| Library / Tipiṭaka / তিপিটক • Tipiṭaka / জাতক-অট্ঠকথা • Jātaka-aṭṭhakathā |
[৩৪৮] ৮. অরঞ্ঞজাতকৰণ্ণনা
[348] 8. Araññajātakavaṇṇanā
অরঞ্ঞা গামমাগম্মাতি ইদং সত্থা জেতৰনে ৰিহরন্তো থুল্লকুমারিকাপলোভনং আরব্ভ কথেসি। ৰত্থু চূল়নারদকস্সপজাতকে (জা॰ ১.১৩.৪০ আদযো) আৰি ভৰিস্সতি।
Araññāgāmamāgammāti idaṃ satthā jetavane viharanto thullakumārikāpalobhanaṃ ārabbha kathesi. Vatthu cūḷanāradakassapajātake (jā. 1.13.40 ādayo) āvi bhavissati.
অতীতে বারাণসিযং ব্রহ্মদত্তে রজ্জং কারেন্তে বোধিসত্তো ব্রাহ্মণকুলে নিব্বত্তিত্ৰা ৰযপ্পত্তো তক্কসিলাযং উগ্গহিতসিপ্পো ভরিযায কালকতায পুত্তং গহেত্ৰা ইসিপব্বজ্জং পব্বজিত্ৰা হিমৰন্তে ৰসন্তো পুত্তং অস্সমপদে ঠপেত্ৰা ফলাফলত্থায গচ্ছতি। তদা চোরেসু পচ্চন্তগামং পহরিত্ৰা করমরে গহেত্ৰা গচ্ছন্তেসু একা কুমারিকা পলাযিত্ৰা তং অস্সমপদং পত্ৰা তাপসকুমারং পলোভেত্ৰা সীলৰিনাসং পাপেত্ৰা ‘‘এহি গচ্ছামা’’তি আহ। ‘‘পিতা তাৰ মে আগচ্ছতু, তং পস্সিত্ৰা গমিস্সামী’’তি। ‘‘তেন হি দিস্ৰা আগচ্ছা’’তি নিক্খমিত্ৰা অন্তরামগ্গে নিসীদি। তাপসকুমারো পিতরি আগতে পঠমং গাথমাহ –
Atīte bārāṇasiyaṃ brahmadatte rajjaṃ kārente bodhisatto brāhmaṇakule nibbattitvā vayappatto takkasilāyaṃ uggahitasippo bhariyāya kālakatāya puttaṃ gahetvā isipabbajjaṃ pabbajitvā himavante vasanto puttaṃ assamapade ṭhapetvā phalāphalatthāya gacchati. Tadā coresu paccantagāmaṃ paharitvā karamare gahetvā gacchantesu ekā kumārikā palāyitvā taṃ assamapadaṃ patvā tāpasakumāraṃ palobhetvā sīlavināsaṃ pāpetvā ‘‘ehi gacchāmā’’ti āha. ‘‘Pitā tāva me āgacchatu, taṃ passitvā gamissāmī’’ti. ‘‘Tena hi disvā āgacchā’’ti nikkhamitvā antarāmagge nisīdi. Tāpasakumāro pitari āgate paṭhamaṃ gāthamāha –
১৮৫.
185.
‘‘অরঞ্ঞা গামমাগম্ম, কিংসীলং কিংৰতং অহং।
‘‘Araññā gāmamāgamma, kiṃsīlaṃ kiṃvataṃ ahaṃ;
পুরিসং তাত সেৰেয্যং, তং মে অক্খাহি পুচ্ছিতো’’তি॥
Purisaṃ tāta seveyyaṃ, taṃ me akkhāhi pucchito’’ti.
তত্থ অরঞ্ঞা গামমাগম্মাতি তাত অহং ইতো অরঞ্ঞতো মনুস্সপথং ৰসনত্থায গতো ৰসনগামং পত্ৰা কিং করোমীতি।
Tattha araññā gāmamāgammāti tāta ahaṃ ito araññato manussapathaṃ vasanatthāya gato vasanagāmaṃ patvā kiṃ karomīti.
অথস্স পিতা ওৰাদং দদন্তো তিস্সো গাথা অভাসি –
Athassa pitā ovādaṃ dadanto tisso gāthā abhāsi –
১৮৬.
186.
‘‘যো তং ৰিস্সাসযে তাত, ৰিস্সাসঞ্চ খমেয্য তে।
‘‘Yo taṃ vissāsaye tāta, vissāsañca khameyya te;
সুস্সূসী চ তিতিক্খী চ, তং ভজেহি ইতো গতো॥
Sussūsī ca titikkhī ca, taṃ bhajehi ito gato.
১৮৭.
187.
‘‘যস্স কাযেন ৰাচায, মনসা নত্থি দুক্কটং।
‘‘Yassa kāyena vācāya, manasā natthi dukkaṭaṃ;
উরসীৰ পতিট্ঠায, তং ভজেহি ইতো গতো॥
Urasīva patiṭṭhāya, taṃ bhajehi ito gato.
১৮৮.
188.
‘‘হলিদ্দিরাগং কপিচিত্তং, পুরিসং রাগৰিরাগিনং।
‘‘Haliddirāgaṃ kapicittaṃ, purisaṃ rāgavirāginaṃ;
তাদিসং তাত মা সেৰি, নিম্মনুস্সম্পি চে সিযা’’তি॥
Tādisaṃ tāta mā sevi, nimmanussampi ce siyā’’ti.
তত্থ যো তং ৰিস্সাসযেতি যো পুরিসো তং ৰিস্সাসেয্য ন পরিসঙ্কেয্য। ৰিস্সাসঞ্চ খমেয্য তেতি যো চ অত্তনি কযিরমানং তৰ ৰিস্সাসং পত্তো নিরাসঙ্কো তং খমেয্য। সুস্সূসীতি যো চ তৰ ৰিস্সাসৰচনং সোতুমিচ্ছতি। তিতিক্খীতি যো চ তযা কতং অপরাধং খমতি। তং ভজেহীতি তং পুরিসং ভজেয্যাসি পযিরুপাসেয্যাসি। উরসীৰ পতিট্ঠাযাতি যথা তস্স উরসি পতিট্ঠায ৰড্ঢিতো ওরসপুত্তো ত্ৰম্পি তাদিসো উরসি পতিট্ঠিতপুত্তো ৰিয হুত্ৰা এৰরূপং পুরিসং ভজেয্যাসীতি অত্থো।
Tattha yo taṃ vissāsayeti yo puriso taṃ vissāseyya na parisaṅkeyya. Vissāsañca khameyya teti yo ca attani kayiramānaṃ tava vissāsaṃ patto nirāsaṅko taṃ khameyya. Sussūsīti yo ca tava vissāsavacanaṃ sotumicchati. Titikkhīti yo ca tayā kataṃ aparādhaṃ khamati. Taṃ bhajehīti taṃ purisaṃ bhajeyyāsi payirupāseyyāsi. Urasīva patiṭṭhāyāti yathā tassa urasi patiṭṭhāya vaḍḍhito orasaputto tvampi tādiso urasi patiṭṭhitaputto viya hutvā evarūpaṃ purisaṃ bhajeyyāsīti attho.
হলিদ্দিরাগন্তি হলিদ্দিরাগসদিসং অথিরচিত্তং। কপিচিত্তন্তি লহুপরিৰত্তিতায মক্কটচিত্তং। রাগৰিরাগিনন্তি মুহুত্তেনেৰ রজ্জনৰিরজ্জনসভাৰং। নিম্মনুস্সম্পি চে সিযাতি সচেপি সকলং জম্বুদীপতলং কাযদুচ্চরিতাদিৰিরহিতস্স মনুস্সস্স অভাৰেন নিম্মনুস্সং সিযা , তথাপি, তাত, তাদিসং লহুচিত্তং মা সেৰি, সব্বম্পি মনুস্সপথং ৰিচিনিত্ৰা হেট্ঠা ৰুত্তগুণসম্পন্নমেৰ ভজেয্যাসীতি অত্থো।
Haliddirāganti haliddirāgasadisaṃ athiracittaṃ. Kapicittanti lahuparivattitāya makkaṭacittaṃ. Rāgavirāginanti muhutteneva rajjanavirajjanasabhāvaṃ. Nimmanussampi ce siyāti sacepi sakalaṃ jambudīpatalaṃ kāyaduccaritādivirahitassa manussassa abhāvena nimmanussaṃ siyā , tathāpi, tāta, tādisaṃ lahucittaṃ mā sevi, sabbampi manussapathaṃ vicinitvā heṭṭhā vuttaguṇasampannameva bhajeyyāsīti attho.
তং সুত্ৰা তাপসকুমারো ‘‘অহং, তাত, ইমেহি গুণেহি সমন্নাগতং পুরিসং কত্থ লভিস্সামি, ন গচ্ছামি, তুম্হাকঞ্ঞেৰ সন্তিকে ৰসিস্সামী’’তি ৰত্ৰা নিৰত্তি। অথস্স পিতা কসিণপরিকম্মং আচিক্খি। উভোপি অপরিহীনজ্ঝানা ব্রহ্মলোকপরাযণা অহেসুং।
Taṃ sutvā tāpasakumāro ‘‘ahaṃ, tāta, imehi guṇehi samannāgataṃ purisaṃ kattha labhissāmi, na gacchāmi, tumhākaññeva santike vasissāmī’’ti vatvā nivatti. Athassa pitā kasiṇaparikammaṃ ācikkhi. Ubhopi aparihīnajjhānā brahmalokaparāyaṇā ahesuṃ.
সত্থা ইমং ধম্মদেসনং আহরিত্ৰা জাতকং সমোধানেসি – ‘‘তদা পুত্তো চ কুমারিকা চ এতেযেৰ অহেসুং, পিতা তাপসো পন অহমেৰ অহোসি’’ন্তি।
Satthā imaṃ dhammadesanaṃ āharitvā jātakaṃ samodhānesi – ‘‘tadā putto ca kumārikā ca eteyeva ahesuṃ, pitā tāpaso pana ahameva ahosi’’nti.
অরঞ্ঞজাতকৰণ্ণনা অট্ঠমা।
Araññajātakavaṇṇanā aṭṭhamā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / জাতকপাল়ি • Jātakapāḷi / ৩৪৮. অরঞ্ঞজাতকং • 348. Araññajātakaṃ
