| Library / Tipiṭaka / ติปิฎก • Tipiṭaka / สํยุตฺตนิกาย (ฎีกา) • Saṃyuttanikāya (ṭīkā) |
๑๑. อรณสุตฺตวณฺณนา
11. Araṇasuttavaṇṇanā
๘๑. รณนฺติ กนฺทนฺติ เอเตหีติ รณา, ราคาทโยฯ เตหิ อภิภูตตาย หิ สตฺตา นานปฺปการํ กนฺทนฺติ ปริเทวนฺติฯ เต ปน สพฺพโส นตฺถิ เอเตสํ รณาติ อรณาฯ นิกฺกิเลสา ขีณาสวาฯ วุสิตวาโสติ วุสิตพฺรหฺมจริยวาโสฯ โภชิสฺสิยนฺติ ภุชิสฺสภาโวฯ เตนาห ‘‘อทาสภาโว’’ติฯ สมณาติ สมิตปาปสมณาติ อาห ‘‘ขีณาสวสมณา’’ติฯ ปุถุชฺชนกลฺยาณกาเล โลกิยปริญฺญาย, เสกฺขา ปุพฺพภาเค โลกิยปริญฺญาย, ปจฺจเวกฺขเณ โลกิยโลกุตฺตราย ปริญฺญาย ปริเญฺญยฺยํ เตภูมกํ ขนฺธปญฺจกํ ปริชานนฺติ ปริจฺฉิชฺชนฺติฯ ขีณาสวา ปน ปริญฺญาตปริเญฺญยฺยา โหนฺติฯ ตถา หิ เต สามี หุตฺวา ปริภุญฺชนฺติฯ วนฺทนฺติ นํ ปติฎฺฐิตนฺติ วุตฺตํ, วนฺทนียภาโว จ สีลสมฺปนฺนตายาติ อาห ‘‘ปติฎฺฐิตนฺติ สีเล ปติฎฺฐิต’’นฺติฯ อิธาติ อิมสฺมิํ โลเกฯ ขตฺติยาติ ลกฺขณวจนนฺติ อาห ‘‘น เกวลํ ขตฺติยาวา’’ติอาทิฯ
81. Raṇanti kandanti etehīti raṇā, rāgādayo. Tehi abhibhūtatāya hi sattā nānappakāraṃ kandanti paridevanti. Te pana sabbaso natthi etesaṃ raṇāti araṇā. Nikkilesā khīṇāsavā. Vusitavāsoti vusitabrahmacariyavāso. Bhojissiyanti bhujissabhāvo. Tenāha ‘‘adāsabhāvo’’ti. Samaṇāti samitapāpasamaṇāti āha ‘‘khīṇāsavasamaṇā’’ti. Puthujjanakalyāṇakāle lokiyapariññāya, sekkhā pubbabhāge lokiyapariññāya, paccavekkhaṇe lokiyalokuttarāya pariññāya pariññeyyaṃ tebhūmakaṃ khandhapañcakaṃ parijānanti paricchijjanti. Khīṇāsavā pana pariññātapariññeyyā honti. Tathā hi te sāmī hutvā paribhuñjanti. Vandanti naṃ patiṭṭhitanti vuttaṃ, vandanīyabhāvo ca sīlasampannatāyāti āha ‘‘patiṭṭhitanti sīle patiṭṭhita’’nti. Idhāti imasmiṃ loke. Khattiyāti lakkhaṇavacananti āha ‘‘na kevalaṃ khattiyāvā’’tiādi.
อรณสุตฺตวณฺณนา นิฎฺฐิตาฯ
Araṇasuttavaṇṇanā niṭṭhitā.
เฉตฺวาวคฺควณฺณนา นิฎฺฐิตาฯ
Chetvāvaggavaṇṇanā niṭṭhitā.
สารตฺถปฺปกาสินิยา สํยุตฺตนิกาย-อฎฺฐกถาย
Sāratthappakāsiniyā saṃyuttanikāya-aṭṭhakathāya
เทวตาสํยุตฺตวณฺณนาย ลีนตฺถปฺปกาสนา สมตฺตาฯ
Devatāsaṃyuttavaṇṇanāya līnatthappakāsanā samattā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๑๑. อรณสุตฺตํ • 11. Araṇasuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๑๑. อรณสุตฺตวณฺณนา • 11. Araṇasuttavaṇṇanā
