១៣. អសង្គហិតេនសម្បយុត្តវិប្បយុត្តបទនិទ្ទេសោ

13. Asaṅgahitenasampayuttavippayuttapadaniddeso

៤៤៨. រូបក្ខន្ធេន យេ ធម្មា ខន្ធសង្គហេន អសង្គហិតា អាយតនសង្គហេន អសង្គហិតា ធាតុសង្គហេន អសង្គហិតា, តេ ធម្មា កតិហិ ខន្ធេហិ កតិហាយតនេហិ កតិហិ ធាតូហិ សម្បយុត្តា? តេ ធម្មា តីហិ ខន្ធេហិ សម្បយុត្តា; ឯកេនាយតនេន ឯកាយ ធាតុយា កេហិចិ សម្បយុត្តា។ កតិហិ វិប្បយុត្តា? ឯកេន ខន្ធេន ទសហាយតនេហិ ទសហិ ធាតូហិ វិប្បយុត្តា; ឯកេនាយតនេន ឯកាយ ធាតុយា កេហិចិ វិប្បយុត្តា។

448. Rūpakkhandhena ye dhammā khandhasaṅgahena asaṅgahitā āyatanasaṅgahena asaṅgahitā dhātusaṅgahena asaṅgahitā, te dhammā katihi khandhehi katihāyatanehi katihi dhātūhi sampayuttā? Te dhammā tīhi khandhehi sampayuttā; ekenāyatanena ekāya dhātuyā kehici sampayuttā. Katihi vippayuttā? Ekena khandhena dasahāyatanehi dasahi dhātūhi vippayuttā; ekenāyatanena ekāya dhātuyā kehici vippayuttā.

៤៤៩. ធម្មាយតនេន យេ ធម្មា… ធម្មធាតុយា យេ ធម្មា… ឥត្ថិន្ទ្រិយេន យេ ធម្មា… បុរិសិន្ទ្រិយេន យេ ធម្មា… ជីវិតិន្ទ្រិយេន យេ ធម្មា… វិញ្ញាណបច្ចយា នាមរូបេន យេ ធម្មា… អសញ្ញាភវេន យេ ធម្មា… ឯកវោការភវេន យេ ធម្មា… ជាតិយា យេ ធម្មា… ជរាយ យេ ធម្មា… មរណេន យេ ធម្មា ខន្ធសង្គហេន អសង្គហិតា អាយតនសង្គហេន អសង្គហិតា ធាតុសង្គហេន អសង្គហិតា…បេ.… តេ ធម្មា តីហិ ខន្ធេហិ សម្បយុត្តា; ឯកេនាយតនេន ឯកាយ ធាតុយា កេហិចិ សម្បយុត្តា។ កតិហិ វិប្បយុត្តា? ឯកេន ខន្ធេន ទសហាយតនេហិ ទសហិ ធាតូហិ វិប្បយុត្តា; ឯកេនាយតនេន ឯកាយ ធាតុយា កេហិចិ វិប្បយុត្តា។

449. Dhammāyatanena ye dhammā… dhammadhātuyā ye dhammā… itthindriyena ye dhammā… purisindriyena ye dhammā… jīvitindriyena ye dhammā… viññāṇapaccayā nāmarūpena ye dhammā… asaññābhavena ye dhammā… ekavokārabhavena ye dhammā… jātiyā ye dhammā… jarāya ye dhammā… maraṇena ye dhammā khandhasaṅgahena asaṅgahitā āyatanasaṅgahena asaṅgahitā dhātusaṅgahena asaṅgahitā…pe… te dhammā tīhi khandhehi sampayuttā; ekenāyatanena ekāya dhātuyā kehici sampayuttā. Katihi vippayuttā? Ekena khandhena dasahāyatanehi dasahi dhātūhi vippayuttā; ekenāyatanena ekāya dhātuyā kehici vippayuttā.

៤៥០. អរូបភវេន យេ ធម្មា… នេវសញ្ញានាសញ្ញាភវេន យេ ធម្មា… ចតុវោការភវេន យេ ធម្មា… ឥទ្ធិបាទេន យេ ធម្មា ខន្ធសង្គហេន អសង្គហិតា អាយតនសង្គហេន អសង្គហិតា ធាតុសង្គហេន អសង្គហិតា , តេ ធម្មា កតិហិ ខន្ធេហិ កតិហាយតនេហិ កតិហិ ធាតូហិ សម្បយុត្តាតិ ? នត្ថិ? កតិហិ វិប្បយុត្តា? ចតូហិ ខន្ធេហិ ឯកេនាយតនេន សត្តហិ ធាតូហិ វិប្បយុត្តា; ឯកេនាយតនេន ឯកាយ ធាតុយា កេហិចិ វិប្បយុត្តា។

450. Arūpabhavena ye dhammā… nevasaññānāsaññābhavena ye dhammā… catuvokārabhavena ye dhammā… iddhipādena ye dhammā khandhasaṅgahena asaṅgahitā āyatanasaṅgahena asaṅgahitā dhātusaṅgahena asaṅgahitā , te dhammā katihi khandhehi katihāyatanehi katihi dhātūhi sampayuttāti ? Natthi? Katihi vippayuttā? Catūhi khandhehi ekenāyatanena sattahi dhātūhi vippayuttā; ekenāyatanena ekāya dhātuyā kehici vippayuttā.

៤៥១. កុសលេហិ ធម្មេហិ យេ ធម្មា… អកុសលេហិ ធម្មេហិ យេ ធម្មា… សុខាយ វេទនាយ សម្បយុត្តេហិ ធម្មេហិ យេ ធម្មា… ទុក្ខាយ វេទនាយ សម្បយុត្តេហិ ធម្មេហិ យេ ធម្មា… អទុក្ខមសុខាយ វេទនាយ សម្បយុត្តេហិ ធម្មេហិ យេ ធម្មា… វិបាកេហិ ធម្មេហិ យេ ធម្មា… វិបាកធម្មធម្មេហិ យេ ធម្មា… អនុបាទិន្នអនុបាទានិយេហិ ធម្មេហិ យេ ធម្មា… សំកិលិដ្ឋសំកិលេសិកេហិ ធម្មេហិ យេ ធម្មា… អសំកិលិដ្ឋអសំកិលេសិកេហិ ធម្មេហិ យេ ធម្មា… សវិតក្កសវិចារេហិ ធម្មេហិ យេ ធម្មា… អវិតក្កវិចារមត្តេហិ ធម្មេហិ យេ ធម្មា… បីតិសហគតេហិ ធម្មេហិ យេ ធម្មា… សុខសហគតេហិ ធម្មេហិ យេ ធម្មា… ឧបេក្ខាសហគតេហិ ធម្មេហិ យេ ធម្មា… ទស្សនេន បហាតព្ពេហិ ធម្មេហិ យេ ធម្មា… ភាវនាយ បហាតព្ពេហិ ធម្មេហិ យេ ធម្មា… ទស្សនេន បហាតព្ពហេតុកេហិ ធម្មេហិ យេ ធម្មា… ភាវនាយ បហាតព្ពហេតុកេហិ ធម្មេហិ យេ ធម្មា… អាចយគាមីហិ ធម្មេហិ យេ ធម្មា… អបចយគាមីហិ ធម្មេហិ យេ ធម្មា… សេក្ខេហិ ធម្មេហិ យេ ធម្មា… អសេក្ខេហិ ធម្មេហិ យេ ធម្មា… មហគ្គតេហិ ធម្មេហិ យេ ធម្មា… អប្បមាណេហិ ធម្មេហិ យេ ធម្មា… បរិត្តារម្មណេហិ ធម្មេហិ យេ ធម្មា… មហគ្គតារម្មណេហិ ធម្មេហិ យេ ធម្មា… អប្បមាណារម្មណេហិ ធម្មេហិ យេ ធម្មា… ហីនេហិ ធម្មេហិ យេ ធម្មា… បណីតេហិ ធម្មេហិ យេ ធម្មា… មិច្ឆត្តនិយតេហិ ធម្មេហិ យេ ធម្មា… សម្មត្តនិយតេហិ ធម្មេហិ យេ ធម្មា… មគ្គារម្មណេហិ ធម្មេហិ យេ ធម្មា… មគ្គហេតុកេហិ ធម្មេហិ យេ ធម្មា… មគ្គាធិបតីហិ ធម្មេហិ យេ ធម្មា… អតីតារម្មណេហិ ធម្មេហិ យេ ធម្មា… អនាគតារម្មណេហិ ធម្មេហិ យេ ធម្មា… បច្ចុប្បន្នារម្មណេហិ ធម្មេហិ យេ ធម្មា… អជ្ឈត្តារម្មណេហិ ធម្មេហិ យេ ធម្មា… ពហិទ្ធារម្មណេហិ ធម្មេហិ យេ ធម្មា… អជ្ឈត្តពហិទ្ធារម្មណេហិ ធម្មេហិ យេ ធម្មា… សហេតុកេហិ ធម្មេហិ យេ ធម្មា… ហេតុសម្បយុត្តេហិ ធម្មេហិ យេ ធម្មា… សហេតុកេហិ ចេវ ន ច ហេតូហិ ធម្មេហិ យេ ធម្មា… ហេតុសម្បយុត្តេហិ ចេវ ន ច ហេតូហិ ធម្មេហិ យេ ធម្មា… ន ហេតុសហេតុកេហិ ធម្មេហិ យេ ធម្មា ខន្ធសង្គហេន អសង្គហិតា អាយតនសង្គហេន អសង្គហិតា ធាតុសង្គហេន អសង្គហិតា, តេ ធម្មា កតិហិ ខន្ធេហិ កតិហាយតនេហិ កតិហិ ធាតូហិ សម្បយុត្តាតិ? នត្ថិ។ កតិហិ វិប្បយុត្តា? ចតូហិ ខន្ធេហិ ឯកេនាយតនេន សត្តហិ ធាតូហិ វិប្បយុត្តា; ឯកេនាយតនេន ឯកាយ ធាតុយា កេហិចិ វិប្បយុត្តា។

451. Kusalehi dhammehi ye dhammā… akusalehi dhammehi ye dhammā… sukhāya vedanāya sampayuttehi dhammehi ye dhammā… dukkhāya vedanāya sampayuttehi dhammehi ye dhammā… adukkhamasukhāya vedanāya sampayuttehi dhammehi ye dhammā… vipākehi dhammehi ye dhammā… vipākadhammadhammehi ye dhammā… anupādinnaanupādāniyehi dhammehi ye dhammā… saṃkiliṭṭhasaṃkilesikehi dhammehi ye dhammā… asaṃkiliṭṭhaasaṃkilesikehi dhammehi ye dhammā… savitakkasavicārehi dhammehi ye dhammā… avitakkavicāramattehi dhammehi ye dhammā… pītisahagatehi dhammehi ye dhammā… sukhasahagatehi dhammehi ye dhammā… upekkhāsahagatehi dhammehi ye dhammā… dassanena pahātabbehi dhammehi ye dhammā… bhāvanāya pahātabbehi dhammehi ye dhammā… dassanena pahātabbahetukehi dhammehi ye dhammā… bhāvanāya pahātabbahetukehi dhammehi ye dhammā… ācayagāmīhi dhammehi ye dhammā… apacayagāmīhi dhammehi ye dhammā… sekkhehi dhammehi ye dhammā… asekkhehi dhammehi ye dhammā… mahaggatehi dhammehi ye dhammā… appamāṇehi dhammehi ye dhammā… parittārammaṇehi dhammehi ye dhammā… mahaggatārammaṇehi dhammehi ye dhammā… appamāṇārammaṇehi dhammehi ye dhammā… hīnehi dhammehi ye dhammā… paṇītehi dhammehi ye dhammā… micchattaniyatehi dhammehi ye dhammā… sammattaniyatehi dhammehi ye dhammā… maggārammaṇehi dhammehi ye dhammā… maggahetukehi dhammehi ye dhammā… maggādhipatīhi dhammehi ye dhammā… atītārammaṇehi dhammehi ye dhammā… anāgatārammaṇehi dhammehi ye dhammā… paccuppannārammaṇehi dhammehi ye dhammā… ajjhattārammaṇehi dhammehi ye dhammā… bahiddhārammaṇehi dhammehi ye dhammā… ajjhattabahiddhārammaṇehi dhammehi ye dhammā… sahetukehi dhammehi ye dhammā… hetusampayuttehi dhammehi ye dhammā… sahetukehi ceva na ca hetūhi dhammehi ye dhammā… hetusampayuttehi ceva na ca hetūhi dhammehi ye dhammā… na hetusahetukehi dhammehi ye dhammā khandhasaṅgahena asaṅgahitā āyatanasaṅgahena asaṅgahitā dhātusaṅgahena asaṅgahitā, te dhammā katihi khandhehi katihāyatanehi katihi dhātūhi sampayuttāti? Natthi. Katihi vippayuttā? Catūhi khandhehi ekenāyatanena sattahi dhātūhi vippayuttā; ekenāyatanena ekāya dhātuyā kehici vippayuttā.

៤៥២. រូបីហិ ធម្មេហិ យេ ធម្មា ខន្ធសង្គហេន អសង្គហិតា អាយតនសង្គហេន អសង្គហិតា ធាតុសង្គហេន អសង្គហិតា… តេ ធម្មា តីហិ ខន្ធេហិ សម្បយុត្តា; ឯកេនាយតនេន ឯកាយ ធាតុយា កេហិចិ សម្បយុត្តា។ កតិហិ វិប្បយុត្តា? ឯកេន ខន្ធេន ទសហាយតនេហិ ទសហិ ធាតូហិ វិប្បយុត្តា ; ឯកេនាយតនេន ឯកាយ ធាតុយា កេហិចិ វិប្បយុត្តា។

452. Rūpīhi dhammehi ye dhammā khandhasaṅgahena asaṅgahitā āyatanasaṅgahena asaṅgahitā dhātusaṅgahena asaṅgahitā… te dhammā tīhi khandhehi sampayuttā; ekenāyatanena ekāya dhātuyā kehici sampayuttā. Katihi vippayuttā? Ekena khandhena dasahāyatanehi dasahi dhātūhi vippayuttā ; ekenāyatanena ekāya dhātuyā kehici vippayuttā.

៤៥៣. អរូបីហិ ធម្មេហិ យេ ធម្មា… លោកុត្តរេហិ ធម្មេហិ យេ ធម្មា… អនាសវេហិ ធម្មេហិ យេ ធម្មា… អាសវសម្បយុត្តេហិ ធម្មេហិ យេ ធម្មា… អាសវវិប្បយុត្តេហិ ចេវ នោ ច អាសវេហិ ធម្មេហិ យេ ធម្មា… អាសវវិប្បយុត្តេហិ អនាសវេហិ ធម្មេហិ យេ ធម្មា… អសំយោជនិយេហិ ធម្មេហិ យេ ធម្មា… អគន្ថនិយេហិ ធម្មេហិ យេ ធម្មា… អនោឃនិយេហិ ធម្មេហិ យេ ធម្មា… អយោគនិយេហិ ធម្មេហិ យេ ធម្មា… អនីវរណិយេហិ ធម្មេហិ យេ ធម្មា… អបរាមដ្ឋេហិ ធម្មេហិ យេ ធម្មា… បរាមាសសម្បយុត្តេហិ ធម្មេហិ យេ ធម្មា… បរាមាសវិប្បយុត្តេហិ អបរាមដ្ឋេហិ ធម្មេហិ យេ ធម្មា… សារម្មណេហិ ធម្មេហិ យេ ធម្មា ខន្ធសង្គហេន អសង្គហិតា អាយតនសង្គហេន អសង្គហិតា ធាតុសង្គហេន អសង្គហិតា, តេ ធម្មា កតិហិ ខន្ធេហិ កតិហាយតនេហិ កតិហិ ធាតូហិ សម្បយុត្តាតិ? នត្ថិ។ កតិហិ វិប្បយុត្តា? ចតូហិ ខន្ធេហិ ឯកេនាយតនេន សត្តហិ ធាតូហិ វិប្បយុត្តា; ឯកេនាយតនេន ឯកាយ ធាតុយា កេហិចិ វិប្បយុត្តា។

453. Arūpīhi dhammehi ye dhammā… lokuttarehi dhammehi ye dhammā… anāsavehi dhammehi ye dhammā… āsavasampayuttehi dhammehi ye dhammā… āsavavippayuttehi ceva no ca āsavehi dhammehi ye dhammā… āsavavippayuttehi anāsavehi dhammehi ye dhammā… asaṃyojaniyehi dhammehi ye dhammā… aganthaniyehi dhammehi ye dhammā… anoghaniyehi dhammehi ye dhammā… ayoganiyehi dhammehi ye dhammā… anīvaraṇiyehi dhammehi ye dhammā… aparāmaṭṭhehi dhammehi ye dhammā… parāmāsasampayuttehi dhammehi ye dhammā… parāmāsavippayuttehi aparāmaṭṭhehi dhammehi ye dhammā… sārammaṇehi dhammehi ye dhammā khandhasaṅgahena asaṅgahitā āyatanasaṅgahena asaṅgahitā dhātusaṅgahena asaṅgahitā, te dhammā katihi khandhehi katihāyatanehi katihi dhātūhi sampayuttāti? Natthi. Katihi vippayuttā? Catūhi khandhehi ekenāyatanena sattahi dhātūhi vippayuttā; ekenāyatanena ekāya dhātuyā kehici vippayuttā.

៤៥៤. អនារម្មណេហិ ធម្មេហិ យេ ធម្មា… នោ ចិត្តេហិ ធម្មេហិ យេ ធម្មា… ចិត្តវិប្បយុត្តេហិ ធម្មេហិ យេ ធម្មា … ចិត្តវិសំសដ្ឋេហិ ធម្មេហិ យេ ធម្មា… ចិត្តសមុដ្ឋានេហិ ធម្មេហិ យេ ធម្មា… ចិត្តសហភូហិ ធម្មេហិ យេ ធម្មា… ចិត្តានុបរិវត្តីហិ ធម្មេហិ យេ ធម្មា… ពាហិរេហិ ធម្មេហិ យេ ធម្មា… ឧបាទាធម្មេហិ យេ ធម្មា ខន្ធសង្គហេន អសង្គហិតា អាយតនសង្គហេន អសង្គហិតា ធាតុសង្គេន អសង្គហិតា, តេ ធម្មា កតិហិ ខន្ធេហិ កតិហាយតនេហិ កតិហិ ធាតូហិ សម្បយុត្តា? តេ ធម្មា តីហិ ខន្ធេហិ សម្បយុត្តា; ឯកេនាយតនេន ឯកាយ ធាតុយា កេហិចិ សម្បយុត្តា។ កតិហិ វិប្បយុត្តា? ឯកេន ខន្ធេន ទសហាយតនេហិ ទសហិ ធាតូហិ វិប្បយុត្តា; ឯកេនាយតនេន ឯកាយ ធាតុយា កេហិចិ វិប្បយុត្តា។

454. Anārammaṇehi dhammehi ye dhammā… no cittehi dhammehi ye dhammā… cittavippayuttehi dhammehi ye dhammā … cittavisaṃsaṭṭhehi dhammehi ye dhammā… cittasamuṭṭhānehi dhammehi ye dhammā… cittasahabhūhi dhammehi ye dhammā… cittānuparivattīhi dhammehi ye dhammā… bāhirehi dhammehi ye dhammā… upādādhammehi ye dhammā khandhasaṅgahena asaṅgahitā āyatanasaṅgahena asaṅgahitā dhātusaṅgena asaṅgahitā, te dhammā katihi khandhehi katihāyatanehi katihi dhātūhi sampayuttā? Te dhammā tīhi khandhehi sampayuttā; ekenāyatanena ekāya dhātuyā kehici sampayuttā. Katihi vippayuttā? Ekena khandhena dasahāyatanehi dasahi dhātūhi vippayuttā; ekenāyatanena ekāya dhātuyā kehici vippayuttā.

៤៥៥. អនុបាទានិយេហិ ធម្មេហិ យេ ធម្មា… ឧបាទានសម្បយុត្តេហិ ធម្មេហិ យេ ធម្មា… ឧបាទានសម្បយុត្តេហិ ចេវ នោ ច ឧបាទានេហិ ធម្មេហិ យេ ធម្មា… ឧបាទានវិប្បយុត្តេហិ អនុបាទានិយេហិ ធម្មេហិ យេ ធម្មា… អសំកិលេសិកេហិ ធម្មេហិ យេ ធម្មា… អសំកិលិដ្ឋេហិ ធម្មេហិ យេ ធម្មា… កិលេសសម្បយុត្តេហិ ធម្មេហិ យេ ធម្មា… សំកិលិដ្ឋេហិ ចេវ នោ ច កិលេសេហិ ធម្មេហិ យេ ធម្មា… កិលេសសម្បយុត្តេហិ ចេវ នោ ច កិលេសេហិ ធម្មេហិ យេ ធម្មា… កិលេសវិប្បយុត្តេហិ អសំកិលេសិកេហិ ធម្មេហិ យេ ធម្មា… ទស្សនេន បហាតព្ពេហិ ធម្មេហិ យេ ធម្មា… ភាវនាយ បហាតព្ពេហិ ធម្មេហិ យេ ធម្មា… ទស្សនេន បហាតព្ពហេតុកេហិ ធម្មេហិ យេ ធម្មា… ភាវនាយ បហាតព្ពហេតុកេហិ ធម្មេហិ យេ ធម្មា… សវិតក្កេហិ ធម្មេហិ យេ ធម្មា… សវិចារេហិ ធម្មេហិ យេ ធម្មា… សប្បីតិកេហិ ធម្មេហិ យេ ធម្មា… បីតិសហគតេហិ ធម្មេហិ យេ ធម្មា… សុខសហគតេហិ ធម្មេហិ យេ ធម្មា… ឧបេក្ខាសហគតេហិ ធម្មេហិ យេ ធម្មា… ន កាមាវចរេហិ ធម្មេហិ យេ ធម្មា… រូបាវចរេហិ ធម្មេហិ យេ ធម្មា… អរូបាវចរេហិ ធម្មេហិ យេ ធម្មា… អបរិយាបន្នេហិ ធម្មេហិ យេ ធម្មា… និយ្យានិកេហិ ធម្មេហិ យេ ធម្មា … និយតេហិ ធម្មេហិ យេ ធម្មា… អនុត្តរេហិ ធម្មេហិ យេ ធម្មា… សរណេហិ ធម្មេហិ យេ ធម្មា ខន្ធសង្គហេន អសង្គហិតា អាយតនសង្គហេន អសង្គហិតា ធាតុសង្គហេន អសង្គហិតា, តេ ធម្មា កតិហិ ខន្ធេហិ កតិហាយតនេហិ កតិហិ ធាតូហិ សម្បយុត្តាតិ? នត្ថិ។ កតិហិ វិប្បយុត្តា? ចតូហិ ខន្ធេហិ ឯកេនាយតនេន សត្តហិ ធាតូហិ វិប្បយុត្តា; ឯកេនាយតនេន ឯកាយ ធាតុយា កេហិចិ វិប្បយុត្តា។

455. Anupādāniyehi dhammehi ye dhammā… upādānasampayuttehi dhammehi ye dhammā… upādānasampayuttehi ceva no ca upādānehi dhammehi ye dhammā… upādānavippayuttehi anupādāniyehi dhammehi ye dhammā… asaṃkilesikehi dhammehi ye dhammā… asaṃkiliṭṭhehi dhammehi ye dhammā… kilesasampayuttehi dhammehi ye dhammā… saṃkiliṭṭhehi ceva no ca kilesehi dhammehi ye dhammā… kilesasampayuttehi ceva no ca kilesehi dhammehi ye dhammā… kilesavippayuttehi asaṃkilesikehi dhammehi ye dhammā… dassanena pahātabbehi dhammehi ye dhammā… bhāvanāya pahātabbehi dhammehi ye dhammā… dassanena pahātabbahetukehi dhammehi ye dhammā… bhāvanāya pahātabbahetukehi dhammehi ye dhammā… savitakkehi dhammehi ye dhammā… savicārehi dhammehi ye dhammā… sappītikehi dhammehi ye dhammā… pītisahagatehi dhammehi ye dhammā… sukhasahagatehi dhammehi ye dhammā… upekkhāsahagatehi dhammehi ye dhammā… na kāmāvacarehi dhammehi ye dhammā… rūpāvacarehi dhammehi ye dhammā… arūpāvacarehi dhammehi ye dhammā… apariyāpannehi dhammehi ye dhammā… niyyānikehi dhammehi ye dhammā … niyatehi dhammehi ye dhammā… anuttarehi dhammehi ye dhammā… saraṇehi dhammehi ye dhammā khandhasaṅgahena asaṅgahitā āyatanasaṅgahena asaṅgahitā dhātusaṅgahena asaṅgahitā, te dhammā katihi khandhehi katihāyatanehi katihi dhātūhi sampayuttāti? Natthi. Katihi vippayuttā? Catūhi khandhehi ekenāyatanena sattahi dhātūhi vippayuttā; ekenāyatanena ekāya dhātuyā kehici vippayuttā.

រូបញ្ច ធម្មាយតនំ ធម្មធាតុ, ឥត្ថិបុមំ ជីវិតំ នាមរូបំ;

Rūpañca dhammāyatanaṃ dhammadhātu, itthipumaṃ jīvitaṃ nāmarūpaṃ;

ទ្វេ ភវា ជាតិជរា មច្ចុរូបំ, អនារម្មណំ នោ ចិត្តំ ចិត្តេន វិប្បយុត្តំ។

Dve bhavā jātijarā maccurūpaṃ, anārammaṇaṃ no cittaṃ cittena vippayuttaṃ.

វិសំសដ្ឋំ សមុដ្ឋានសហភុ, អនុបរិវត្តិ ពាហិរំ ឧបាទា;

Visaṃsaṭṭhaṃ samuṭṭhānasahabhu, anuparivatti bāhiraṃ upādā;

ទ្វេ វិសយោ ឯសនយោ សុពុទ្ធោតិ។

Dve visayo esanayo subuddhoti.

អសង្គហិតេនសម្បយុត្តវិប្បយុត្តបទនិទ្ទេសោ តេរសមោ។

Asaṅgahitenasampayuttavippayuttapadaniddeso terasamo.

Next: ១៤. ចុទ្ទសមនយោ • 14. Cuddasamanayo

Related texts:

អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ១៣. តេរសមនយោ អសង្គហិតេនសម្បយុត្តវិប្បយុត្តបទវណ្ណនា • 13. Terasamanayo asaṅgahitenasampayuttavippayuttapadavaṇṇanā

ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ១៣. តេរសមនយោ អសង្គហិតេនសម្បយុត្តវិប្បយុត្តបទវណ្ណនា • 13. Terasamanayo asaṅgahitenasampayuttavippayuttapadavaṇṇanā

ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ១៣. តេរសមនយោ អសង្គហិតេនសម្បយុត្តវិប្បយុត្តបទវណ្ណនា • 13. Terasamanayo asaṅgahitenasampayuttavippayuttapadavaṇṇanā

© 1991-2026 Titi Tudorancea Yoga Bulletin | Titi Tudorancea^® is a Registered Trademark | Terms of use and privacy policy
Contact