| Library / Tipiṭaka / တိပိဋက • Tipiṭaka / ဣတိဝုတ္တကပာဠိ • Itivuttakapāḷi |
၇. အာတာပီသုတ္တံ
7. Ātāpīsuttaṃ
၃၄. ဝုတ္တဉ္ဟေတံ ဘဂဝတာ, ဝုတ္တမရဟတာတိ မေ သုတံ –
34. Vuttañhetaṃ bhagavatā, vuttamarahatāti me sutaṃ –
‘‘အနာတာပီ, ဘိက္ခဝေ, ဘိက္ခု အနောတ္တာပီ 1 အဘဗ္ဗော သမ္ဗောဓာယ, အဘဗ္ဗော နိဗ္ဗာနာယ, အဘဗ္ဗော အနုတ္တရသ္သ ယောဂက္ခေမသ္သ အဓိဂမာယ။ အာတာပီ စ ခော, ဘိက္ခဝေ, ဘိက္ခု ဩတ္တာပီ 2 ဘဗ္ဗော သမ္ဗောဓာယ, ဘဗ္ဗော နိဗ္ဗာနာယ, ဘဗ္ဗော အနုတ္တရသ္သ ယောဂက္ခေမသ္သ အဓိဂမာယာ’’တိ။ ဧတမတ္ထံ ဘဂဝာ အဝောစ ။ တတ္ထေတံ ဣတိ ဝုစ္စတိ –
‘‘Anātāpī, bhikkhave, bhikkhu anottāpī 3 abhabbo sambodhāya, abhabbo nibbānāya, abhabbo anuttarassa yogakkhemassa adhigamāya. Ātāpī ca kho, bhikkhave, bhikkhu ottāpī 4 bhabbo sambodhāya, bhabbo nibbānāya, bhabbo anuttarassa yogakkhemassa adhigamāyā’’ti. Etamatthaṃ bhagavā avoca . Tatthetaṃ iti vuccati –
‘‘အနာတာပီ အနောတ္တာပီ၊ ကုသီတော ဟီနဝီရိယော။
‘‘Anātāpī anottāpī, kusīto hīnavīriyo;
ယော ထီနမိဒ္ဓဗဟုလော၊ အဟိရီကော အနာဒရော။
Yo thīnamiddhabahulo, ahirīko anādaro;
အဘဗ္ဗော တာဒိသော ဘိက္ခု၊ ဖုဋ္ဌုံ သမ္ဗောဓိမုတ္တမံ။
Abhabbo tādiso bhikkhu, phuṭṭhuṃ sambodhimuttamaṃ.
‘‘ယော စ သတိမာ နိပကော ဈာယီ၊ အာတာပီ ဩတ္တာပီ စ အပ္ပမတ္တော။
‘‘Yo ca satimā nipako jhāyī, ātāpī ottāpī ca appamatto;
သံယောဇနံ ဇာတိဇရာယ ဆေတ္ဝာ၊ ဣဓေဝ သမ္ဗောဓိမနုတ္တရံ ဖုသေ’’တိ။
Saṃyojanaṃ jātijarāya chetvā, idheva sambodhimanuttaraṃ phuse’’ti.
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ။ သတ္တမံ။
Ayampi attho vutto bhagavatā, iti me sutanti. Sattamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ဣတိဝုတ္တက-အဋ္ဌကထာ • Itivuttaka-aṭṭhakathā / ၇. အာတာပီသုတ္တဝဏ္ဏနာ • 7. Ātāpīsuttavaṇṇanā
