ជិតព្ពន្តិ ឯកទិវសំ សកិំយេវ ភុញ្ជិតព្ពំ។ ‘‘ឯកទិវសំ ភុញ្ជិតព្ព’’ន្តិ វចនតោ បន ឯកស្មិំ ទិវសេ បុនប្បុនំ ភុញ្ជិតុំ វដ្ដតីតិ ន គហេតព្ពំ។ បុន អាទិតោ បដ្ឋាយ ភុញ្ជិតុំ ន វដ្ដតីតិ ឥមិនា បឋមំ ភុត្តដ្ឋានេសុ បុន ឯកស្មិម្បិ ឋានេ ភុញ្ជិតុំ ន វដ្ដតីតិ ទស្សេតិ។
206. Bhojanavaggassa paṭhamasikkhāpade addhayojanaṃ vā yojanaṃ vā gantuṃ sakkotīti ettha tattakaṃ gantuṃ sakkontassapi tāvatakaṃ gantvā aladdhabhikkhassa ito bhuñjituṃ vaṭṭati. Imesaṃyevāti imesaṃ pāsaṇḍānaṃyeva. Ettakānanti imasmiṃ pāsaṇḍe ettakānaṃ. Ekadivasaṃ bhuñjitabbanti ekadivasaṃ sakiṃyeva bhuñjitabbaṃ. ‘‘Ekadivasaṃ bhuñjitabba’’nti vacanato pana ekasmiṃ divase punappunaṃ bhuñjituṃ vaṭṭatīti na gahetabbaṃ. Puna ādito paṭṭhāya bhuñjituṃ na vaṭṭatīti iminā paṭhamaṃ bhuttaṭṭhānesu puna ekasmimpi ṭhāne bhuñjituṃ na vaṭṭatīti dasseti.
២០៨. ‘‘គច្ឆន្តោ វា អាគច្ឆន្តោ វាតិ ឥទំ អទ្ធយោជនវសេន គហេតព្ព’’ន្តិ វទន្តិ។ អន្តរាមគ្គេ គតដ្ឋានេតិ ឯកស្សេវ សន្តកំ សន្ធាយ វុត្តំ។ ‘‘អាគច្ឆន្តេបិ ឯសេវ នយោ’’តិ សង្ខេបេន វុត្តមេវត្ថំ វិភាវេន្តោ ‘‘គន្ត្វា បច្ចាគច្ឆន្តោ’’តិអាទិមាហ។ អាបត្តិដ្ឋានេយេវ បុន ភុញ្ជន្តស្ស អនាបត្តិ វត្តព្ពាតិ គមនេ អាគមនេ ច បឋមំ ភោជនំ អវត្វា អន្តរាមគ្គេ ឯកទិវសំ គតដ្ឋានេ ច ឯកទិវសន្តិ បុនប្បុនំ ភោជនមេវ ទស្សិតំ, គមនទិវសេ បន អាគមនទិវសេ ច ‘‘គមិស្សាមិ អាគមិស្សាមី’’តិ ភុញ្ជិតុំ វដ្ដតិយេវ។ សុទ្ធចិត្តេន បុនប្បុនំ ភុញ្ជន្តស្សបិ បុនប្បុនំ ភោជនេ អនាបត្តិ។ អញ្ញស្សត្ថាយ ឧទ្ទិសិត្វា បញ្ញត្តំ ភិក្ខុនោ គហេតុមេវ ន វដ្ដតីតិ អាហ ‘‘ភិក្ខូនំយេវ អត្ថាយា’’តិ។ សេសមេត្ថ ឧត្តានមេវ។ អាវសថបិណ្ឌតា, អគិលានតា, អនុវសិត្វា ភោជនន្តិ ឥមានិ បនេត្ថ តីណិ អង្គានិ។
208.‘‘Gacchanto vā āgacchanto vāti idaṃ addhayojanavasena gahetabba’’nti vadanti. Antarāmagge gataṭṭhāneti ekasseva santakaṃ sandhāya vuttaṃ. ‘‘Āgacchantepi eseva nayo’’ti saṅkhepena vuttamevatthaṃ vibhāvento ‘‘gantvā paccāgacchanto’’tiādimāha. Āpattiṭṭhāneyeva puna bhuñjantassa anāpatti vattabbāti gamane āgamane ca paṭhamaṃ bhojanaṃ avatvā antarāmagge ekadivasaṃ gataṭṭhāne ca ekadivasanti punappunaṃ bhojanameva dassitaṃ, gamanadivase pana āgamanadivase ca ‘‘gamissāmi āgamissāmī’’ti bhuñjituṃ vaṭṭatiyeva. Suddhacittena punappunaṃ bhuñjantassapi punappunaṃ bhojane anāpatti. Aññassatthāya uddisitvā paññattaṃ bhikkhuno gahetumeva na vaṭṭatīti āha ‘‘bhikkhūnaṃyeva atthāyā’’ti. Sesamettha uttānameva. Āvasathapiṇḍatā, agilānatā, anuvasitvā bhojananti imāni panettha tīṇi aṅgāni.
អាវសថបិណ្ឌសិក្ខាបទវណ្ណនា និដ្ឋិតា។
Āvasathapiṇḍasikkhāpadavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៤. ភោជនវគ្គោ • 4. Bhojanavaggo
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវិភង្គ-អដ្ឋកថា • Mahāvibhaṅga-aṭṭhakathā / ១. អាវសថបិណ្ឌសិក្ខាបទវណ្ណនា • 1. Āvasathapiṇḍasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ១. អាវសថបិណ្ឌសិក្ខាបទវណ្ណនា • 1. Āvasathapiṇḍasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ១. អាវសថបិណ្ឌសិក្ខាបទវណ្ណនា • 1. Āvasathapiṇḍasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ១. អាវសថបិណ្ឌសិក្ខាបទ-អត្ថយោជនា • 1. Āvasathapiṇḍasikkhāpada-atthayojanā
