| Library / Tipiṭaka / ติปิฎก • Tipiṭaka / ธมฺมปทปาฬิ • Dhammapadapāḷi |
๗. อรหนฺตวโคฺค
7. Arahantavaggo
๙๐.
90.
คตทฺธิโน วิโสกสฺส, วิปฺปมุตฺตสฺส สพฺพธิ;
Gataddhino visokassa, vippamuttassa sabbadhi;
สพฺพคนฺถปฺปหีนสฺส, ปริฬาโห น วิชฺชติฯ
Sabbaganthappahīnassa, pariḷāho na vijjati.
๙๑.
91.
อุยฺยุญฺชนฺติ สตีมโนฺต, น นิเกเต รมนฺติ เต;
Uyyuñjanti satīmanto, na nikete ramanti te;
หํสาว ปลฺลลํ หิตฺวา, โอกโมกํ ชหนฺติ เตฯ
Haṃsāva pallalaṃ hitvā, okamokaṃ jahanti te.
๙๒.
92.
เยสํ สนฺนิจโย นตฺถิ, เย ปริญฺญาตโภชนา;
Yesaṃ sannicayo natthi, ye pariññātabhojanā;
สุญฺญโต อนิมิโตฺต จ, วิโมโกฺข เยสํ โคจโร;
Suññato animitto ca, vimokkho yesaṃ gocaro;
๙๓.
93.
ยสฺสาสวา ปริกฺขีณา, อาหาเร จ อนิสฺสิโต;
Yassāsavā parikkhīṇā, āhāre ca anissito;
สุญฺญโต อนิมิโตฺต จ, วิโมโกฺข ยสฺส โคจโร;
Suññato animitto ca, vimokkho yassa gocaro;
อากาเส ว สกุนฺตานํ, ปทํ ตสฺส ทุรนฺนยํฯ
Ākāse va sakuntānaṃ, padaṃ tassa durannayaṃ.
๙๔.
94.
ยสฺสินฺทฺริยานิ สมถงฺคตานิ 3, อสฺสา ยถา สารถินา สุทนฺตา;
Yassindriyāni samathaṅgatāni 4, assā yathā sārathinā sudantā;
ปหีนมานสฺส อนาสวสฺส, เทวาปิ ตสฺส ปิหยนฺติ ตาทิโนฯ
Pahīnamānassa anāsavassa, devāpi tassa pihayanti tādino.
๙๕.
95.
ปถวิสโม โน วิรุชฺฌติ, อินฺทขิลุปโม 5 ตาทิ สุพฺพโต;
Pathavisamo no virujjhati, indakhilupamo 6 tādi subbato;
รหโทว อเปตกทฺทโม, สํสารา น ภวนฺติ ตาทิโนฯ
Rahadova apetakaddamo, saṃsārā na bhavanti tādino.
๙๖.
96.
สนฺตํ ตสฺส มนํ โหติ, สนฺตา วาจา จ กมฺม จ;
Santaṃ tassa manaṃ hoti, santā vācā ca kamma ca;
สมฺมทญฺญา วิมุตฺตสฺส, อุปสนฺตสฺส ตาทิโนฯ
Sammadaññā vimuttassa, upasantassa tādino.
๙๗.
97.
อสฺสโทฺธ อกตญฺญู จ, สนฺธิเจฺฉโท จ โย นโร;
Assaddho akataññū ca, sandhicchedo ca yo naro;
หตาวกาโส วนฺตาโส, ส เว อุตฺตมโปริโสฯ
Hatāvakāso vantāso, sa ve uttamaporiso.
๙๘.
98.
คาเม วา ยทิ วารเญฺญ, นิเนฺน วา ยทิ วา ถเล;
Gāme vā yadi vāraññe, ninne vā yadi vā thale;
ยตฺถ อรหโนฺต วิหรนฺติ, ตํ ภูมิรามเณยฺยกํฯ
Yattha arahanto viharanti, taṃ bhūmirāmaṇeyyakaṃ.
๙๙.
99.
รมณียานิ อรญฺญานิ, ยตฺถ น รมตี ชโน;
Ramaṇīyāni araññāni, yattha na ramatī jano;
วีตราคา รมิสฺสนฺติ, น เต กามคเวสิโนฯ
Vītarāgā ramissanti, na te kāmagavesino.
อรหนฺตวโคฺค สตฺตโม นิฎฺฐิโตฯ
Arahantavaggo sattamo niṭṭhito.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / ธมฺมปท-อฎฺฐกถา • Dhammapada-aṭṭhakathā / ๗. อรหนฺตวโคฺค • 7. Arahantavaggo
