| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
১৬. অরূপধম্মৰৰত্থানদুক্করপঞ্হো
16. Arūpadhammavavatthānadukkarapañho
১৬. রাজা আহ ‘‘ভন্তে নাগসেন, দুক্করং নু খো ভগৰতা কত’’ন্তি? থেরো আহ ‘‘দুক্করং, মহারাজ, ভগৰতা কত’’ন্তি। ‘‘কিং পন, ভন্তে নাগসেন, ভগৰতা দুক্করং কত’’ন্তি। ‘‘দুক্করং, মহারাজ, ভগৰতা কতং ইমেসং অরূপীনং চিত্তচেতসিকানং ধম্মানং একারম্মণে ৰত্তমানানং ৰৰত্থানং অক্খাতং ‘অযং ফস্সো, অযং ৰেদনা, অযং সঞ্ঞা, অযং চেতনা, ইদং চিত্ত’’’ন্তি।
16. Rājā āha ‘‘bhante nāgasena, dukkaraṃ nu kho bhagavatā kata’’nti? Thero āha ‘‘dukkaraṃ, mahārāja, bhagavatā kata’’nti. ‘‘Kiṃ pana, bhante nāgasena, bhagavatā dukkaraṃ kata’’nti. ‘‘Dukkaraṃ, mahārāja, bhagavatā kataṃ imesaṃ arūpīnaṃ cittacetasikānaṃ dhammānaṃ ekārammaṇe vattamānānaṃ vavatthānaṃ akkhātaṃ ‘ayaṃ phasso, ayaṃ vedanā, ayaṃ saññā, ayaṃ cetanā, idaṃ citta’’’nti.
‘‘ওপম্মং করোহী’’তি। ‘‘যথা, মহারাজ, কোচিদেৰ পুরিসো নাৰায মহাসমুদ্দং অজ্ঝোগাহেত্ৰা হত্থপুটেন উদকং গহেত্ৰা জিৰ্হায সাযিত্ৰা জানেয্য নু খো, মহারাজ, সো পুরিসো ‘‘ইদং গঙ্গায উদকং, ইদং যমুনায উদকং, ইদং অচিরৰতিযা উদকং, ইদং সরভুযা উদকং, ইদং মহিযা উদক’’’ন্তি? ‘‘দুক্করং, ভন্তে, জানিতু’’ন্তি। ‘‘ইতো দুক্করতরং খো, মহারাজ, ভগৰতা কতং ইমেসং অরূপীনং চিত্তচেতসিকানং ধম্মানং একারম্মণে ৰত্তমানানং ৰৰত্থানং অক্খাতং ‘অযং ফস্সো, অযং ৰেদনা, অযং সঞ্ঞা, অযং চেতনা, ইদং চিত্ত’’’ন্তি। ‘‘সুট্ঠু, ভন্তে’’তি রাজা অব্ভানুমোদীতি।
‘‘Opammaṃ karohī’’ti. ‘‘Yathā, mahārāja, kocideva puriso nāvāya mahāsamuddaṃ ajjhogāhetvā hatthapuṭena udakaṃ gahetvā jivhāya sāyitvā jāneyya nu kho, mahārāja, so puriso ‘‘idaṃ gaṅgāya udakaṃ, idaṃ yamunāya udakaṃ, idaṃ aciravatiyā udakaṃ, idaṃ sarabhuyā udakaṃ, idaṃ mahiyā udaka’’’nti? ‘‘Dukkaraṃ, bhante, jānitu’’nti. ‘‘Ito dukkarataraṃ kho, mahārāja, bhagavatā kataṃ imesaṃ arūpīnaṃ cittacetasikānaṃ dhammānaṃ ekārammaṇe vattamānānaṃ vavatthānaṃ akkhātaṃ ‘ayaṃ phasso, ayaṃ vedanā, ayaṃ saññā, ayaṃ cetanā, idaṃ citta’’’nti. ‘‘Suṭṭhu, bhante’’ti rājā abbhānumodīti.
অরূপধম্মৰৰত্থানদুক্করপঞ্হো সোল়সমো।
Arūpadhammavavatthānadukkarapañho soḷasamo.
অরূপধম্মৰৰত্থানৰগ্গো সত্তমো।
Arūpadhammavavatthānavaggo sattamo.
ইমস্মিং ৰগ্গে সোল়স পঞ্হা।
Imasmiṃ vagge soḷasa pañhā.
