| Library / Tipiṭaka / திபிடக • Tipiṭaka / பேடகோபதே³ஸபாளி • Peṭakopadesapāḷi |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
கு²த்³த³கனிகாயே
Khuddakanikāye
பேடகோபதே³ஸபாளி
Peṭakopadesapāḷi
1. அரியஸச்சப்பகாஸனபட²மபூ⁴மி
1. Ariyasaccappakāsanapaṭhamabhūmi
நமோ ஸம்மாஸம்பு³த்³தா⁴னங் பரமத்த²த³ஸ்ஸீனங்
Namo sammāsambuddhānaṃ paramatthadassīnaṃ
ஸீலாதி³கு³ணபாரமிப்பத்தானங்.
Sīlādiguṇapāramippattānaṃ.
1. து³வே ஹேதூ து³வே பச்சயா ஸாவகஸ்ஸ ஸம்மாதி³ட்டி²யா உப்பாதா³ய – பரதோ ச கோ⁴ஸோ ஸச்சானுஸந்தி⁴, அஜ்ஜ²த்தஞ்ச யோனிஸோ மனஸிகாரோ. தத்த² கதமோ பரதோ கோ⁴ஸோ? யா பரதோ தே³ஸனா ஓவாதோ³ அனுஸாஸனீ ஸச்சகதா² ஸச்சானுலோமோ. சத்தாரி ஸச்சானி – து³க்க²ங் ஸமுத³யோ நிரோதோ⁴ மக்³கோ³. இமேஸங் சதுன்னங் ஸச்சானங் யா தே³ஸனா ஸந்த³ஸ்ஸனா விவரணா விப⁴ஜனா உத்தானீகிரியா 1 பகாஸனா – அயங் வுச்சதி ஸச்சானுலோமோ கோ⁴ஸோதி.
1. Duve hetū duve paccayā sāvakassa sammādiṭṭhiyā uppādāya – parato ca ghoso saccānusandhi, ajjhattañca yoniso manasikāro. Tattha katamo parato ghoso? Yā parato desanā ovādo anusāsanī saccakathā saccānulomo. Cattāri saccāni – dukkhaṃ samudayo nirodho maggo. Imesaṃ catunnaṃ saccānaṃ yā desanā sandassanā vivaraṇā vibhajanā uttānīkiriyā 2 pakāsanā – ayaṃ vuccati saccānulomo ghosoti.
2. தத்த² கதமோ அஜ்ஜ²த்தங் யோனிஸோ மனஸிகாரோ?
2. Tattha katamo ajjhattaṃ yoniso manasikāro?
அஜ்ஜ²த்தங் யோனிஸோ மனஸிகாரோ நாம யோ யதா²தே³ஸிதே த⁴ம்மே ப³ஹித்³தா⁴ ஆரம்மணங் அனபி⁴னீஹரித்வா யோனிஸோ மனஸிகாரோ – அயங் வுச்சதி யோனிஸோ மனஸிகாரோ.
Ajjhattaṃ yoniso manasikāro nāma yo yathādesite dhamme bahiddhā ārammaṇaṃ anabhinīharitvā yoniso manasikāro – ayaṃ vuccati yoniso manasikāro.
தங்ஆகாரோ யோனிஸோ த்³வாரோ விதி⁴ உபாயோ. யதா² புரிஸோ ஸுக்கே² கட்டே² விக³தஸ்னேஹே ஸுக்கா²ய உத்தராரணியா த²லே அபி⁴மந்த²மானங் ப⁴ப்³போ³ ஜோதிஸ்ஸ அதி⁴க³மாய . தங் கிஸ்ஸ ஹேது. யோனிஸோ அக்³கி³ஸ்ஸ அதி⁴க³மாய. ஏவமேவஸ்ஸ யமித³ங் து³க்க²ஸமுத³யனிரோத⁴மக்³கா³னங் அவிபரீதத⁴ம்மதே³ஸனங் மனஸிகரோதி – அயங் வுச்சதி யோனிஸோ மனஸிகாரோ.
Taṃākāro yoniso dvāro vidhi upāyo. Yathā puriso sukkhe kaṭṭhe vigatasnehe sukkhāya uttarāraṇiyā thale abhimanthamānaṃ bhabbo jotissa adhigamāya . Taṃ kissa hetu. Yoniso aggissa adhigamāya. Evamevassa yamidaṃ dukkhasamudayanirodhamaggānaṃ aviparītadhammadesanaṃ manasikaroti – ayaṃ vuccati yoniso manasikāro.
யதா² திஸ்ஸோ உபமா புப்³பே³ அஸ்ஸுதா ச அஸ்ஸுதபுப்³பா³ ச படிப⁴ந்தி. யோ ஹி கோசி காமேஸு அவீதராகோ³தி…பே॰… து³வே உபமா அயோனிஸோ காதப்³பா³ பச்சி²மேஸு வுத்தங். தத்த² யோ ச பரதோ கோ⁴ஸோ யோ ச அஜ்ஜ²த்தங் யோனிஸோ மனஸிகாரோ – இமே த்³வே பச்சயா. பரதோ கோ⁴ஸேன யா உப்பஜ்ஜதி பஞ்ஞா – அயங் வுச்சதி ஸுதமயீ பஞ்ஞா. யா அஜ்ஜ²த்தங் யோனிஸோ மனஸிகாரேன உப்பஜ்ஜதி பஞ்ஞா – அயங் வுச்சதி சிந்தாமயீ பஞ்ஞாதி. இமா த்³வே பஞ்ஞா வேதி³தப்³பா³. புரிமகா ச த்³வே பச்சயா. இமே த்³வே ஹேதூ த்³வே பச்சயா ஸாவகஸ்ஸ ஸம்மாதி³ட்டி²யா உப்பாதா³ய.
Yathā tisso upamā pubbe assutā ca assutapubbā ca paṭibhanti. Yo hi koci kāmesu avītarāgoti…pe… duve upamā ayoniso kātabbā pacchimesu vuttaṃ. Tattha yo ca parato ghoso yo ca ajjhattaṃ yoniso manasikāro – ime dve paccayā. Parato ghosena yā uppajjati paññā – ayaṃ vuccati sutamayī paññā. Yā ajjhattaṃ yoniso manasikārena uppajjati paññā – ayaṃ vuccati cintāmayī paññāti. Imā dve paññā veditabbā. Purimakā ca dve paccayā. Ime dve hetū dve paccayā sāvakassa sammādiṭṭhiyā uppādāya.
3. தத்த² பரதோ கோ⁴ஸஸ்ஸ ஸச்சானுஸந்தி⁴ஸ்ஸ தே³ஸிதஸ்ஸ அத்த²ங் அவிஜானந்தோ அத்த²ப்படிஸங்வேதீ³ ப⁴விஸ்ஸதீதி நேதங் டா²னங் விஜ்ஜதி. ந ச அத்த²ப்படிஸங்வேதீ³ யோனிஸோ மனஸிகரிஸ்ஸதீதி நேதங் டா²னங் விஜ்ஜதி. பரதோ கோ⁴ஸஸ்ஸ ஸச்சானுஸந்தி⁴ஸ்ஸ தே³ஸிதஸ்ஸ அத்த²ங் விஜானந்தோ அத்த²ப்படிஸங்வேதீ³ ப⁴விஸ்ஸதீதி டா²னமேதங் விஜ்ஜதி. அத்த²ப்படிஸங்வேதீ³ ச யோனிஸோ மனஸிகரிஸ்ஸதீதி டா²னமேதங் விஜ்ஜதி. ஏஸ ஹேது ஏதங் ஆரம்மணங் ஏஸோ உபாயோ ஸாவகஸ்ஸ நிய்யானஸ்ஸ, நத்த²ஞ்ஞோ. ஸோயங் ந ச ஸுத்தஸ்ஸ அத்த²விஜானநாய ஸஹ யுத்தோ நாபி கோ⁴ஸானுயோகே³ன பரதோ கோ⁴ஸஸ்ஸ அத்த²ங் அவிஜானந்தேன ஸக்கா உத்தரிமனுஸ்ஸத⁴ம்மங் அலமரியஞாணத³ஸ்ஸனங் அதி⁴க³ந்துங், தஸ்மா நிப்³பா³யிதுகாமேன ஸுதமயேன அத்தா² பரியேஸிதப்³பா³. தத்த² பரியேஸனாய அயங் அனுபுப்³பீ³ ப⁴வதி ஸோளஸ ஹாரா, பஞ்ச நயா, அட்டா²ரஸ மூலபதா³னி.
3. Tattha parato ghosassa saccānusandhissa desitassa atthaṃ avijānanto atthappaṭisaṃvedī bhavissatīti netaṃ ṭhānaṃ vijjati. Na ca atthappaṭisaṃvedī yoniso manasikarissatīti netaṃ ṭhānaṃ vijjati. Parato ghosassa saccānusandhissa desitassa atthaṃ vijānanto atthappaṭisaṃvedī bhavissatīti ṭhānametaṃ vijjati. Atthappaṭisaṃvedī ca yoniso manasikarissatīti ṭhānametaṃ vijjati. Esa hetu etaṃ ārammaṇaṃ eso upāyo sāvakassa niyyānassa, natthañño. Soyaṃ na ca suttassa atthavijānanāya saha yutto nāpi ghosānuyogena parato ghosassa atthaṃ avijānantena sakkā uttarimanussadhammaṃ alamariyañāṇadassanaṃ adhigantuṃ, tasmā nibbāyitukāmena sutamayena atthā pariyesitabbā. Tattha pariyesanāya ayaṃ anupubbī bhavati soḷasa hārā, pañca nayā, aṭṭhārasa mūlapadāni.
தத்தா²யங் உத்³தா³னகா³தா²
Tatthāyaṃ uddānagāthā
ஸோளஸஹாரா நெத்தீ, பஞ்சனயா ஸாஸனஸ்ஸ பரியெட்டி²;
Soḷasahārā nettī, pañcanayā sāsanassa pariyeṭṭhi;
அட்டா²ரஸமூலபதா³, கச்சாயனகொ³த்தனித்³தி³ட்டா².
Aṭṭhārasamūlapadā, kaccāyanagottaniddiṭṭhā.
4. தத்த² கதமே ஸோளஸஹாரா?
4. Tattha katame soḷasahārā?
தே³ஸனா விசயோ யுத்தி பத³ட்டா²னங் லக்க²ணங் சதுப்³யூஹோ ஆவட்டோ விப⁴த்தி பரிவத்தனோ வேவசனோ பஞ்ஞத்தி ஓதரணோ ஸோத⁴னோ அதி⁴ட்டா²னோ பரிக்கா²ரோ ஸமாரோபனோ – இமே ஸோளஸ ஹாரா.
Desanā vicayo yutti padaṭṭhānaṃ lakkhaṇaṃ catubyūho āvaṭṭo vibhatti parivattano vevacano paññatti otaraṇo sodhano adhiṭṭhāno parikkhāro samāropano – ime soḷasa hārā.
தத்த² உத்³தா³னகா³தா²
Tattha uddānagāthā
சதுப்³யூஹோ ச ஆவட்டோ, விப⁴த்தி பரிவத்தனோ.
Catubyūho ca āvaṭṭo, vibhatti parivattano.
வேவசனோ ச பஞ்ஞத்தி, ஓதரணோ ச ஸோத⁴னோ;
Vevacano ca paññatti, otaraṇo ca sodhano;
5. தத்த² கதமே பஞ்ச நயா?
5. Tattha katame pañca nayā?
நந்தி³யாவட்டோ திபுக்க²லோ ஸீஹவிக்கீளிதோ தி³ஸாலோசனோ அங்குஸோதி.
Nandiyāvaṭṭo tipukkhalo sīhavikkīḷito disālocano aṅkusoti.
தத்த² உத்³தா³னகா³தா²
Tattha uddānagāthā
பட²மோ நந்தி³யாவட்டோ, து³தியோ ச திபுக்க²லோ;
Paṭhamo nandiyāvaṭṭo, dutiyo ca tipukkhalo;
ஸீஹவிக்கீளிதோ நாம, ததியோ ஹோதி ஸோ நயோ.
Sīhavikkīḷito nāma, tatiyo hoti so nayo.
தி³ஸாலோசனமாஹங்ஸு, சதுத்தோ² நயலஞ்ஜகோ;
Disālocanamāhaṃsu, catuttho nayalañjako;
6. தத்த² கதமானி அட்டா²ரஸ மூலபதா³னி?
6. Tattha katamāni aṭṭhārasa mūlapadāni?
அவிஜ்ஜா தண்ஹா லோபோ⁴ தோ³ஸோ மோஹோ ஸுப⁴ஸஞ்ஞா ஸுக²ஸஞ்ஞா நிச்சஸஞ்ஞா அத்தஸஞ்ஞா ஸமதோ² விபஸ்ஸனா அலோபோ⁴ அதோ³ஸோ அமோஹோ அஸுப⁴ஸஞ்ஞா து³க்க²ஸஞ்ஞா அனிச்சஸஞ்ஞா அனத்தஸஞ்ஞா, இமானி அட்டா²ரஸ மூலபதா³னி. தத்த² நவ பதா³னி அகுஸலானி யத்த² ஸப்³ப³ங் அகுஸலங் ஸமோஸரதி. நவ பதா³னி குஸலானி யத்த² ஸப்³ப³ங் குஸலங் ஸமோஸரதி.
Avijjā taṇhā lobho doso moho subhasaññā sukhasaññā niccasaññā attasaññā samatho vipassanā alobho adoso amoho asubhasaññā dukkhasaññā aniccasaññā anattasaññā, imāni aṭṭhārasa mūlapadāni. Tattha nava padāni akusalāni yattha sabbaṃ akusalaṃ samosarati. Nava padāni kusalāni yattha sabbaṃ kusalaṃ samosarati.
கதமானி நவ பதா³னி அகுஸலானி யத்த² ஸப்³ப³ங் அகுஸலங் ஸமோஸரதி?
Katamāni nava padāni akusalāni yattha sabbaṃ akusalaṃ samosarati?
அவிஜ்ஜா யாவ அத்தஸஞ்ஞா, இமானி நவ பதா³னி அகுஸலானி, யத்த² ஸப்³ப³ங் அகுஸலங் ஸமோஸரதி.
Avijjā yāva attasaññā, imāni nava padāni akusalāni, yattha sabbaṃ akusalaṃ samosarati.
கதமானி நவ பதா³னி குஸலானி யத்த² ஸப்³ப³ங் குஸலங் ஸமோஸரதி?
Katamāni nava padāni kusalāni yattha sabbaṃ kusalaṃ samosarati?
ஸமதோ² யாவ அனத்தஸஞ்ஞா, இமானி நவ பதா³னி குஸலானி யத்த² ஸப்³ப³ங் குஸலங் ஸமோஸரதி. இமானி அட்டா²ரஸ மூலபதா³னி.
Samatho yāva anattasaññā, imāni nava padāni kusalāni yattha sabbaṃ kusalaṃ samosarati. Imāni aṭṭhārasa mūlapadāni.
தத்த² இமா உத்³தா³னகா³தா²
Tattha imā uddānagāthā
தண்ஹா ச அவிஜ்ஜா லோபோ⁴, தோ³ஸோ ததே²வ மோஹோ ச;
Taṇhā ca avijjā lobho, doso tatheva moho ca;
சத்தாரோ ச விபல்லாஸா, கிலேஸபூ⁴மி நவ பதா³னி.
Cattāro ca vipallāsā, kilesabhūmi nava padāni.
யே ச ஸதிபட்டா²னா ஸமதோ², விபஸ்ஸனா குஸலமூலங்;
Ye ca satipaṭṭhānā samatho, vipassanā kusalamūlaṃ;
ஏதங் ஸப்³ப³ங் குஸலங், இந்த்³ரியபூ⁴மி நவபதா³னி.
Etaṃ sabbaṃ kusalaṃ, indriyabhūmi navapadāni.
ஸப்³ப³ங் குஸலங் நவஹி பதே³ஹி யுஜ்ஜதி, நவஹி சேவ அகுஸலங்;
Sabbaṃ kusalaṃ navahi padehi yujjati, navahi ceva akusalaṃ;
ஏககே நவ மூலபதா³னி, உப⁴யதோ அட்டா²ரஸ மூலபதா³னி.
Ekake nava mūlapadāni, ubhayato aṭṭhārasa mūlapadāni.
இமேஸங் அட்டா²ரஸன்னங் மூலபதா³னங் யானி நவ பதா³னி அகுஸலானி, அயங் து³க்க²ஸமுத³யோ; யானி நவ பதா³னி குஸலானி, அயங் து³க்க²னிரோத⁴கா³மினீ படிபதா³. இதி ஸமுத³யஸ்ஸ து³க்க²ங் ப²லங், து³க்க²னிரோத⁴கா³மினியா படிபதா³ய நிரோத⁴ங் ப²லங். இமானி சத்தாரி அரியஸச்சானி ப⁴க³வதா பா³ராணஸியங் தே³ஸிதானி.
Imesaṃ aṭṭhārasannaṃ mūlapadānaṃ yāni nava padāni akusalāni, ayaṃ dukkhasamudayo; yāni nava padāni kusalāni, ayaṃ dukkhanirodhagāminī paṭipadā. Iti samudayassa dukkhaṃ phalaṃ, dukkhanirodhagāminiyā paṭipadāya nirodhaṃ phalaṃ. Imāni cattāri ariyasaccāni bhagavatā bārāṇasiyaṃ desitāni.
7. தத்த² து³க்க²ஸ்ஸ அரியஸச்சஸ்ஸ அபரிமாணானி அக்க²ரானி பதா³னி ப்³யஞ்ஜனானி ஆகாரானி நிருத்தியோ நித்³தே³ஸா தே³ஸிதா ஏதஸ்ஸேவத்த²ஸ்ஸ ஸங்காஸனாய பகாஸனாய விவரணாய விப⁴ஜனாய உத்தானீகம்மதாய பஞ்ஞாபனாயாதி யா ஏவங் ஸப்³பே³ஸங் ஸச்சானங். இதி ஏகமேகங் ஸச்சங் அபரிமாணேஹி அக்க²ரபத³ப்³யஞ்ஜனஆகாரனிருத்தினித்³தே³ஸேஹி பரியேஸிதப்³ப³ங், தஞ்ச ப்³யஞ்ஜனங் அத்த²புது²த்தேன பன அத்தே²வ ப்³யஞ்ஜனபுது²த்தேன.
7. Tattha dukkhassa ariyasaccassa aparimāṇāni akkharāni padāni byañjanāni ākārāni niruttiyo niddesā desitā etassevatthassa saṅkāsanāya pakāsanāya vivaraṇāya vibhajanāya uttānīkammatāya paññāpanāyāti yā evaṃ sabbesaṃ saccānaṃ. Iti ekamekaṃ saccaṃ aparimāṇehi akkharapadabyañjanaākāraniruttiniddesehi pariyesitabbaṃ, tañca byañjanaṃ atthaputhuttena pana attheva byañjanaputhuttena.
யோ ஹி கோசி ஸமணோ வா ப்³ராஹ்மணோ வா ஏவங் வதெ³ய்ய ‘‘அஹங் இத³ங் து³க்க²ங் பச்சக்கா²ய அஞ்ஞங் து³க்க²ங் பஞ்ஞபெஸ்ஸாமீ’’தி தஸ்ஸ தங் வாசாவத்து²கமேவஸ்ஸ புச்சி²தோ ச ந ஸம்பாயிஸ்ஸதி. ஏவங் ஸச்சானி. யஞ்ச ரத்திங் ப⁴க³வா அபி⁴ஸம்பு³த்³தோ⁴, யஞ்ச ரத்திங் அனுபாதா³ய பரினிப்³பு³தோ, எத்த²ந்தரே யங் கிஞ்சி ப⁴க³வதா பா⁴ஸிதங் ஸுத்தங் கெ³ய்யங் வெய்யாகரணங் கா³தா² உதா³னங் இதிவுத்தகங் ஜாதகங் அப்³பு⁴தத⁴ம்மங் வேத³ல்லங், ஸப்³ப³ங் தங் த⁴ம்மசக்கங் பவத்திதங். ந கிஞ்சி பு³த்³தா⁴னங் ப⁴க³வந்தானங் த⁴ம்மதே³ஸனாய த⁴ம்மசக்கதோ ப³ஹித்³தா⁴, தஸ்ஸ ஸப்³ப³ங் ஸுத்தங் அரியத⁴ம்மேஸு பரியேஸிதப்³ப³ங். தத்த² பரிக்³க³ண்ஹனாய ஆலோகஸபா⁴னி சத்தாரி அரியஸச்சானி தா²வரானி இமானி.
Yo hi koci samaṇo vā brāhmaṇo vā evaṃ vadeyya ‘‘ahaṃ idaṃ dukkhaṃ paccakkhāya aññaṃ dukkhaṃ paññapessāmī’’ti tassa taṃ vācāvatthukamevassa pucchito ca na sampāyissati. Evaṃ saccāni. Yañca rattiṃ bhagavā abhisambuddho, yañca rattiṃ anupādāya parinibbuto, etthantare yaṃ kiñci bhagavatā bhāsitaṃ suttaṃ geyyaṃ veyyākaraṇaṃ gāthā udānaṃ itivuttakaṃ jātakaṃ abbhutadhammaṃ vedallaṃ, sabbaṃ taṃ dhammacakkaṃ pavattitaṃ. Na kiñci buddhānaṃ bhagavantānaṃ dhammadesanāya dhammacakkato bahiddhā, tassa sabbaṃ suttaṃ ariyadhammesu pariyesitabbaṃ. Tattha pariggaṇhanāya ālokasabhāni cattāri ariyasaccāni thāvarāni imāni.
தத்த² கதமங் து³க்க²ங்? ஜாதி ஜரா ப்³யாதி⁴ மரணங் ஸங்கி²த்தேன பஞ்சுபாதா³னக்க²ந்தா⁴ து³க்கா². தத்தா²யங் லக்க²ணனித்³தே³ஸோ, பாதுபா⁴வலக்க²ணா ஜாதி, பரிபாகலக்க²ணா ஜரா, து³க்க²து³க்க²தாலக்க²ணோ ப்³யாதி⁴, சுதிலக்க²ணங் மரணங், பியவிப்பயோக³விபரிணாமபரிதாபனலக்க²ணோ ஸோகோ, லாலப்பனலக்க²ணோ பரிதே³வோ, காயஸம்பீளனலக்க²ணங் து³க்க²ங், சித்தஸம்பீளனலக்க²ணங் தோ³மனஸ்ஸங், கிலேஸபரித³ஹனலக்க²ணோ உபாயாஸோ, அமனாபஸமோதா⁴னலக்க²ணோ அப்பியஸம்பயோகோ³, மனாபவினாபா⁴வலக்க²ணோ பியவிப்பயோகோ³, அதி⁴ப்பாயவிவத்தனலக்க²ணோ அலாபோ⁴, அபரிஞ்ஞாலக்க²ணா பஞ்சுபாதா³னக்க²ந்தா⁴, பரிபாகசுதிலக்க²ணங் ஜராமரணங், பாதுபா⁴வசுதிலக்க²ணங் சுதோபபத்தி, படிஸந்தி⁴னிப்³ப³த்தனலக்க²ணோ ஸமுத³யோ, ஸமுத³யபரிஜஹனலக்க²ணோ நிரோதோ⁴, அனுஸயஸமுச்சே²த³லக்க²ணோ மக்³கோ³. ப்³யாதி⁴லக்க²ணங் து³க்க²ங், ஸஞ்ஜானநலக்க²ணோ ஸமுத³யோ, நிய்யானிகலக்க²ணோ மக்³கோ³, ஸந்திலக்க²ணோ நிரோதோ⁴. அப்படிஸந்தி⁴பா⁴வனிரோத⁴லக்க²ணா அனுபாதி³ஸேஸா நிப்³பா³னதா⁴து, து³க்க²ஞ்ச ஸமுத³யோ ச, து³க்க²ஞ்ச நிரோதோ⁴ ச, து³க்க²ஞ்ச மக்³கோ³ ச, ஸமுத³யோ ச து³க்க²ஞ்ச, ஸமுத³யோ ச நிரோதோ⁴ ச, ஸமுத³யோ ச மக்³கோ³ ச, நிரோதோ⁴ ச ஸமுத³யோ ச, நிரோதோ⁴ ச து³க்க²ஞ்ச, நிரோதோ⁴ ச மக்³கோ³ ச, மக்³கோ³ ச நிரோதோ⁴ ச, மக்³கோ³ ச ஸமுத³யோ ச, மக்³கோ³ ச து³க்க²ஞ்ச.
Tattha katamaṃ dukkhaṃ? Jāti jarā byādhi maraṇaṃ saṃkhittena pañcupādānakkhandhā dukkhā. Tatthāyaṃ lakkhaṇaniddeso, pātubhāvalakkhaṇā jāti, paripākalakkhaṇā jarā, dukkhadukkhatālakkhaṇo byādhi, cutilakkhaṇaṃ maraṇaṃ, piyavippayogavipariṇāmaparitāpanalakkhaṇo soko, lālappanalakkhaṇo paridevo, kāyasampīḷanalakkhaṇaṃ dukkhaṃ, cittasampīḷanalakkhaṇaṃ domanassaṃ, kilesaparidahanalakkhaṇo upāyāso, amanāpasamodhānalakkhaṇo appiyasampayogo, manāpavinābhāvalakkhaṇo piyavippayogo, adhippāyavivattanalakkhaṇo alābho, apariññālakkhaṇā pañcupādānakkhandhā, paripākacutilakkhaṇaṃ jarāmaraṇaṃ, pātubhāvacutilakkhaṇaṃ cutopapatti, paṭisandhinibbattanalakkhaṇo samudayo, samudayaparijahanalakkhaṇo nirodho, anusayasamucchedalakkhaṇo maggo. Byādhilakkhaṇaṃ dukkhaṃ, sañjānanalakkhaṇo samudayo, niyyānikalakkhaṇo maggo, santilakkhaṇo nirodho. Appaṭisandhibhāvanirodhalakkhaṇā anupādisesā nibbānadhātu, dukkhañca samudayo ca, dukkhañca nirodho ca, dukkhañca maggo ca, samudayo ca dukkhañca, samudayo ca nirodho ca, samudayo ca maggo ca, nirodho ca samudayo ca, nirodho ca dukkhañca, nirodho ca maggo ca, maggo ca nirodho ca, maggo ca samudayo ca, maggo ca dukkhañca.
8. தத்தி²மானி ஸுத்தானி.
8. Tatthimāni suttāni.
அப்³பு⁴ட்டி²தோவ ஸோ யாதி, ஸ க³ச்ச²ங் ந நிவத்ததீ’’தி.
Abbhuṭṭhitova so yāti, sa gacchaṃ na nivattatī’’ti.
அட்டி²மா, ஆனந்த³, தா³னுபபத்தியோ ஏகுத்தரிகே ஸுத்தங் – அயங் ஜாதி.
Aṭṭhimā, ānanda, dānupapattiyo ekuttarike suttaṃ – ayaṃ jāti.
தத்த² கதமா ஜரா?
Tattha katamā jarā?
அசரித்வா 11 ப்³ரஹ்மசரியங், அலத்³தா⁴ யொப்³ப³னே த⁴னங்;
Acaritvā 12 brahmacariyaṃ, aladdhā yobbane dhanaṃ;
ஜிண்ணகோஞ்சாவ ஜா²யந்தி, கீ²ணமச்சே²வ பல்லலே.
Jiṇṇakoñcāva jhāyanti, khīṇamaccheva pallale.
பஞ்ச புப்³ப³னிமித்தானி தே³வேஸு – அயங் ஜரா.
Pañca pubbanimittāni devesu – ayaṃ jarā.
தத்த² கதமோ ப்³யாதி⁴?
Tattha katamo byādhi?
ஸாமங் தேன குதோ ராஜ, துவம்பி ஜராயந்தி வேதே³ஸி;
Sāmaṃ tena kuto rāja, tuvampi jarāyanti vedesi;
க²த்திய கம்மஸ்ஸ ப²லோ, லோகோ ந ஹி கம்மங் பனயதி.
Khattiya kammassa phalo, loko na hi kammaṃ panayati.
தயோ கி³லானா – அயங் ப்³யாதி⁴.
Tayo gilānā – ayaṃ byādhi.
தத்த² கதமங் மரணங்?
Tattha katamaṃ maraṇaṃ?
கு²த்³த³கஞ்ச மஹந்தஞ்ச, யங் பக்கங் யஞ்ச ஆமகங்;
Khuddakañca mahantañca, yaṃ pakkaṃ yañca āmakaṃ;
ஸப்³ப³ங் பே⁴த³னபரியந்தங், ஏவங் மச்சான ஜீவிதங்.
Sabbaṃ bhedanapariyantaṃ, evaṃ maccāna jīvitaṃ.
மமாயிதே பஸ்ஸத² ப²ந்த³மானே 15, மச்சே²வ அப்போத³கே கீ²ணஸோதே;
Mamāyite passatha phandamāne 16, maccheva appodake khīṇasote;
ஏதம்பி தி³ஸ்வா அமமோ சரெய்ய, ப⁴வேஸு ஆஸத்திமகுப்³ப³மானோ.
Etampi disvā amamo careyya, bhavesu āsattimakubbamāno.
உத³கப்பனஸுத்தங் – இத³ங் மரணங்.
Udakappanasuttaṃ – idaṃ maraṇaṃ.
தத்த² கதமோ ஸோகோ?
Tattha katamo soko?
இத⁴ ஸோசதி பேச்ச ஸோசதி, பாபகாரீ உப⁴யத்த² ஸோசதி;
Idha socati pecca socati, pāpakārī ubhayattha socati;
ஸோ ஸோசதி ஸோ விஹஞ்ஞதி, தி³ஸ்வா கம்மகிலிட்ட²மத்தனோ 17.
So socati so vihaññati, disvā kammakiliṭṭhamattano 18.
தீணி து³ச்சரிதானி – அயங் ஸோகோ.
Tīṇi duccaritāni – ayaṃ soko.
தத்த² கதமோ பரிதே³வோ?
Tattha katamo paridevo?
காமேஸு 19 கி³த்³தா⁴ பஸுதா பமூள்ஹா, அவதா³னியா தே விஸமே நிவிட்டா²;
Kāmesu 20 giddhā pasutā pamūḷhā, avadāniyā te visame niviṭṭhā;
து³க்கூ²பனீதா பரிதே³வயந்தி, கிங்ஸு ப⁴விஸ்ஸாம இதோ சுதாஸே.
Dukkhūpanītā paridevayanti, kiṃsu bhavissāma ito cutāse.
திஸ்ஸோ விபத்தியோ – அயங் பரிதே³வோ.
Tisso vipattiyo – ayaṃ paridevo.
தத்த² கதமங் து³க்க²ங்?
Tattha katamaṃ dukkhaṃ?
ஜலிதா ஜாதவேதா³வ, அச்சிஸங்க⁴ஸமாகுலா.
Jalitā jātavedāva, accisaṅghasamākulā.
மஹா வத ஸோ பரிளாஹோ 23 ஸங்யுத்தகே ஸுத்தங் ஸச்சஸங்யுத்தேஸு – இத³ங் து³க்க²ங்.
Mahā vata so pariḷāho 24 saṃyuttake suttaṃ saccasaṃyuttesu – idaṃ dukkhaṃ.
தத்த² கதமங் தோ³மனஸ்ஸங்?
Tattha katamaṃ domanassaṃ?
ஸுத்வா பரேஸங் நிக்³கோ⁴ஸங், மங்கு ஹோதி ததா²விதோ⁴.
Sutvā paresaṃ nigghosaṃ, maṅku hoti tathāvidho.
த்³வேமே தபனீயா த⁴ம்மா – இத³ங் தோ³மனஸ்ஸங்.
Dveme tapanīyā dhammā – idaṃ domanassaṃ.
தத்த² கதமோ உபாயாஸோ?
Tattha katamo upāyāso?
கம்மாரானங் யதா² உக்கா, அந்தோ ட³ய்ஹதி நோ ப³ஹி;
Kammārānaṃ yathā ukkā, anto ḍayhati no bahi;
ஏவங் ட³ய்ஹதி மே ஹத³யங், ஸுத்வா நிப்³ப³த்தமம்பு³ஜங்.
Evaṃ ḍayhati me hadayaṃ, sutvā nibbattamambujaṃ.
தயோ அக்³கீ³ – அயங் உபாயாஸோ.
Tayo aggī – ayaṃ upāyāso.
தத்த² கதமோ அப்பியஸம்பயோகோ³?
Tattha katamo appiyasampayogo?
அயஸாவ 27 மலங் ஸமுட்டி²தங், ததுட்டா²ய தமேவ கா²த³தி;
Ayasāva 28 malaṃ samuṭṭhitaṃ, tatuṭṭhāya tameva khādati;
ஏவங் அதிதோ⁴னசாரினங், ஸானி கம்மானி நயந்தி து³க்³க³திங்.
Evaṃ atidhonacārinaṃ, sāni kammāni nayanti duggatiṃ.
த்³வேமே ததா²க³தங் அப்³பா⁴சிக்க²ந்தி, ஏகுத்தரிகே ஸுத்தங் து³கேஸு – அயங் அப்பியஸம்பயோகோ³.
Dveme tathāgataṃ abbhācikkhanti, ekuttarike suttaṃ dukesu – ayaṃ appiyasampayogo.
தத்த² கதமோ பியவிப்பயோகோ³?
Tattha katamo piyavippayogo?
ஸுபினேன யதா²பி ஸங்க³தங், படிபு³த்³தோ⁴ புரிஸோ ந பஸ்ஸதி;
Supinena yathāpi saṅgataṃ, paṭibuddho puriso na passati;
தே தே³வா சவனத⁴ம்மங் விதி³த்வா தீஹி வாசாஹி அனுஸாஸந்தி. அயங் பியவிப்பயோகோ³.
Te devā cavanadhammaṃ viditvā tīhi vācāhi anusāsanti. Ayaṃ piyavippayogo.
யம்பிச்ச²ங் ந லப⁴தி, திஸ்ஸோ மாரதீ⁴தரோ;
Yampicchaṃ na labhati, tisso māradhītaro;
தே காமா பரிஹாயந்தி, ஸல்லவித்³தோ⁴வ ருப்பதி.
Te kāmā parihāyanti, sallaviddhova ruppati.
ஸங்கி²த்தேன பஞ்சுபாதா³னக்க²ந்தா⁴ து³க்கா².
Saṃkhittena pañcupādānakkhandhā dukkhā.
சக்கு² ஸோதஞ்ச கா⁴னஞ்ச, ஜிவ்ஹா காயோ ததோ மனங்;
Cakkhu sotañca ghānañca, jivhā kāyo tato manaṃ;
ஏதே லோகாமிஸா கோ⁴ரா, யத்த² ஸத்தா புது²ஜ்ஜனா.
Ete lokāmisā ghorā, yattha sattā puthujjanā.
பஞ்சிமே பி⁴க்க²வே க²ந்தா⁴ – இத³ங் து³க்க²ங்.
Pañcime bhikkhave khandhā – idaṃ dukkhaṃ.
தத்த² கதமா ஜரா ச மரணஞ்ச?
Tattha katamā jarā ca maraṇañca?
அப்பங் வத ஜீவிதங் இத³ங், ஓரங் வஸ்ஸஸதாபி மீயதே 35;
Appaṃ vata jīvitaṃ idaṃ, oraṃ vassasatāpi mīyate 36;
அத² வாபி அகிச்ச²ங் ஜீவிதங், அத² கோ² ஸோ ஜரஸாபி மீயதே.
Atha vāpi akicchaṃ jīvitaṃ, atha kho so jarasāpi mīyate.
ஸங்யுத்தகே பஸேனதி³ஸங்யுத்தகே ஸுத்தங் அய்யிகா மே காலங்கதா – அயங் ஜரா ச மரணஞ்ச.
Saṃyuttake pasenadisaṃyuttake suttaṃ ayyikā me kālaṅkatā – ayaṃ jarā ca maraṇañca.
தத்த² கதமா சுதி ச உபபத்தி ச?
Tattha katamā cuti ca upapatti ca?
‘‘ஸப்³பே³ ஸத்தா மரிஸ்ஸந்தி, மரணந்தங் ஹி ஜீவிதங்;
‘‘Sabbe sattā marissanti, maraṇantaṃ hi jīvitaṃ;
யதா²கம்மங் க³மிஸ்ஸந்தி, அத்தகம்மப²லூபகா³’’தி 37. –
Yathākammaṃ gamissanti, attakammaphalūpagā’’ti 38. –
அயங் சுதி ச உபபத்தி ச.
Ayaṃ cuti ca upapatti ca.
இமேஹி ஸுத்தேஹி ஏகஸதி³ஸேஹி ச அஞ்ஞேஹி நவவித⁴ங் ஸுத்தங் தங் அனுபவிட்டே²ஹி லக்க²ணதோ து³க்க²ங் ஞத்வா ஸாதா⁴ரணஞ்ச அஸாதா⁴ரணஞ்ச து³க்க²ங் அரியஸச்சங் நித்³தி³ஸிதப்³ப³ங். கா³தா²ஹி கா³தா² அனுமினிதப்³பா³, ப்³யாகரணேஹி வா ப்³யாகரணங் – இத³ங் து³க்க²ங்.
Imehi suttehi ekasadisehi ca aññehi navavidhaṃ suttaṃ taṃ anupaviṭṭhehi lakkhaṇato dukkhaṃ ñatvā sādhāraṇañca asādhāraṇañca dukkhaṃ ariyasaccaṃ niddisitabbaṃ. Gāthāhi gāthā anuminitabbā, byākaraṇehi vā byākaraṇaṃ – idaṃ dukkhaṃ.
9. தத்த² கதமோ து³க்க²ஸமுத³யோ?
9. Tattha katamo dukkhasamudayo?
காமேஸு ஸத்தா காமஸங்க³ஸத்தா 39, ஸங்யோஜனே வஜ்ஜமபஸ்ஸமானா;
Kāmesu sattā kāmasaṅgasattā 40, saṃyojane vajjamapassamānā;
ந ஹி ஜாது ஸங்யோஜனஸங்க³ஸத்தா, ஓக⁴ங் தரெய்யுங் விபுலங் மஹந்தங்.
Na hi jātu saṃyojanasaṅgasattā, oghaṃ tareyyuṃ vipulaṃ mahantaṃ.
சத்தாரோ ஆஸவா ஸுத்தங் – அயங் து³க்க²ஸமுத³யோ.
Cattāro āsavā suttaṃ – ayaṃ dukkhasamudayo.
தத்த² கதமோ து³க்க²னிரோதோ⁴?
Tattha katamo dukkhanirodho?
யம்ஹி ந மாயா வஸதீ ந மானோ,
Yamhi na māyā vasatī na māno,
யோ வீதலோபோ⁴ அமமோ நிராஸோ,
Yo vītalobho amamo nirāso,
ஸோ ப்³ராஹ்மணோ ஸோ ஸமணோ ஸ பி⁴க்கு².
So brāhmaṇo so samaṇo sa bhikkhu.
த்³வேமா விமுத்தியோ, ராக³விராகா³ ச சேதோவிமுத்தி; அவிஜ்ஜாவிராகா³ ச பஞ்ஞாவிமுத்தி – அயங் நிரோதோ⁴.
Dvemā vimuttiyo, rāgavirāgā ca cetovimutti; avijjāvirāgā ca paññāvimutti – ayaṃ nirodho.
தத்த² கதமோ மக்³கோ³?
Tattha katamo maggo?
ஏஸேவ மக்³கோ³ நத்த²ஞ்ஞோ, த³ஸ்ஸனஸ்ஸ விஸுத்³தி⁴யா;
Eseva maggo natthañño, dassanassa visuddhiyā;
அரியோ அட்ட²ங்கி³கோ மக்³கோ³, மாரஸ்ஸேதங் பமோஹனங்.
Ariyo aṭṭhaṅgiko maggo, mārassetaṃ pamohanaṃ.
ஸத்திமே, பி⁴க்க²வே, பொ³ஜ்ஜ²ங்கா³ – அயங் மக்³கோ³.
Sattime, bhikkhave, bojjhaṅgā – ayaṃ maggo.
தத்த² கதமானி சத்தாரி அரியஸச்சானி?
Tattha katamāni cattāri ariyasaccāni?
‘‘யே த⁴ம்மா 43 ஹேதுப்பப⁴வா, தேஸங் ஹேதுங் ததா²க³தோ ஆஹ;
‘‘Ye dhammā 44 hetuppabhavā, tesaṃ hetuṃ tathāgato āha;
தேஸஞ்ச யோ நிரோதோ⁴, ஏவங்வாதீ³ மஹாஸமணோ’’தி.
Tesañca yo nirodho, evaṃvādī mahāsamaṇo’’ti.
ஹேதுப்பப⁴வா த⁴ம்மா து³க்க²ங், ஹேதுஸமுத³யோ, யங் ப⁴க³வதோ வசனங். அயங் த⁴ம்மோ யோ நிரோதோ⁴, யே ஹி கேசி ஸங்யோஜனியேஸு த⁴ம்மேஸு அஸ்ஸதா³னுபஸ்ஸினோ விஹரந்தி. கிலேஸா தண்ஹா பவட்³ட⁴தி, தண்ஹாபச்சயா உபாதா³னங்…பே॰… ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ ஸமுத³யோ ஹோதி. தத்த² யங் ஸங்யோஜனங் – அயங் ஸமுத³யோ. யே ஸங்யோஜனியா த⁴ம்மா யே ச ஸோகபரிதே³வது³க்க²தோ³மனஸ்ஸுபாயாஸா ஸம்ப⁴வந்தி – இத³ங் து³க்க²ங். யா ஸங்யோஜனியேஸு த⁴ம்மேஸு ஆதீ³னவானுபஸ்ஸனா – அயங் மக்³கோ³. பரிமுச்சதி ஜாதியா ஜராய ப்³யாதீ⁴ஹி மரணேஹி ஸோகேஹி பரிதே³வேஹி யாவ உபாயாஸேஹி – இத³ங் நிப்³பா³னங். இமானி சத்தாரி ஸச்சானி.
Hetuppabhavā dhammā dukkhaṃ, hetusamudayo, yaṃ bhagavato vacanaṃ. Ayaṃ dhammo yo nirodho, ye hi keci saṃyojaniyesu dhammesu assadānupassino viharanti. Kilesā taṇhā pavaḍḍhati, taṇhāpaccayā upādānaṃ…pe… evametassa kevalassa dukkhakkhandhassa samudayo hoti. Tattha yaṃ saṃyojanaṃ – ayaṃ samudayo. Ye saṃyojaniyā dhammā ye ca sokaparidevadukkhadomanassupāyāsā sambhavanti – idaṃ dukkhaṃ. Yā saṃyojaniyesu dhammesu ādīnavānupassanā – ayaṃ maggo. Parimuccati jātiyā jarāya byādhīhi maraṇehi sokehi paridevehi yāva upāyāsehi – idaṃ nibbānaṃ. Imāni cattāri saccāni.
தத்த² கதமா அனுபாதி³ஸேஸா நிப்³பா³னதா⁴து?
Tattha katamā anupādisesā nibbānadhātu?
அத்த²ங்க³தஸ்ஸ ந பமாணமத்தி², தங் ஹி வா நத்தி² யேன நங் பஞ்ஞபெய்ய;
Atthaṅgatassa na pamāṇamatthi, taṃ hi vā natthi yena naṃ paññapeyya;
ஸப்³ப³ஸங்கா³னங் ஸமூஹதத்தா விதூ³, ஸிதா வாத³ஸதஸ்ஸு 45 ஸப்³பே³.
Sabbasaṅgānaṃ samūhatattā vidū, sitā vādasatassu 46 sabbe.
ஸங்யுத்தகே கோ³தி⁴கஸங்யுத்தங்.
Saṃyuttake godhikasaṃyuttaṃ.
இமானி அஸாதா⁴ரணானி ஸுத்தானி. யஹிங் யஹிங் ஸச்சானி நித்³தி³ட்டா²னி, தஹிங் தஹிங் ஸச்சலக்க²ணதோ ஓதாரெத்வா 47 அபரிமாணேஹி ப்³யஞ்ஜனேஹி ஸோ அத்தோ² பரியேஸிதப்³போ³. தத்த² அத்தா²னுபரிவத்தி ப்³யஞ்ஜனேன புன ப்³யஞ்ஜனானுபரிவத்தி அத்தே²ன தஸ்ஸ ஏகமேகஸ்ஸ அபரிமாணானி ப்³யஞ்ஜனானி இமேஹி ஸுத்தேஹி யதா²னிக்கி²த்தேஹி சத்தாரி அரியஸச்சானி நித்³தி³ஸிதப்³பா³னி. பஞ்சனிகாயே அனுபவிட்டா²ஹி கா³தா²ஹி கா³தா² அனுமினிதப்³பா³, ப்³யாகரணேன ப்³யாகரணங். இமானி அஸாதா⁴ரணானி ஸுத்தானி.
Imāni asādhāraṇāni suttāni. Yahiṃ yahiṃ saccāni niddiṭṭhāni, tahiṃ tahiṃ saccalakkhaṇato otāretvā 48 aparimāṇehi byañjanehi so attho pariyesitabbo. Tattha atthānuparivatti byañjanena puna byañjanānuparivatti atthena tassa ekamekassa aparimāṇāni byañjanāni imehi suttehi yathānikkhittehi cattāri ariyasaccāni niddisitabbāni. Pañcanikāye anupaviṭṭhāhi gāthāhi gāthā anuminitabbā, byākaraṇena byākaraṇaṃ. Imāni asādhāraṇāni suttāni.
தேஸங் இமா உத்³தா³னகா³தா²
Tesaṃ imā uddānagāthā
யமேகரத்திங் பட²மங், அட்ட² தா³னூபபத்தியோ;
Yamekarattiṃ paṭhamaṃ, aṭṭha dānūpapattiyo;
பஞ்ச புப்³ப³னிமித்தானி, கீ²ணமச்ச²ங்வ பல்லலங்.
Pañca pubbanimittāni, khīṇamacchaṃva pallalaṃ.
ஸாமங் தேன குதோ ராஜ, தயோ தே³வா கி³லானகா;
Sāmaṃ tena kuto rāja, tayo devā gilānakā;
யதா²பி கும்ப⁴காரஸ்ஸ, யதா² நதி³த³கப்பனங்.
Yathāpi kumbhakārassa, yathā nadidakappanaṃ.
இத⁴ ஸோசதி பேச்ச ஸோசதி, தீணி து³ச்சரிதானி ச;
Idha socati pecca socati, tīṇi duccaritāni ca;
காமேஸு கி³த்³தா⁴ பஸுதா, யாவ திஸ்ஸோ விபத்தியோ.
Kāmesu giddhā pasutā, yāva tisso vipattiyo.
ஸங்கப்பேஹி பரேதோ ஸோ, தத்த² தபனியேஹி ச.
Saṅkappehi pareto so, tattha tapaniyehi ca.
கம்மாரானங் யதா² உக்கா, தயோ அக்³கீ³ பகாஸிதா;
Kammārānaṃ yathā ukkā, tayo aggī pakāsitā;
அயதோ மலமுப்பன்னங், அப்³ப⁴க்கா²னங் ததா²க³தே.
Ayato malamuppannaṃ, abbhakkhānaṃ tathāgate.
திவித⁴ங் தே³வானுஸாஸந்தி, ஸுபினேன ஸங்க³மோ யதா²;
Tividhaṃ devānusāsanti, supinena saṅgamo yathā;
திஸ்ஸோ சேவ மாரதீ⁴தா, ஸல்லவித்³தோ⁴வ ருப்பதி.
Tisso ceva māradhītā, sallaviddhova ruppati.
சக்கு² ஸோதஞ்ச கா⁴னஞ்ச, பஞ்சக்க²ந்தா⁴ பகாஸிதா;
Cakkhu sotañca ghānañca, pañcakkhandhā pakāsitā;
அப்பங் வத ஜீவிதங் இத³ங், அய்யிகா மே மஹல்லிகா.
Appaṃ vata jīvitaṃ idaṃ, ayyikā me mahallikā.
ஸப்³பே³ ஸத்தா மரிஸ்ஸந்தி, உபபத்தி சுதிசயங்;
Sabbe sattā marissanti, upapatti cuticayaṃ;
காமேஸு ஸத்தா பஸுதா, ஆஸவேஹி சதூஹி ச.
Kāmesu sattā pasutā, āsavehi catūhi ca.
யம்ஹி ந மாயா வஸதி, த்³வேமா சேதோவிமுத்தியோ;
Yamhi na māyā vasati, dvemā cetovimuttiyo;
ஏஸேவ மக்³கோ³ நத்த²ஞ்ஞோ, பொ³ஜ்ஜ²ங்கா³ ச ஸுதே³ஸிதா.
Eseva maggo natthañño, bojjhaṅgā ca sudesitā.
அத்த²ங்க³தஸ்ஸ ந பமாணமத்தி², கோ³தி⁴கோ பரினிப்³பு³தோ;
Atthaṅgatassa na pamāṇamatthi, godhiko parinibbuto;
யே த⁴ம்மா ஹேதுப்பப⁴வா, ஸங்யோஜனானுபஸ்ஸினோ.
Ye dhammā hetuppabhavā, saṃyojanānupassino.
இமா த³ஸ தேஸங் உத்³தா³னகா³தா².
Imā dasa tesaṃ uddānagāthā.
10. தத்தி²மானி ஸாதா⁴ரணானி ஸுத்தானி யேஸு ஸுத்தேஸு ஸாதா⁴ரணானி ஸச்சானி தே³ஸிதானி அனுலோமம்பி படிலோமம்பி வோமிஸ்ஸகம்பி. தத்த² அயங் ஆதி³.
10. Tatthimāni sādhāraṇāni suttāni yesu suttesu sādhāraṇāni saccāni desitāni anulomampi paṭilomampi vomissakampi. Tattha ayaṃ ādi.
அவிஜ்ஜாய நிவுதோ லோகோ, [அஜிதாதி ப⁴க³வா]
Avijjāya nivuto loko, [ajitāti bhagavā]
விவிச்சா² பமாதா³ நப்பகாஸதி;
Vivicchā pamādā nappakāsati;
ஜப்பாபி⁴லேபனங் 51 ப்³ரூமி, து³க்க²மஸ்ஸ மஹப்³ப⁴யங்.
Jappābhilepanaṃ 52 brūmi, dukkhamassa mahabbhayaṃ.
தத்த² யா அவிஜ்ஜா ச விவிச்சா² ச, அயங் ஸமுத³யோ. யங் மஹப்³ப⁴யங், இத³ங் து³க்க²ங். இமானி த்³வே ஸச்சானி – து³க்க²ஞ்ச ஸமுத³யோ ச. ‘‘ஸங்யோஜனங் ஸங்யோஜனியா ச த⁴ம்மா’’தி ஸங்யுத்தகே சித்தஸங்யுத்தகேஸு ப்³யாகரணங். தத்த² யங் ஸங்யோஜனங், அயங் ஸமுத³யோ. யே ஸங்யோஜனியா த⁴ம்மா, இத³ங் து³க்க²ங். இமானி த்³வே ஸச்சானி – து³க்க²ஞ்ச ஸமுத³யோ ச.
Tattha yā avijjā ca vivicchā ca, ayaṃ samudayo. Yaṃ mahabbhayaṃ, idaṃ dukkhaṃ. Imāni dve saccāni – dukkhañca samudayo ca. ‘‘Saṃyojanaṃ saṃyojaniyā ca dhammā’’ti saṃyuttake cittasaṃyuttakesu byākaraṇaṃ. Tattha yaṃ saṃyojanaṃ, ayaṃ samudayo. Ye saṃyojaniyā dhammā, idaṃ dukkhaṃ. Imāni dve saccāni – dukkhañca samudayo ca.
தத்த² கதமங் து³க்க²ஞ்ச நிரோதோ⁴ ச?
Tattha katamaṃ dukkhañca nirodho ca?
உச்சி²ன்னப⁴வதண்ஹஸ்ஸ, நெத்திச்சி²ன்னஸ்ஸ 53 பி⁴க்கு²னோ;
Ucchinnabhavataṇhassa, netticchinnassa 54 bhikkhuno;
விக்கீ²ணோ ஜாதிஸங்ஸாரோ, நத்தி² தா³னி புனப்³ப⁴வோ.
Vikkhīṇo jātisaṃsāro, natthi dāni punabbhavo.
யங் சித்தங், இத³ங் து³க்க²ங். யோ ப⁴வதண்ஹாய உபச்சே²தோ³, அயங் து³க்க²னிரோதோ⁴. விக்கீ²ணோ ஜாதிஸங்ஸாரோ, நத்தி² தா³னி புனப்³ப⁴வோதி நித்³தே³ஸோ. இமானி த்³வே ஸச்சானி – து³க்க²ஞ்ச நிரோதோ⁴ ச. த்³வேமா, பி⁴க்க²வே, விமுத்தியோ; ராக³விராகா³ ச சேதோவிமுத்தி, அவிஜ்ஜாவிராகா³ ச பஞ்ஞாவிமுத்தி. யங் சித்தங், இத³ங் து³க்க²ங். யா விமுத்தி, அயங் நிரோதோ⁴. இமானி த்³வே ஸச்சானி – து³க்க²ஞ்ச நிரோதோ⁴ ச.
Yaṃ cittaṃ, idaṃ dukkhaṃ. Yo bhavataṇhāya upacchedo, ayaṃ dukkhanirodho. Vikkhīṇo jātisaṃsāro, natthi dāni punabbhavoti niddeso. Imāni dve saccāni – dukkhañca nirodho ca. Dvemā, bhikkhave, vimuttiyo; rāgavirāgā ca cetovimutti, avijjāvirāgā ca paññāvimutti. Yaṃ cittaṃ, idaṃ dukkhaṃ. Yā vimutti, ayaṃ nirodho. Imāni dve saccāni – dukkhañca nirodho ca.
தத்த² கதமங் து³க்க²ஞ்ச மக்³கோ³ ச?
Tattha katamaṃ dukkhañca maggo ca?
கும்பூ⁴பமங் 55 காயமிமங் விதி³த்வா, நக³ரூபமங் சித்தமித³ங் ட²பெத்வா;
Kumbhūpamaṃ 56 kāyamimaṃ viditvā, nagarūpamaṃ cittamidaṃ ṭhapetvā;
யோதே⁴த² மாரங் பஞ்ஞாவுதே⁴ன, ஜிதஞ்ச ரக்கே² அனிவேஸனோ ஸியா.
Yodhetha māraṃ paññāvudhena, jitañca rakkhe anivesano siyā.
தத்த² யஞ்ச கும்பூ⁴பமோ காயோ யஞ்ச நக³ரூபமங் சித்தங், இத³ங் து³க்க²ங். யங் பஞ்ஞாவுதே⁴ன மாரங் யோதே⁴தா²தி அயங் மக்³கோ³. இமானி த்³வே ஸச்சானி. யங், பி⁴க்க²வே, ந தும்ஹாகங், தங் பஜஹிதப்³ப³ங். யா ஸங்யோஜனா, அயங் மக்³கோ³. யே தே த⁴ம்மா அனத்தனியா பஹாதப்³பா³, ரூபங் யாவ விஞ்ஞாணங், இத³ங் து³க்க²ஞ்ச மக்³கோ³ ச.
Tattha yañca kumbhūpamo kāyo yañca nagarūpamaṃ cittaṃ, idaṃ dukkhaṃ. Yaṃ paññāvudhena māraṃ yodhethāti ayaṃ maggo. Imāni dve saccāni. Yaṃ, bhikkhave, na tumhākaṃ, taṃ pajahitabbaṃ. Yā saṃyojanā, ayaṃ maggo. Ye te dhammā anattaniyā pahātabbā, rūpaṃ yāva viññāṇaṃ, idaṃ dukkhañca maggo ca.
தத்த² கதமங் து³க்க²ஞ்ச ஸமுத³யோ ச நிரோதோ⁴ ச?
Tattha katamaṃ dukkhañca samudayo ca nirodho ca?
யே கேசி ஸோகா பரிதே³விதா வா, து³க்கா² ச 57 லோகஸ்மிமனேகரூபா;
Ye keci sokā paridevitā vā, dukkhā ca 58 lokasmimanekarūpā;
பியங் படிச்சப்பப⁴வந்தி ஏதே, பியே அஸந்தே ந ப⁴வந்தி ஏதே.
Piyaṃ paṭiccappabhavanti ete, piye asante na bhavanti ete.
யே ஸோகபரிதே³வா, யங் ச அனேகரூபங் து³க்க²ங், யங் பேமதோ ப⁴வதி, இத³ங் து³க்க²ங். யங் பேமங், அயங் ஸமுத³யோ. யோ தத்த² ச²ந்த³ராக³வினயோ பியஸ்ஸ அகிரியா, அயங் நிரோதோ⁴. இமானி தீணி ஸச்சானி. திம்ப³ருகோ பரிப்³பா³ஜகோ பச்சேதி ‘‘ஸயங்கதங் பரங்கத’’ந்தி. யதே²ஸா வீமங்ஸா, இத³ங் து³க்க²ங். யா ஏதே த்³வே அந்தே அனுபக³ம்ம மஜ்ஜி²மா படிபதா³ அவிஜ்ஜாபச்சயா ஸங்கா²ரா யாவ ஜாதிபச்சயா ஜராமரணங், இத³ம்பி து³க்க²ஞ்ச ஸமுத³யோ ச. விஞ்ஞாணங் நாமரூபங் ஸளாயதனங் ப²ஸ்ஸோ வேத³னா ப⁴வோ ஜாதி ஜராமரணங், இத³ங் து³க்க²ங். அவிஜ்ஜா ஸங்கா²ரா தண்ஹா உபாதா³னங், அயங் ஸமுத³யோ. இதி இத³ங் ஸயங்கதங் வீமங்ஸெய்யாதி 59 யஞ்ச படிச்சஸமுப்பாதே³ து³க்க²ங், இத³ங் ஏஸோ ஸமுத³யோ நித்³தி³ட்டோ². அவிஜ்ஜானிரோதா⁴ ஸங்கா²ரனிரோதோ⁴ ச யாவ ச ஜராமரணனிரோதோ⁴தி அயங் நிரோதோ⁴. இமானி தீணி ஸச்சானி து³க்க²ஞ்ச ஸமுத³யோ ச நிரோதோ⁴ ச.
Ye sokaparidevā, yaṃ ca anekarūpaṃ dukkhaṃ, yaṃ pemato bhavati, idaṃ dukkhaṃ. Yaṃ pemaṃ, ayaṃ samudayo. Yo tattha chandarāgavinayo piyassa akiriyā, ayaṃ nirodho. Imāni tīṇi saccāni. Timbaruko paribbājako pacceti ‘‘sayaṃkataṃ paraṃkata’’nti. Yathesā vīmaṃsā, idaṃ dukkhaṃ. Yā ete dve ante anupagamma majjhimā paṭipadā avijjāpaccayā saṅkhārā yāva jātipaccayā jarāmaraṇaṃ, idampi dukkhañca samudayo ca. Viññāṇaṃ nāmarūpaṃ saḷāyatanaṃ phasso vedanā bhavo jāti jarāmaraṇaṃ, idaṃ dukkhaṃ. Avijjā saṅkhārā taṇhā upādānaṃ, ayaṃ samudayo. Iti idaṃ sayaṃkataṃ vīmaṃseyyāti 60 yañca paṭiccasamuppāde dukkhaṃ, idaṃ eso samudayo niddiṭṭho. Avijjānirodhā saṅkhāranirodho ca yāva ca jarāmaraṇanirodhoti ayaṃ nirodho. Imāni tīṇi saccāni dukkhañca samudayo ca nirodho ca.
11. தத்த² கதமங் து³க்க²ஞ்ச ஸமுத³யோ ச மக்³கோ³ ச?
11. Tattha katamaṃ dukkhañca samudayo ca maggo ca?
‘‘யோ து³க்க²மத்³த³க்கி² 61 யதோனிதா³னங், காமேஸு ஸோ ஜந்து கத²ங் நமெய்ய;
‘‘Yo dukkhamaddakkhi 62 yatonidānaṃ, kāmesu so jantu kathaṃ nameyya;
காமா ஹி லோகே ஸங்கா³தி ஞத்வா, தேஸங் ஸதீமா வினயாய ஸிக்கே²’’தி.
Kāmā hi loke saṅgāti ñatvā, tesaṃ satīmā vinayāya sikkhe’’ti.
யோ து³க்க²மத்³த³க்கி², இத³ங் து³க்க²ங். யதோ ப⁴வதி, அயங் ஸமுத³யோ. ஸந்தி³ட்ட²ங் யதோ ப⁴வதி யாவ தஸ்ஸ வினயாய ஸிக்கா², அயங் மக்³கோ³. இமானி தீணி ஸச்சானி.
Yo dukkhamaddakkhi, idaṃ dukkhaṃ. Yato bhavati, ayaṃ samudayo. Sandiṭṭhaṃ yato bhavati yāva tassa vinayāya sikkhā, ayaṃ maggo. Imāni tīṇi saccāni.
ஏகாத³ஸங்கு³த்தரேஸு கோ³பாலகோபமஸுத்தங்.
Ekādasaṅguttaresu gopālakopamasuttaṃ.
தத்த² யாவ ரூபஸஞ்ஞுத்தா யஞ்ச ஸளாயதனங் யதா² வணங் படிச்சா²தே³தி யஞ்ச தித்த²ங் யதா² ச லப⁴தி த⁴ம்மூபஸஞ்ஹிதங் உளாரங் பீதிபாமோஜ்ஜங் சதுப்³பி³த⁴ங் ச அத்தபா⁴வதோ ச வத்து², இத³ங் து³க்க²ங். யாவ ஆஸாடிகங் ஹாரேதா 63 ஹோதி, அயங் ஸமுத³யோ. ரூபஸஞ்ஞுத்தா ஆஸாடகஹரணங் 64 வணபடிச்சா²த³னங் வீதி²ஞ்ஞுதா கோ³சரகுஸலஞ்ச, அயங் மக்³கோ³. அவஸேஸா த⁴ம்மா அத்தி² ஹேதூ அத்தி² பச்சயா அத்தி² நிஸ்ஸயா ஸாவஸேஸதோ³ஹிதா அனேகபூஜா ச கல்யாணமித்ததப்பச்சயா த⁴ம்மா வீதி²ஞ்ஞுதா ச ஹேது, இமானி தீணி ஸச்சானி.
Tattha yāva rūpasaññuttā yañca saḷāyatanaṃ yathā vaṇaṃ paṭicchādeti yañca titthaṃ yathā ca labhati dhammūpasañhitaṃ uḷāraṃ pītipāmojjaṃ catubbidhaṃ ca attabhāvato ca vatthu, idaṃ dukkhaṃ. Yāva āsāṭikaṃ hāretā 65 hoti, ayaṃ samudayo. Rūpasaññuttā āsāṭakaharaṇaṃ 66 vaṇapaṭicchādanaṃ vīthiññutā gocarakusalañca, ayaṃ maggo. Avasesā dhammā atthi hetū atthi paccayā atthi nissayā sāvasesadohitā anekapūjā ca kalyāṇamittatappaccayā dhammā vīthiññutā ca hetu, imāni tīṇi saccāni.
தத்த² கதமங் து³க்க²ஞ்ச மக்³கோ³ ச நிரோதோ⁴ ச?
Tattha katamaṃ dukkhañca maggo ca nirodho ca?
ஸதி காயக³தா உபட்டி²தா, ச²ஸு ப²ஸ்ஸாயதனேஸு ஸங்வுதோ 67;
Sati kāyagatā upaṭṭhitā, chasu phassāyatanesu saṃvuto 68;
ஸததங் பி⁴க்கு² ஸமாஹிதோ, ஜஞ்ஞா 69 நிப்³பா³னமத்தனோ.
Satataṃ bhikkhu samāhito, jaññā 70 nibbānamattano.
தத்த² யா ச காயக³தா ஸதி யஞ்ச ஸளாயதனங் யத்த² ஸப்³ப³ஞ்சேதங் து³க்க²ங். யா ச காயக³தா ஸதி யோ ச ஸீலஸங்வரோ யோ ச ஸமாதி⁴ யத்த² யா ஸதி, அயங் பஞ்ஞாக்க²ந்தோ⁴. ஸப்³ப³ம்பி ஸீலக்க²ந்தோ⁴ ஸமாதி⁴க்க²ந்தோ⁴, அயங் மக்³கோ³. ஏவங்விஹாரினா ஞாதப்³ப³ங் நிப்³பா³னங். அயங் நிரோதோ⁴, இமானி தீணி ஸச்சானி. ஸீலே பதிட்டா²ய த்³வே த⁴ம்மா பா⁴வேதப்³பா³ ஸமதோ² ச விபஸ்ஸனா ச. தத்த² யங் சித்தஸஹஜாதா த⁴ம்மா, இத³ங் து³க்க²ங். யோ ச ஸமதோ² யா ச விபஸ்ஸனா, அயங் மக்³கோ³. ராக³விராகா³ ச சேதோவிமுத்தி, அவிஜ்ஜாவிராகா³ ச பஞ்ஞாவிமுத்தி, அயங் நிரோதோ⁴. இமானி தீணி ஸச்சானி.
Tattha yā ca kāyagatā sati yañca saḷāyatanaṃ yattha sabbañcetaṃ dukkhaṃ. Yā ca kāyagatā sati yo ca sīlasaṃvaro yo ca samādhi yattha yā sati, ayaṃ paññākkhandho. Sabbampi sīlakkhandho samādhikkhandho, ayaṃ maggo. Evaṃvihārinā ñātabbaṃ nibbānaṃ. Ayaṃ nirodho, imāni tīṇi saccāni. Sīle patiṭṭhāya dve dhammā bhāvetabbā samatho ca vipassanā ca. Tattha yaṃ cittasahajātā dhammā, idaṃ dukkhaṃ. Yo ca samatho yā ca vipassanā, ayaṃ maggo. Rāgavirāgā ca cetovimutti, avijjāvirāgā ca paññāvimutti, ayaṃ nirodho. Imāni tīṇi saccāni.
தத்த² கதமோ ஸமுத³யோ ச நிரோதோ⁴ ச?
Tattha katamo samudayo ca nirodho ca?
ஆஸா ச பீஹா அபி⁴னந்த³னா ச, அனேகதா⁴தூஸு ஸரா பதிட்டி²தா;
Āsā ca pīhā abhinandanā ca, anekadhātūsu sarā patiṭṭhitā;
அஞ்ஞாணமூலப்பப⁴வா பஜப்பிதா, ஸப்³பா³ மயா ப்³யந்திகதா ஸமூலிகா.
Aññāṇamūlappabhavā pajappitā, sabbā mayā byantikatā samūlikā.
அஞ்ஞாணமூலப்பப⁴வாதி புரிமகேஹி ஸமுத³யோ. ஸப்³பா³ மயா ப்³யந்திகதா ஸமூலிகாதி நிரோதோ⁴. இமானி த்³வே ஸச்சானி. சதுன்னங் த⁴ம்மானங் அனநுபோ³தா⁴ அப்படிவேதா⁴ வித்தா²ரேன காதப்³ப³ங். அரியஸ்ஸ ஸீலஸ்ஸ ஸமாதி⁴னோ பஞ்ஞாய விமுத்தியா. தத்த² யோ இமேஸங் சதுன்னங் த⁴ம்மானங் அனநுபோ³தா⁴ அப்படிவேதா⁴, அயங் ஸமுத³யோ. படிவேதோ⁴ ப⁴வனெத்தியா, அயங் நிரோதோ⁴. அயங் ஸமுத³யோ ச நிரோதோ⁴ ச.
Aññāṇamūlappabhavāti purimakehi samudayo. Sabbā mayā byantikatā samūlikāti nirodho. Imāni dve saccāni. Catunnaṃ dhammānaṃ ananubodhā appaṭivedhā vitthārena kātabbaṃ. Ariyassa sīlassa samādhino paññāya vimuttiyā. Tattha yo imesaṃ catunnaṃ dhammānaṃ ananubodhā appaṭivedhā, ayaṃ samudayo. Paṭivedho bhavanettiyā, ayaṃ nirodho. Ayaṃ samudayo ca nirodho ca.
தத்த² கதமோ ஸமுத³யோ ச மக்³கோ³ ச?
Tattha katamo samudayo ca maggo ca?
ஸதி தேஸங் நிவாரணங்;
Sati tesaṃ nivāraṇaṃ;
ஸோதானங் ஸங்வரங் ப்³ரூமி, பஞ்ஞாயேதே பிதீ⁴யரே.
Sotānaṃ saṃvaraṃ brūmi, paññāyete pidhīyare.
யானி ஸோதானீதி அயங் ஸமுத³யோ. யா ச பஞ்ஞா யா ச ஸதி நிவாரணங் பிதா⁴னஞ்ச, அயங் மக்³கோ³. இமானி த்³வே ஸச்சானி. ஸஞ்சேதனியங் ஸுத்தங் த³ள்ஹனேமியானாகாரோ ச²ஹி மாஸேஹி நித்³தி³ட்டோ². தத்த² யங் காயங் காயகம்மங் ஸவங்கங் ஸதோ³ஸங் ஸகஸாவங் யா ஸவங்கதா ஸதோ³ஸதா ஸகஸாவதா, அயங் ஸமுத³யோ. ஏவங் வசீகம்மங் மனோகம்மங் அவங்கங் அதோ³ஸங் அகஸாவங், யா அவங்கதா அதோ³ஸதா அகஸாவதா, அயங் மக்³கோ³. ஏவங் வசீகம்மங் மனோகம்மங். இமானி த்³வே ஸச்சானி ஸமுத³யோ ச மக்³கோ³ ச.
Yāni sotānīti ayaṃ samudayo. Yā ca paññā yā ca sati nivāraṇaṃ pidhānañca, ayaṃ maggo. Imāni dve saccāni. Sañcetaniyaṃ suttaṃ daḷhanemiyānākāro chahi māsehi niddiṭṭho. Tattha yaṃ kāyaṃ kāyakammaṃ savaṅkaṃ sadosaṃ sakasāvaṃ yā savaṅkatā sadosatā sakasāvatā, ayaṃ samudayo. Evaṃ vacīkammaṃ manokammaṃ avaṅkaṃ adosaṃ akasāvaṃ, yā avaṅkatā adosatā akasāvatā, ayaṃ maggo. Evaṃ vacīkammaṃ manokammaṃ. Imāni dve saccāni samudayo ca maggo ca.
தத்த² கதமோ ஸமுத³யோ ச நிரோதோ⁴ ச மக்³கோ³ ச?
Tattha katamo samudayo ca nirodho ca maggo ca?
‘‘நிஸ்ஸிதஸ்ஸ சலிதங், அனிஸ்ஸிதஸ்ஸ சலிதங் நத்தி², சலிதே அஸதி பஸ்ஸத்³தி⁴, பஸ்ஸத்³தி⁴யா ஸதி நதி ந ஹோதி, நதியா அஸதி 73 ஆக³திக³தி ந ஹோதி, ஆக³திக³தியா அஸதி சுதூபபாதோ ந ஹோதி, சுதூபபாதே அஸதி நேவித⁴ ந ஹுரங் ந உப⁴யமந்தரேன. ஏஸேவந்தோ து³க்க²ஸ்ஸா’’தி.
‘‘Nissitassa calitaṃ, anissitassa calitaṃ natthi, calite asati passaddhi, passaddhiyā sati nati na hoti, natiyā asati 74 āgatigati na hoti, āgatigatiyā asati cutūpapāto na hoti, cutūpapāte asati nevidha na huraṃ na ubhayamantarena. Esevanto dukkhassā’’ti.
தத்த² த்³வே நிஸ்ஸயா, அயங் ஸமுத³யோ. யோ ச அனிஸ்ஸயோ, யா ச அனதி, அயங் மக்³கோ³. யா ஆக³திக³தி ந ஹோதி சுதூபபாதோ ச யோ ஏஸேவந்தோ து³க்க²ஸ்ஸாதி, அயங் நிரோதோ⁴. இமானி தீணி ஸச்சானி. அனுபட்டி²தகாயக³தா ஸதி…பே॰… யங் விமுத்திஞாணத³ஸ்ஸனங், அயங் ஸமுத³யோ. ஏகாரஸஉபனிஸ்ஸயா விமுத்தியோ யாவ உபனிஸ்ஸயஉபஸம்பதா³ உபட்டி²தகாயக³தாஸதிஸ்ஸ விஹரதி. ஸீலஸங்வரோ ஸோஸானியோ ஹோதி, யஞ்ச விமுத்திஞாணத³ஸ்ஸனங், அயங் மக்³கோ³. யா ச விமுத்தி, அயங் நிரோதோ⁴. இமானி தீணி ஸச்சானி. ஸமுத³யோ ச நிரோதோ⁴ ச மக்³கோ³ ச.
Tattha dve nissayā, ayaṃ samudayo. Yo ca anissayo, yā ca anati, ayaṃ maggo. Yā āgatigati na hoti cutūpapāto ca yo esevanto dukkhassāti, ayaṃ nirodho. Imāni tīṇi saccāni. Anupaṭṭhitakāyagatā sati…pe… yaṃ vimuttiñāṇadassanaṃ, ayaṃ samudayo. Ekārasaupanissayā vimuttiyo yāva upanissayaupasampadā upaṭṭhitakāyagatāsatissa viharati. Sīlasaṃvaro sosāniyo hoti, yañca vimuttiñāṇadassanaṃ, ayaṃ maggo. Yā ca vimutti, ayaṃ nirodho. Imāni tīṇi saccāni. Samudayo ca nirodho ca maggo ca.
12. தத்த² கதமோ நிரோதோ⁴ ச மக்³கோ³ ச?
12. Tattha katamo nirodho ca maggo ca?
ஸயங் கதேன ஸச்சேன, தேன அத்தனா அபி⁴னிப்³பா³னக³தோ விதிண்ணகங்கோ²;
Sayaṃ katena saccena, tena attanā abhinibbānagato vitiṇṇakaṅkho;
விப⁴வஞ்ச ஞத்வா லோகஸ்மிங், தாவ கீ²ணபுனப்³ப⁴வோ ஸ பி⁴க்கு².
Vibhavañca ñatvā lokasmiṃ, tāva khīṇapunabbhavo sa bhikkhu.
யங் ஸச்சேன, அயங் மக்³கோ³. யங் கீ²ணபுனப்³ப⁴வோ, அயங் நிரோதோ⁴. இமானி த்³வே ஸச்சானி. பஞ்ச விமுத்தாயதனானி ஸத்தா² வா த⁴ம்மங் தே³ஸேஸி அஞ்ஞதரோ வா விஞ்ஞூ ஸப்³ரஹ்மசாரீதி வித்தா²ரேன காதப்³பா³. தஸ்ஸ அத்த²ப்படிஸங்வேதி³ஸ்ஸ பாமோஜ்ஜங் ஜாயதி, பமுதி³தஸ்ஸ பீதி ஜாயதி, யாவ நிப்³பி³ந்த³ந்தோ விரஜ்ஜதி, அயங் மக்³கோ³. யா விமுத்தி, அயங் நிரோதோ⁴. ஏவங் பஞ்ச விமுத்தாயதனானி வித்தா²ரேன. இமானி த்³வே ஸச்சானி நிரோதோ⁴ ச மக்³கோ³ ச.
Yaṃ saccena, ayaṃ maggo. Yaṃ khīṇapunabbhavo, ayaṃ nirodho. Imāni dve saccāni. Pañca vimuttāyatanāni satthā vā dhammaṃ desesi aññataro vā viññū sabrahmacārīti vitthārena kātabbā. Tassa atthappaṭisaṃvedissa pāmojjaṃ jāyati, pamuditassa pīti jāyati, yāva nibbindanto virajjati, ayaṃ maggo. Yā vimutti, ayaṃ nirodho. Evaṃ pañca vimuttāyatanāni vitthārena. Imāni dve saccāni nirodho ca maggo ca.
இமானி ஸாதா⁴ரணானி ஸுத்தானி. இமேஹி ஸாதா⁴ரணேஹி ஸுத்தேஹி யதா²னிக்கி²த்தேஹி படிவேத⁴தோ ச லக்க²ணதோ ச ஓதாரெத்வா அஞ்ஞானி ஸுத்தானி நித்³தி³ஸிதப்³பா³னி அபரிஹாயந்தேன. கா³தா²ஹி கா³தா² அனுமினிதப்³பா³, ப்³யாகரணேஹி ப்³யாகரணங். இமே ச ஸாதா⁴ரணா த³ஸ பரிவட்³ட⁴கா ஏகோ ச சதுக்கோ நித்³தே³ஸோ ஸாதா⁴ரணோ. அயஞ்ச பகிண்ணகனித்³தே³ஸோ. ஏகங் பஞ்ச ச² ச ஸவேகதே³ஸோ ஸப்³ப³ங். இமே த்³வே பரிவஜ்ஜனா புரிமகா ச த³ஸ. இமே த்³வாத³ஸ பரிவட்³ட⁴கா ஸச்சானி. எத்தாவதா ஸப்³ப³ங் ஸுத்தங் நத்தி², தங் ப்³யாகரணங் வா கா³தா² விய. இமேஹி த்³வாத³ஸஹி பரிவட்³ட⁴கேஹி ந ஓதரிதுங் அப்பமத்தேன பரியேஸித்வா நித்³தி³ஸிதப்³பா³.
Imāni sādhāraṇāni suttāni. Imehi sādhāraṇehi suttehi yathānikkhittehi paṭivedhato ca lakkhaṇato ca otāretvā aññāni suttāni niddisitabbāni aparihāyantena. Gāthāhi gāthā anuminitabbā, byākaraṇehi byākaraṇaṃ. Ime ca sādhāraṇā dasa parivaḍḍhakā eko ca catukko niddeso sādhāraṇo. Ayañca pakiṇṇakaniddeso. Ekaṃ pañca cha ca savekadeso sabbaṃ. Ime dve parivajjanā purimakā ca dasa. Ime dvādasa parivaḍḍhakā saccāni. Ettāvatā sabbaṃ suttaṃ natthi, taṃ byākaraṇaṃ vā gāthā viya. Imehi dvādasahi parivaḍḍhakehi na otarituṃ appamattena pariyesitvā niddisitabbā.
தத்தா²யங் ஸங்கே²போ. ஸப்³ப³ங் து³க்க²ங் ஸத்தஹி பதே³ஹி ஸமோஸரணங் க³ச்ச²தி. கதரேஹி ஸத்தஹி? அப்பியஸம்பயோகோ³ ச பியவிப்பயோகோ³ ச, இமேஹி த்³வீஹி பதே³ஹி ஸப்³ப³ங் து³க்க²ங் நித்³தி³ஸிதப்³ப³ங். தஸ்ஸ த்³வே நிஸ்ஸயா – காயோ ச சித்தஞ்ச . தேன வுச்சதி ‘‘காயிகங் து³க்க²ங் சேதஸிகஞ்சே’’தி, நத்தி² தங் து³க்க²ங் ந காயிகங் வா ந சேதஸிகங், ஸப்³ப³ங் து³க்க²ங் த்³வீஹி து³க்கே²ஹி நித்³தி³ஸிதப்³ப³ங் காயிகேன ச சேதஸிகேன ச. தீஹி து³க்க²தாஹி ஸங்க³ஹிதங் து³க்க²து³க்க²தாய ஸங்கா²ரது³க்க²தாய விபரிணாமது³க்க²தாய. இதி தங் ஸப்³ப³ங் து³க்க²ங் தீஹி து³க்க²தாஹி ஸங்க³ஹிதங். இதி இத³ஞ்ச து³க்க²ங் திவித⁴ங். து³வித⁴ங் து³க்க²ங் காயிகஞ்ச சேதஸிகஞ்ச. து³வித⁴ங் அப்பியஸம்பயோகோ³ ச பியவிப்பயோகோ³ ச. இத³ங் ஸத்தவித⁴ங் து³க்க²ங்.
Tatthāyaṃ saṅkhepo. Sabbaṃ dukkhaṃ sattahi padehi samosaraṇaṃ gacchati. Katarehi sattahi? Appiyasampayogo ca piyavippayogo ca, imehi dvīhi padehi sabbaṃ dukkhaṃ niddisitabbaṃ. Tassa dve nissayā – kāyo ca cittañca . Tena vuccati ‘‘kāyikaṃ dukkhaṃ cetasikañce’’ti, natthi taṃ dukkhaṃ na kāyikaṃ vā na cetasikaṃ, sabbaṃ dukkhaṃ dvīhi dukkhehi niddisitabbaṃ kāyikena ca cetasikena ca. Tīhi dukkhatāhi saṅgahitaṃ dukkhadukkhatāya saṅkhāradukkhatāya vipariṇāmadukkhatāya. Iti taṃ sabbaṃ dukkhaṃ tīhi dukkhatāhi saṅgahitaṃ. Iti idañca dukkhaṃ tividhaṃ. Duvidhaṃ dukkhaṃ kāyikañca cetasikañca. Duvidhaṃ appiyasampayogo ca piyavippayogo ca. Idaṃ sattavidhaṃ dukkhaṃ.
தத்த² திவிதோ⁴ ஸமுத³யோ அசதுத்தோ² அபஞ்சமோ. கதமோ திவிதோ⁴? தண்ஹா ச தி³ட்டி² ச கம்மங். தத்த² தண்ஹா ச ப⁴வஸமுத³யோ கம்மங். ததா² 75 நிப்³ப³த்தஸ்ஸ ஹீனபணீததா 76, அயங் ஸமுத³யோ. இதி யாபி ப⁴வக³தீஸு ஹீனதா ச பணீததா ச, யாபி தீஹி து³க்க²தாஹி ஸங்க³ஹிதா, யோபி த்³வீஹி மூலேஹி ஸமுதா³னீதோ அவிஜ்ஜாய நிவுதஸ்ஸ ப⁴வதண்ஹாஸங்யுத்தஸ்ஸ ஸவிஞ்ஞாணகோ காயோ, ஸோபி தீஹி து³க்க²தாஹி ஸங்க³ஹிதோ.
Tattha tividho samudayo acatuttho apañcamo. Katamo tividho? Taṇhā ca diṭṭhi ca kammaṃ. Tattha taṇhā ca bhavasamudayo kammaṃ. Tathā 77 nibbattassa hīnapaṇītatā 78, ayaṃ samudayo. Iti yāpi bhavagatīsu hīnatā ca paṇītatā ca, yāpi tīhi dukkhatāhi saṅgahitā, yopi dvīhi mūlehi samudānīto avijjāya nivutassa bhavataṇhāsaṃyuttassa saviññāṇako kāyo, sopi tīhi dukkhatāhi saṅgahito.
ததா² விபல்லாஸதோ தி³ட்டி²ப⁴வக³ந்தப்³பா³. ஸா ஸத்தவிதா⁴ நித்³தி³ஸிதப்³பா³. ஏகோ விபல்லாஸோ தீணி நித்³தி³ஸீயதி, சத்தாரி விபல்லாஸவத்தூ²னி. தத்த² கதமோ ஏகோ விபல்லாஸோ? யோ விபரீதக்³கா³ஹோ படிக்கே²பேன, ஓதரணங் யதா² ‘‘அனிச்சே நிச்ச’’மிதி விபரீதங் க³ண்ஹாதி. ஏவங் சத்தாரோ விபல்லாஸா. அயமேகோ விபல்லாஸீயதி ஸஞ்ஞா சித்தங் தி³ட்டி². கதமானி சத்தாரி விபல்லாஸவத்தூ²னி ? காயோ வேத³னா சித்தங் த⁴ம்மா. ஏவங் விபல்லாஸக³தஸ்ஸ அகுஸலஞ்ச பவட்³டே⁴தி. தத்த² ஸஞ்ஞாவிபல்லாஸோ தோ³ஸங் அகுஸலமூலங் பவட்³டே⁴தி. சித்தவிபல்லாஸோ லோப⁴ங் அகுஸலமூலங் பவட்³டே⁴தி. தி³ட்டி²விபல்லாஸோ மோஹங் அகுஸலமூலங் பவட்³டே⁴தி. தத்த² தோ³ஸஸ்ஸ அகுஸலமூலஸ்ஸ தீணி மிச்ச²த்தானி ப²லங் – மிச்சா²வாசா மிச்சா²கம்மந்தோ மிச்சா²ஆஜீவோ; லோப⁴ஸ்ஸ அகுஸலமூலஸ்ஸ தீணி மிச்ச²த்தானி ப²லங் – மிச்சா²ஸங்கப்போ மிச்சா²வாயாமோ மிச்சா²ஸமாதி⁴; மோஹஸ்ஸ அகுஸலமூலஸ்ஸ த்³வே மிச்ச²த்தானி ப²லங் – மிச்சா²தி³ட்டி² ச மிச்சா²ஸதி ச. ஏவங் அகுஸலங் ஸஹேது ஸப்பச்சயங் விபல்லாஸா ச பச்சயோ, அகுஸலமூலானி ஸஹேதூ ஏதேயேவ படிபக்கே²ன அனூனா அனதி⁴கா த்³வீஹி பச்சயேஹி நித்³தி³ஸிதப்³பா³. நிரோதே⁴ ச மக்³கே³ ச விபல்லாஸமுபாதா³ய பரதோ 79 படிபக்கே²ன சதஸ்ஸோ.
Tathā vipallāsato diṭṭhibhavagantabbā. Sā sattavidhā niddisitabbā. Eko vipallāso tīṇi niddisīyati, cattāri vipallāsavatthūni. Tattha katamo eko vipallāso? Yo viparītaggāho paṭikkhepena, otaraṇaṃ yathā ‘‘anicce nicca’’miti viparītaṃ gaṇhāti. Evaṃ cattāro vipallāsā. Ayameko vipallāsīyati saññā cittaṃ diṭṭhi. Katamāni cattāri vipallāsavatthūni ? Kāyo vedanā cittaṃ dhammā. Evaṃ vipallāsagatassa akusalañca pavaḍḍheti. Tattha saññāvipallāso dosaṃ akusalamūlaṃ pavaḍḍheti. Cittavipallāso lobhaṃ akusalamūlaṃ pavaḍḍheti. Diṭṭhivipallāso mohaṃ akusalamūlaṃ pavaḍḍheti. Tattha dosassa akusalamūlassa tīṇi micchattāni phalaṃ – micchāvācā micchākammanto micchāājīvo; lobhassa akusalamūlassa tīṇi micchattāni phalaṃ – micchāsaṅkappo micchāvāyāmo micchāsamādhi; mohassa akusalamūlassa dve micchattāni phalaṃ – micchādiṭṭhi ca micchāsati ca. Evaṃ akusalaṃ sahetu sappaccayaṃ vipallāsā ca paccayo, akusalamūlāni sahetū eteyeva paṭipakkhena anūnā anadhikā dvīhi paccayehi niddisitabbā. Nirodhe ca magge ca vipallāsamupādāya parato 80 paṭipakkhena catasso.
தத்தி²மா உத்³தா³னகா³தா²
Tatthimā uddānagāthā
அவிஜ்ஜாய நிவுதோ லோகோ, சித்தங் ஸங்யோஜனம்பி;
Avijjāya nivuto loko, cittaṃ saṃyojanampi;
ஸா பச்சி²ன்னப⁴வதண்ஹா, த்³வேமா சேவ விமுத்தியோ.
Sā pacchinnabhavataṇhā, dvemā ceva vimuttiyo.
கும்பூ⁴பமங் காயமிமங், யங் ந தும்ஹாகங் தங் பஜஹ 81;
Kumbhūpamaṃ kāyamimaṃ, yaṃ na tumhākaṃ taṃ pajaha 82;
யே கேசி ஸோகபரிதே³வா, திம்ப³ருகோ ச ஸயங்கதங்.
Ye keci sokaparidevā, timbaruko ca sayaṃkataṃ.
து³க்க²ங் தி³ட்டி² ச உப்பன்னங், யஞ்ச கோ³பாலகோபமங்;
Dukkhaṃ diṭṭhi ca uppannaṃ, yañca gopālakopamaṃ;
ஸதி காயக³தா மாஹு, ஸமதோ² ச விபஸ்ஸனா.
Sati kāyagatā māhu, samatho ca vipassanā.
ஆஸா பிஹா ச அபி⁴னந்த³னா ச, சதுன்னமனநுபோ³த⁴னா;
Āsā pihā ca abhinandanā ca, catunnamananubodhanā;
யானி ஸோதானி லோகஸ்மிங், த³ள்ஹங் நேமியானாகாரோ.
Yāni sotāni lokasmiṃ, daḷhaṃ nemiyānākāro.
யங் நிஸ்ஸிதஸ்ஸ சலிதங், அனுபட்டி²தகாயக³தாஸதி;
Yaṃ nissitassa calitaṃ, anupaṭṭhitakāyagatāsati;
ஸயங் கதேன ஸச்சேன, விமுத்தாயதனேஹி ச.
Sayaṃ katena saccena, vimuttāyatanehi ca.
பேடகோபதே³ஸே மஹாகச்சாயனேன பா⁴ஸிதே பட²மபூ⁴மி அரியஸச்சப்பகாஸனா நாதங் ஜீவதா ப⁴க³வதா மாதி³ஸேன ஸமுத்³த³னேன ததா²க³தேனாதி.
Peṭakopadese mahākaccāyanena bhāsite paṭhamabhūmi ariyasaccappakāsanā nātaṃ jīvatā bhagavatā mādisena samuddanena tathāgatenāti.
Footnotes:
