| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৮. পঠমনকুহনসুত্তং
8. Paṭhamanakuhanasuttaṃ
৩৫. ৰুত্তঞ্হেতং ভগৰতা, ৰুত্তমরহতাতি মে সুতং –
35. Vuttañhetaṃ bhagavatā, vuttamarahatāti me sutaṃ –
‘‘নযিদং, ভিক্খৰে, ব্রহ্মচরিযং ৰুস্সতি জনকুহনত্থং, ন জনলপনত্থং, ন লাভসক্কারসিলোকানিসংসত্থং, ন ‘ইতি মং জনো জানাতূ’তি। অথ খো ইদং, ভিক্খৰে , ব্রহ্মচরিযং ৰুস্সতি সংৰরত্থঞ্চেৰ পহানত্থঞ্চা’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Nayidaṃ, bhikkhave, brahmacariyaṃ vussati janakuhanatthaṃ, na janalapanatthaṃ, na lābhasakkārasilokānisaṃsatthaṃ, na ‘iti maṃ jano jānātū’ti. Atha kho idaṃ, bhikkhave , brahmacariyaṃ vussati saṃvaratthañceva pahānatthañcā’’ti. Etamatthaṃ bhagavā avoca. Tatthetaṃ iti vuccati –
‘‘সংৰরত্থং পহানত্থং, ব্রহ্মচরিযং অনীতিহং।
‘‘Saṃvaratthaṃ pahānatthaṃ, brahmacariyaṃ anītihaṃ;
অদেসযি সো ভগৰা, নিব্বানোগধগামিনং॥
Adesayi so bhagavā, nibbānogadhagāminaṃ.
যে যে তং পটিপজ্জন্তি, যথা বুদ্ধেন দেসিতং।
Ye ye taṃ paṭipajjanti, yathā buddhena desitaṃ;
দুক্খস্সন্তং করিস্সন্তি, সত্থুসাসনকারিনো’’তি॥
Dukkhassantaṃ karissanti, satthusāsanakārino’’ti.
অযম্পি অত্থো ৰুত্তো ভগৰতা, ইতি মে সুতন্তি। অট্ঠমং।
Ayampi attho vutto bhagavatā, iti me sutanti. Aṭṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৮. পঠমনকুহনসুত্তৰণ্ণনা • 8. Paṭhamanakuhanasuttavaṇṇanā
