| Library / Tipiṭaka / ติปิฎก • Tipiṭaka / ปริวารปาฬิ • Parivārapāḷi |
๔. อสาธารณาทิ
4. Asādhāraṇādi
๓๓๘.
338.
วีสํ เทฺว สตานิ ภิกฺขูนํ สิกฺขาปทานิ;
Vīsaṃ dve satāni bhikkhūnaṃ sikkhāpadāni;
อุเทฺทสํ อาคจฺฉนฺติ อุโปสเถสุ;
Uddesaṃ āgacchanti uposathesu;
ตีณิ สตานิ จตฺตาริ ภิกฺขุนีนํ สิกฺขาปทานิ;
Tīṇi satāni cattāri bhikkhunīnaṃ sikkhāpadāni;
อุเทฺทสํ อาคจฺฉนฺติ อุโปสเถสุฯ
Uddesaṃ āgacchanti uposathesu.
ฉจตฺตารีสา ภิกฺขูนํ, ภิกฺขุนีหิ อสาธารณา;
Chacattārīsā bhikkhūnaṃ, bhikkhunīhi asādhāraṇā;
สตํ ติํสา จ ภิกฺขุนีนํ, ภิกฺขูหิ อสาธารณาฯ
Sataṃ tiṃsā ca bhikkhunīnaṃ, bhikkhūhi asādhāraṇā.
สตํ สตฺตติ ฉเจฺจว, อุภินฺนํ อสาธารณา;
Sataṃ sattati chacceva, ubhinnaṃ asādhāraṇā;
สตํ สตฺตติ จตฺตาริ, อุภินฺนํ สมสิกฺขตาฯ
Sataṃ sattati cattāri, ubhinnaṃ samasikkhatā.
วีสํ เทฺว สตานิ ภิกฺขูนํ สิกฺขาปทานิ;
Vīsaṃ dve satāni bhikkhūnaṃ sikkhāpadāni;
อุเทฺทสํ อาคจฺฉนฺติ อุโปสเถสุ;
Uddesaṃ āgacchanti uposathesu;
เต สุโณหิ ยถาตถํฯ
Te suṇohi yathātathaṃ.
ปาราชิกานิ จตฺตาริ, สงฺฆาทิเสสานิ ภวนฺติ เตรส;
Pārājikāni cattāri, saṅghādisesāni bhavanti terasa;
อนิยตา เทฺว โหนฺติฯ
Aniyatā dve honti.
นิสฺสคฺคิยานิ ติํเสว, เทฺวนวุติ จ ขุทฺทกา;
Nissaggiyāni tiṃseva, dvenavuti ca khuddakā;
จตฺตาโร ปาฎิเทสนียา, ปญฺจสตฺตติ เสขิยาฯ
Cattāro pāṭidesanīyā, pañcasattati sekhiyā.
วีสํ เทฺว สตานิ จิเม โหนฺติ ภิกฺขูนํ สิกฺขาปทานิ;
Vīsaṃ dve satāni cime honti bhikkhūnaṃ sikkhāpadāni;
อุเทฺทสํ อาคจฺฉนฺติ อุโปสเถสุฯ
Uddesaṃ āgacchanti uposathesu.
ตีณิ สตานิ จตฺตาริ, ภิกฺขุนีนํ สิกฺขาปทานิ;
Tīṇi satāni cattāri, bhikkhunīnaṃ sikkhāpadāni;
อุเทฺทสํ อาคจฺฉนฺติ อุโปสเถสุ, เต สุโณหิ ยถาตถํฯ
Uddesaṃ āgacchanti uposathesu, te suṇohi yathātathaṃ.
ปาราชิกานิ อฎฺฐ, สงฺฆาทิเสสานิ ภวนฺติ สตฺตรส;
Pārājikāni aṭṭha, saṅghādisesāni bhavanti sattarasa;
นิสฺสคฺคิยานิ ติํเสว, สตํ สฎฺฐิ ฉ เจว ขุทฺทกานิ ปวุจฺจนฺติฯ
Nissaggiyāni tiṃseva, sataṃ saṭṭhi cha ceva khuddakāni pavuccanti.
อฎฺฐ ปาฎิเทสนียา, ปญฺจสตฺตติ เสขิยา;
Aṭṭha pāṭidesanīyā, pañcasattati sekhiyā;
ตีณิ สตานิ จตฺตาริ จิเม โหนฺติ ภิกฺขุนีนํ สิกฺขาปทานิ;
Tīṇi satāni cattāri cime honti bhikkhunīnaṃ sikkhāpadāni;
อุเทฺทสํ อาคจฺฉนฺติ อุโปสเถสุฯ
Uddesaṃ āgacchanti uposathesu.
ฉจตฺตารีสา ภิกฺขูนํ, ภิกฺขุนีหิ อสาธารณา;
Chacattārīsā bhikkhūnaṃ, bhikkhunīhi asādhāraṇā;
เต สุโณหิ ยถาตถํฯ
Te suṇohi yathātathaṃ.
สงฺฆาทิเสสา, เทฺว อนิยเตหิ อฎฺฐ;
Saṅghādisesā, dve aniyatehi aṭṭha;
นิสฺสคฺคิยานิ ทฺวาทส, เตหิ เต โหนฺติ วีสติฯ
Nissaggiyāni dvādasa, tehi te honti vīsati.
เทฺววีสติ ขุทฺทกา, จตุโร ปาฎิเทสนียา;
Dvevīsati khuddakā, caturo pāṭidesanīyā;
ฉจตฺตารีสา จิเม โหนฺติ, ภิกฺขูนํ ภิกฺขุนีหิ อสาธารณาฯ
Chacattārīsā cime honti, bhikkhūnaṃ bhikkhunīhi asādhāraṇā.
สตํ ติํสา จ ภิกฺขุนีนํ, ภิกฺขูหิ อสาธารณา;
Sataṃ tiṃsā ca bhikkhunīnaṃ, bhikkhūhi asādhāraṇā;
เต สุโณหิ ยถาตถํฯ
Te suṇohi yathātathaṃ.
ปาราชิกานิ จตฺตาริ, สงฺฆมฺหา ทส นิสฺสเร;
Pārājikāni cattāri, saṅghamhā dasa nissare;
นิสฺสคฺคิยานิ ทฺวาทส, ฉนฺนวุติ จ ขุทฺทกา;
Nissaggiyāni dvādasa, channavuti ca khuddakā;
อฎฺฐ ปาฎิเทสนียาฯ
Aṭṭha pāṭidesanīyā.
สตํ ติํสา จิเม โหนฺติ ภิกฺขุนีนํ, ภิกฺขูหิ อสาธารณา;
Sataṃ tiṃsā cime honti bhikkhunīnaṃ, bhikkhūhi asādhāraṇā;
สตํ สตฺตติ ฉเจฺจว, อุภินฺนํ อสาธารณา;
Sataṃ sattati chacceva, ubhinnaṃ asādhāraṇā;
เต สุโณหิ ยถาตถํฯ
Te suṇohi yathātathaṃ.
ปาราชิกานิ จตฺตาริ, สงฺฆาทิเสสานิ ภวนฺติ โสฬส;
Pārājikāni cattāri, saṅghādisesāni bhavanti soḷasa;
อนิยตา เทฺว โหนฺติ, นิสฺสคฺคิยานิ จตุวีสติ;
Aniyatā dve honti, nissaggiyāni catuvīsati;
สตํ อฎฺฐารสา เจว, ขุทฺทกานิ ปวุจฺจนฺติ;
Sataṃ aṭṭhārasā ceva, khuddakāni pavuccanti;
ทฺวาทส ปาฎิเทสนียาฯ
Dvādasa pāṭidesanīyā.
สตํ สตฺตติ ฉเจฺจวิเม โหนฺติ, อุภินฺนํ อสาธารณา;
Sataṃ sattati chaccevime honti, ubhinnaṃ asādhāraṇā;
สตํ สตฺตติ จตฺตาริ, อุภินฺนํ สมสิกฺขตา;
Sataṃ sattati cattāri, ubhinnaṃ samasikkhatā;
เต สุโณหิ ยถาตถํฯ
Te suṇohi yathātathaṃ.
ปาราชิกานิ จตฺตาริ, สงฺฆาทิเสสานิ ภวนฺติ สตฺต;
Pārājikāni cattāri, saṅghādisesāni bhavanti satta;
นิสฺสคฺคิยานิ อฎฺฐารส, สมสตฺตติ ขุทฺทกา;
Nissaggiyāni aṭṭhārasa, samasattati khuddakā;
ปญฺจสตฺตติ เสขิยานิฯ
Pañcasattati sekhiyāni.
สตํ สตฺตติ จตฺตาริ จิเม โหนฺติ, อุภินฺนํ สมสิกฺขตา;
Sataṃ sattati cattāri cime honti, ubhinnaṃ samasikkhatā;
อเฎฺฐ ปาราชิกา เย ทุราสทา, ตาลวตฺถุสมูปมาฯ
Aṭṭhe pārājikā ye durāsadā, tālavatthusamūpamā.
ปณฺฑุปลาโส ปุถุสิลา, สีสจฺฉิโนฺนว โส นโร;
Paṇḍupalāso puthusilā, sīsacchinnova so naro;
ตาโลว มตฺถกจฺฉิโนฺน, อวิรุฬฺหี ภวนฺติ เตฯ
Tālova matthakacchinno, aviruḷhī bhavanti te.
เตวีสติ สงฺฆาทิเสสา, เทฺว อนิยตา;
Tevīsati saṅghādisesā, dve aniyatā;
เทฺว จตฺตารีส นิสฺสคฺคิยา;
Dve cattārīsa nissaggiyā;
อฎฺฐาสีติสตํ ปาจิตฺติยา, ทฺวาทส ปาฎิเทสนียาฯ
Aṭṭhāsītisataṃ pācittiyā, dvādasa pāṭidesanīyā.
ปญฺจสตฺตติ เสขิยา, ตีหิ สมเถหิ สมฺมนฺติ;
Pañcasattati sekhiyā, tīhi samathehi sammanti;
สมฺมุขา จ ปฎิญฺญาย, ติณวตฺถารเกน จฯ
Sammukhā ca paṭiññāya, tiṇavatthārakena ca.
เทฺว อุโปสถา เทฺว ปวารณา;
Dve uposathā dve pavāraṇā;
จตฺตาริ กมฺมานิ ชิเนน เทสิตา;
Cattāri kammāni jinena desitā;
ปเญฺจว อุเทฺทสา จตุโร ภวนฺติ;
Pañceva uddesā caturo bhavanti;
อนญฺญถา อาปตฺติกฺขนฺธา จ ภวนฺติ สตฺตฯ
Anaññathā āpattikkhandhā ca bhavanti satta.
อธิกรณานิ จตฺตาริ สตฺตหิ สมเถหิ สมฺมนฺติ;
Adhikaraṇāni cattāri sattahi samathehi sammanti;
ทฺวีหิ จตูหิ ตีหิ กิจฺจํ เอเกน สมฺมติฯ
Dvīhi catūhi tīhi kiccaṃ ekena sammati.
Related texts:
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / ปริวาร-อฎฺฐกถา • Parivāra-aṭṭhakathā / อสาธารณาทิวณฺณนา • Asādhāraṇādivaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / อสาธารณาทิวณฺณนา • Asādhāraṇādivaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / อสาธารณาทิวณฺณนา • Asādhāraṇādivaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / สตฺตนคเรสุ ปญฺญตฺตสิกฺขาปทวณฺณนา • Sattanagaresu paññattasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / อสาธารณาทิวณฺณนา • Asādhāraṇādivaṇṇanā
