| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. অরঞ্ঞসুত্তং
10. Araññasuttaṃ
১০. সাৰত্থিনিদানং । একমন্তং ঠিতা খো সা দেৰতা ভগৰন্তং গাথায অজ্ঝভাসি –
10. Sāvatthinidānaṃ . Ekamantaṃ ṭhitā kho sā devatā bhagavantaṃ gāthāya ajjhabhāsi –
‘‘অরঞ্ঞে ৰিহরন্তানং, সন্তানং ব্রহ্মচারিনং।
‘‘Araññe viharantānaṃ, santānaṃ brahmacārinaṃ;
একভত্তং ভুঞ্জমানানং, কেন ৰণ্ণো পসীদতী’’তি॥
Ekabhattaṃ bhuñjamānānaṃ, kena vaṇṇo pasīdatī’’ti.
‘‘অতীতং নানুসোচন্তি, নপ্পজপ্পন্তি নাগতং।
‘‘Atītaṃ nānusocanti, nappajappanti nāgataṃ;
পচ্চুপ্পন্নেন যাপেন্তি, তেন ৰণ্ণো পসীদতি’’॥
Paccuppannena yāpenti, tena vaṇṇo pasīdati’’.
‘‘অনাগতপ্পজপ্পায, অতীতস্সানুসোচনা।
‘‘Anāgatappajappāya, atītassānusocanā;
এতেন বালা সুস্সন্তি, নল়োৰ হরিতো লুতো’’তি॥
Etena bālā sussanti, naḷova harito luto’’ti.
নল়ৰগ্গো পঠমো।
Naḷavaggo paṭhamo.
তস্সুদ্দানং –
Tassuddānaṃ –
ওঘং নিমোক্খং উপনেয্যং, অচ্চেন্তি কতিছিন্দি চ।
Oghaṃ nimokkhaṃ upaneyyaṃ, accenti katichindi ca;
জাগরং অপ্পটিৰিদিতা, সুসম্মুট্ঠা মানকামিনা।
Jāgaraṃ appaṭividitā, susammuṭṭhā mānakāminā;
অরঞ্ঞে দসমো ৰুত্তো, ৰগ্গো তেন পৰুচ্চতি॥
Araññe dasamo vutto, vaggo tena pavuccati.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. অরঞ্ঞসুত্তৰণ্ণনা • 10. Araññasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১০. অরঞ্ঞসুত্তৰণ্ণনা • 10. Araññasuttavaṇṇanā
