| Library / Tipiṭaka / តិបិដក • Tipiṭaka / បញ្ចបករណ-អដ្ឋកថា • Pañcapakaraṇa-aṭṭhakathā |
១០. អសញ្ញសត្តុបិកាកថាវណ្ណនា
10. Asaññasattupikākathāvaṇṇanā
៧៣៥. ឥទានិ អសញ្ញសត្តុបិកាកថា នាម ហោតិ។ តត្ថ សញ្ញាវិរាគវសេន បវត្តភាវនា អសញ្ញសមាបត្តិបិ និរោធសមាបត្តិបិ សញ្ញាវេទយិតនិរោធសមាបត្តិ នាម។ ឥតិ ទ្វេ សញ្ញាវេទយិតនិរោធសមាបត្តិយោ លោកិយា ច លោកុត្តរា ច។ តត្ថ លោកិយា បុថុជ្ជនស្ស អសញ្ញសត្តុបិកា ហោតិ, លោកុត្តរា អរិយានំ, សា ច នាសញ្ញសត្តុបិកា។ ឥមំ បន វិភាគំ អកត្វា អវិសេសេន សញ្ញាវេទយិតនិរោធសមាបត្តិ អសញ្ញសត្តុបិកាតិ យេសំ លទ្ធិ, សេយ្យថាបិ ហេតុវាទានំ; តេ សន្ធាយ បុច្ឆា សកវាទិស្ស, បដិញ្ញា ឥតរស្ស។ អថ នំ យស្មា អសញ្ញសមាបត្តិំ សមាបន្នស្ស អលោភាទយោ អត្ថិ, ន និរោធសមាបត្តិំ, តស្មា តេសំ វសេន ចោទេតុំ អត្ថីតិអាទិមាហ។
735. Idāni asaññasattupikākathā nāma hoti. Tattha saññāvirāgavasena pavattabhāvanā asaññasamāpattipi nirodhasamāpattipi saññāvedayitanirodhasamāpatti nāma. Iti dve saññāvedayitanirodhasamāpattiyo lokiyā ca lokuttarā ca. Tattha lokiyā puthujjanassa asaññasattupikā hoti, lokuttarā ariyānaṃ, sā ca nāsaññasattupikā. Imaṃ pana vibhāgaṃ akatvā avisesena saññāvedayitanirodhasamāpatti asaññasattupikāti yesaṃ laddhi, seyyathāpi hetuvādānaṃ; te sandhāya pucchā sakavādissa, paṭiññā itarassa. Atha naṃ yasmā asaññasamāpattiṃ samāpannassa alobhādayo atthi, na nirodhasamāpattiṃ, tasmā tesaṃ vasena codetuṃ atthītiādimāha.
៧៣៦. ឥធាបិ អសញ្ញីតិ បញ្ហេ ឥធ សញ្ញាវិរាគវសេន សមាបន្នត្តា អសញ្ញិតា អនុញ្ញាតា, តត្រាបិ អសញ្ញសត្តេនេវ។ តស្មា ឥមំ បដិញ្ញំ គហេត្វា លទ្ធិំ បតិដ្ឋបេន្តេន ឆលេន បតិដ្ឋាបិតា ហោតិ។ ឥធ វា និរោធសមាបត្តិំ សន្ធាយ អសញ្ញិតា អនុញ្ញាតា។ តត្រាបិ ឥតោ ចុតស្ស អនាគាមិនោ និរោធសមាបត្តិមេវ តស្មាបិ ឥមាយ បដិញ្ញាយ បតិដ្ឋាបិតា លទ្ធិ អប្បតិដ្ឋិតាយេវាតិ។
736. Idhāpi asaññīti pañhe idha saññāvirāgavasena samāpannattā asaññitā anuññātā, tatrāpi asaññasatteneva. Tasmā imaṃ paṭiññaṃ gahetvā laddhiṃ patiṭṭhapentena chalena patiṭṭhāpitā hoti. Idha vā nirodhasamāpattiṃ sandhāya asaññitā anuññātā. Tatrāpi ito cutassa anāgāmino nirodhasamāpattimeva tasmāpi imāya paṭiññāya patiṭṭhāpitā laddhi appatiṭṭhitāyevāti.
អសញ្ញសត្តុបិកាកថាវណ្ណនា។
Asaññasattupikākathāvaṇṇanā.
Related texts:
តិបិដក (មូល) • Tipiṭaka (Mūla) / អភិធម្មបិដក • Abhidhammapiṭaka / កថាវត្ថុបាឡិ • Kathāvatthupāḷi / (១៥៤) ១០. អសញ្ញសត្តុបិកកថា • (154) 10. Asaññasattupikakathā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ១០. អសញ្ញសត្តុបិកាកថាវណ្ណនា • 10. Asaññasattupikākathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ១០. អសញ្ញសត្តុបិកាកថាវណ្ណនា • 10. Asaññasattupikākathāvaṇṇanā
