| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৭. আতাপীসুত্তং
7. Ātāpīsuttaṃ
৩৪. ৰুত্তঞ্হেতং ভগৰতা, ৰুত্তমরহতাতি মে সুতং –
34. Vuttañhetaṃ bhagavatā, vuttamarahatāti me sutaṃ –
‘‘অনাতাপী, ভিক্খৰে, ভিক্খু অনোত্তাপী 1 অভব্বো সম্বোধায, অভব্বো নিব্বানায, অভব্বো অনুত্তরস্স যোগক্খেমস্স অধিগমায। আতাপী চ খো, ভিক্খৰে, ভিক্খু ওত্তাপী 2 ভব্বো সম্বোধায, ভব্বো নিব্বানায, ভব্বো অনুত্তরস্স যোগক্খেমস্স অধিগমাযা’’তি। এতমত্থং ভগৰা অৰোচ । তত্থেতং ইতি ৰুচ্চতি –
‘‘Anātāpī, bhikkhave, bhikkhu anottāpī 3 abhabbo sambodhāya, abhabbo nibbānāya, abhabbo anuttarassa yogakkhemassa adhigamāya. Ātāpī ca kho, bhikkhave, bhikkhu ottāpī 4 bhabbo sambodhāya, bhabbo nibbānāya, bhabbo anuttarassa yogakkhemassa adhigamāyā’’ti. Etamatthaṃ bhagavā avoca . Tatthetaṃ iti vuccati –
‘‘অনাতাপী অনোত্তাপী, কুসীতো হীনৰীরিযো।
‘‘Anātāpī anottāpī, kusīto hīnavīriyo;
যো থীনমিদ্ধবহুলো, অহিরীকো অনাদরো।
Yo thīnamiddhabahulo, ahirīko anādaro;
অভব্বো তাদিসো ভিক্খু, ফুট্ঠুং সম্বোধিমুত্তমং॥
Abhabbo tādiso bhikkhu, phuṭṭhuṃ sambodhimuttamaṃ.
‘‘যো চ সতিমা নিপকো ঝাযী, আতাপী ওত্তাপী চ অপ্পমত্তো।
‘‘Yo ca satimā nipako jhāyī, ātāpī ottāpī ca appamatto;
সংযোজনং জাতিজরায ছেত্ৰা, ইধেৰ সম্বোধিমনুত্তরং ফুসে’’তি॥
Saṃyojanaṃ jātijarāya chetvā, idheva sambodhimanuttaraṃ phuse’’ti.
অযম্পি অত্থো ৰুত্তো ভগৰতা, ইতি মে সুতন্তি। সত্তমং।
Ayampi attho vutto bhagavatā, iti me sutanti. Sattamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৭. আতাপীসুত্তৰণ্ণনা • 7. Ātāpīsuttavaṇṇanā
