| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
២២. ពាវីសតិមវគ្គោ
22. Bāvīsatimavaggo
(២១៦) ៩. អាសេវនបច្ចយកថា
(216) 9. Āsevanapaccayakathā
៩០៣. នត្ថិ កាចិ អាសេវនបច្ចយតាតិ? អាមន្តា។ ននុ វុត្តំ ភគវតា – ‘‘បាណាតិបាតោ, ភិក្ខវេ, អាសេវិតោ ភាវិតោ ពហុលីកតោ និរយសំវត្តនិកោ តិរច្ឆានយោនិសំវត្តនិកោ បេត្តិវិសយសំវត្តនិកោ, យោ សព្ពលហុសោ បាណាតិបាតស្ស វិបាកោ មនុស្សភូតស្ស អប្បាយុកសំវត្តនិកោ ហោតី’’តិ 1។ អត្ថេវ សុត្តន្តោតិ? អាមន្តា។ តេន ហិ អត្ថិ កាចិ អាសេវនបច្ចយតាតិ។
903. Natthi kāci āsevanapaccayatāti? Āmantā. Nanu vuttaṃ bhagavatā – ‘‘pāṇātipāto, bhikkhave, āsevito bhāvito bahulīkato nirayasaṃvattaniko tiracchānayonisaṃvattaniko pettivisayasaṃvattaniko, yo sabbalahuso pāṇātipātassa vipāko manussabhūtassa appāyukasaṃvattaniko hotī’’ti 2. Attheva suttantoti? Āmantā. Tena hi atthi kāci āsevanapaccayatāti.
នត្ថិ កាចិ អាសេវនបច្ចយតាតិ? អាមន្តា។ ននុ វុត្តំ ភគវតា – ‘‘អទិន្នាទានំ, ភិក្ខវេ, អាសេវិតំ ភាវិតំ ពហុលីកតំ និរយសំវត្តនិកំ តិរច្ឆានយោនិសំវត្តនិកំ បេត្តិវិសយសំវត្តនិកំ, យោ សព្ពលហុសោ អទិន្នាទានស្ស វិបាកោ មនុស្សភូតស្ស ភោគព្យសនសំវត្តនិកោ ហោតិ…បេ.… យោ សព្ពលហុសោ កាមេសុមិច្ឆាចារស្ស វិបាកោ មនុស្សភូតស្ស សបត្តវេរសំវត្តនិកោ ហោតិ…បេ.… យោ សព្ពលហុសោ មុសាវាទស្ស វិបាកោ មនុស្សភូតស្ស អព្ភូតព្ភក្ខានសំវត្តនិកោ ហោតិ…បេ.… យោ សព្ពលហុសោ បិសុណាយ វាចាយ វិបាកោ មនុស្សភូតស្ស មិត្តេហិ ភេទនសំវត្តនិកោ ហោតិ…បេ.… យោ សព្ពលហុសោ ផរុសាយ វាចាយ វិបាកោ មនុស្សភូតស្ស អមនាបសទ្ទសំវត្តនិកោ ហោតិ…បេ.… យោ សព្ពលហុសោ សម្ផប្បលាបស្ស វិបាកោ មនុស្សភូតស្ស អនាទេយ្យវាចាសំវត្តនិកោ ហោតិ, សុរាមេរយបានំ, ភិក្ខវេ, អាសេវិតំ…បេ.… យោ សព្ពលហុសោ សុរាមេរយបានស្ស វិបាកោ មនុស្សភូតស្ស ឧម្មត្តកសំវត្តនិកោ ហោតី’’តិ 3! អត្ថេវ សុត្តន្តោតិ? អាមន្តា។ តេន ហិ អត្ថិ កាចិ អាសេវនបច្ចយតាតិ។
Natthi kāci āsevanapaccayatāti? Āmantā. Nanu vuttaṃ bhagavatā – ‘‘adinnādānaṃ, bhikkhave, āsevitaṃ bhāvitaṃ bahulīkataṃ nirayasaṃvattanikaṃ tiracchānayonisaṃvattanikaṃ pettivisayasaṃvattanikaṃ, yo sabbalahuso adinnādānassa vipāko manussabhūtassa bhogabyasanasaṃvattaniko hoti…pe… yo sabbalahuso kāmesumicchācārassa vipāko manussabhūtassa sapattaverasaṃvattaniko hoti…pe… yo sabbalahuso musāvādassa vipāko manussabhūtassa abbhūtabbhakkhānasaṃvattaniko hoti…pe… yo sabbalahuso pisuṇāya vācāya vipāko manussabhūtassa mittehi bhedanasaṃvattaniko hoti…pe… yo sabbalahuso pharusāya vācāya vipāko manussabhūtassa amanāpasaddasaṃvattaniko hoti…pe… yo sabbalahuso samphappalāpassa vipāko manussabhūtassa anādeyyavācāsaṃvattaniko hoti, surāmerayapānaṃ, bhikkhave, āsevitaṃ…pe… yo sabbalahuso surāmerayapānassa vipāko manussabhūtassa ummattakasaṃvattaniko hotī’’ti 4! Attheva suttantoti? Āmantā. Tena hi atthi kāci āsevanapaccayatāti.
៩០៤. នត្ថិ កាចិ អាសេវនបច្ចយតាតិ? អាមន្តា។ ននុ វុត្តំ ភគវតា – ‘‘មិច្ឆាទិដ្ឋិ, ភិក្ខវេ, អាសេវិតា ភាវិតា ពហុលីកតា និរយសំវត្តនិកា តិរច្ឆានយោនិសំវត្តនិកា បេត្តិវិសយសំវត្តនិកា’’តិ។ អត្ថេវ សុត្តន្តោតិ? អាមន្តា។ តេន ហិ អត្ថិ កាចិ អាសេវនបច្ចយតាតិ។
904. Natthi kāci āsevanapaccayatāti? Āmantā. Nanu vuttaṃ bhagavatā – ‘‘micchādiṭṭhi, bhikkhave, āsevitā bhāvitā bahulīkatā nirayasaṃvattanikā tiracchānayonisaṃvattanikā pettivisayasaṃvattanikā’’ti. Attheva suttantoti? Āmantā. Tena hi atthi kāci āsevanapaccayatāti.
នត្ថិ កាចិ អាសេវនបច្ចយតាតិ? អាមន្តា។ ននុ វុត្តំ ភគវតា – ‘‘មិច្ឆាសង្កប្បោ…បេ.… មិច្ឆាសមាធិ, ភិក្ខវេ, អាសេវិតោ ភាវិតោ…បេ.… បេត្តិវិសយសំវត្តនិកោ’’តិ! អត្ថេវ សុត្តន្តោតិ ? អាមន្តា។ តេន ហិ អត្ថិ កាចិ អាសេវនបច្ចយតាតិ។
Natthi kāci āsevanapaccayatāti? Āmantā. Nanu vuttaṃ bhagavatā – ‘‘micchāsaṅkappo…pe… micchāsamādhi, bhikkhave, āsevito bhāvito…pe… pettivisayasaṃvattaniko’’ti! Attheva suttantoti ? Āmantā. Tena hi atthi kāci āsevanapaccayatāti.
៩០៥. នត្ថិ កាចិ អាសេវនបច្ចយតាតិ? អាមន្តា។ ននុ វុត្តំ ភគវតា – ‘‘សម្មាទិដ្ឋិ, ភិក្ខវេ, អាសេវិតា ភាវិតា ពហុលីកតា អមតោគធា ហោតិ អមតបរាយនា អមតបរិយោសានា’’តិ! អត្ថេវ សុត្តន្តោតិ? អាមន្តា។ តេន ហិ អត្ថិ កាចិ អាសេវនបច្ចយតាតិ។
905. Natthi kāci āsevanapaccayatāti? Āmantā. Nanu vuttaṃ bhagavatā – ‘‘sammādiṭṭhi, bhikkhave, āsevitā bhāvitā bahulīkatā amatogadhā hoti amataparāyanā amatapariyosānā’’ti! Attheva suttantoti? Āmantā. Tena hi atthi kāci āsevanapaccayatāti.
នត្ថិ កាចិ អាសេវនបច្ចយតាតិ? អាមន្តា។ ននុ វុត្តំ ភគវតា – ‘‘សម្មាសង្កប្បោ, ភិក្ខវេ, អាសេវិតោ ភាវិតោ ពហុលីកតោ…បេ.… សម្មាសមាធិ, ភិក្ខវេ, អាសេវិតោ ភាវិតោ ពហុលីកតោ អមតោគធោ ហោតិ អមតបរាយនោ អមតបរិយោសានោ’’តិ អត្ថេវ សុត្តន្តោតិ, អាមន្តា។ តេន ហិ អត្ថិ កាចិ អាសេវនបច្ចយតាតិ។
Natthi kāci āsevanapaccayatāti? Āmantā. Nanu vuttaṃ bhagavatā – ‘‘sammāsaṅkappo, bhikkhave, āsevito bhāvito bahulīkato…pe… sammāsamādhi, bhikkhave, āsevito bhāvito bahulīkato amatogadho hoti amataparāyano amatapariyosāno’’ti attheva suttantoti, āmantā. Tena hi atthi kāci āsevanapaccayatāti.
អាសេវនបច្ចយកថា និដ្ឋិតា។
Āsevanapaccayakathā niṭṭhitā.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៩. អាសេវនបច្ចយកថាវណ្ណនា • 9. Āsevanapaccayakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៩. អាសេវនបច្ចយកថាវណ្ណនា • 9. Āsevanapaccayakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៩. អាសេវនបច្ចយកថាវណ្ណនា • 9. Āsevanapaccayakathāvaṇṇanā
