| Library / Tipiṭaka / តិបិដក • Tipiṭaka / បាចិត្យាទិយោជនាបាឡិ • Pācityādiyojanāpāḷi |
៩២. អាបត្តិបដិកម្មវិធិកថា
92. Āpattipaṭikammavidhikathā
១៦៩. ភគវតា…បេ.… កាតព្ពោតិ ឥទំ វេទិតព្ពន្តិ សម្ពន្ធោ។ ‘‘យស្ស សិយា អាបត្តីតិអាទិវចនេនេវ ចា’’តិអាទិហេតុត្តយេន ‘‘ន សាបត្តិកេន ឧបោសថោ កាតព្ពោ’’តិ យថារុតំ អបញ្ញត្តម្បិ អត្ថតោ សិទ្ធមេវាតិ ទស្សេតិ។ ហេតុត្តយំ ‘‘វេទិតព្ព’’ន្តិ បទេន យោជេតព្ពំ។ ថុល្លច្ចយាទីសូតិ អាទិសទ្ទេន បាចិត្តិយបាដិទេសនីយទុក្កដទុព្ភាសិតាបត្តិយោ សង្គណ្ហាតិ។ ‘‘តំ បដិទេសេមី’’តិ ឥទំ សុវុត្តមេវ ហោតីតិ សម្ពន្ធោ។ តន្តិ អាបត្តិំ។ តុម្ហមូលេតិ តុម្ហំ សន្តិកេ។ និគ្គហិតលោបញ្ហិ វាក្យមេវ, ន សមាសោ។ ‘‘តុម្ហ’’ ឥតិ ច ‘‘តុយ្ហ’’ ឥតិ ច នវកត្ថេរានំ វត្តព្ពាការទស្សនមត្តមេវ, ន ឥច្ឆិតត្ថវិបត្តិទស្សនំ។ វុត្តម្បីតិ បិសទ្ទេន ន កេវលំ បាឡិនយេនេវ សុវុត្តំ, ឥមិនា នយេនបិ សុវុត្តន្តិ ទស្សេតិ។ ‘‘បស្សសី’’តិ ឥទញ្ច វត្តព្ពន្តិ សម្ពន្ធោ។ វត្តព្ពាការំ បន សុវិញ្ញេយ្យំ។ ‘‘អាម បស្សាមី’’តិ ឥទំ បន សុវុត្តមេវ ហោតីតិ សម្ពន្ធោ។ វុត្តម្បីតិ បិសទ្ទោ បាឡិនយំ សម្បិណ្ឌេតិ។ អាយតិំ សំវរេយ្យាសីតិ ឯត្ថ បន វត្តព្ពោតិ សម្ពន្ធោ។ គរូសុ ពហុវចនស្ស កត្តព្ពត្តា វុត្តំ ‘‘សំវរេយ្យាថា’’តិ។ ឯវំ វុត្តេន អាបត្តិទេសកេនាតិ សម្ពន្ធោ។
169. Bhagavatā…pe… kātabboti idaṃ veditabbanti sambandho. ‘‘Yassa siyā āpattītiādivacaneneva cā’’tiādihetuttayena ‘‘na sāpattikena uposatho kātabbo’’ti yathārutaṃ apaññattampi atthato siddhamevāti dasseti. Hetuttayaṃ ‘‘veditabba’’nti padena yojetabbaṃ. Thullaccayādīsūti ādisaddena pācittiyapāṭidesanīyadukkaṭadubbhāsitāpattiyo saṅgaṇhāti. ‘‘Taṃ paṭidesemī’’ti idaṃ suvuttameva hotīti sambandho. Tanti āpattiṃ. Tumhamūleti tumhaṃ santike. Niggahitalopañhi vākyameva, na samāso. ‘‘Tumha’’ iti ca ‘‘tuyha’’ iti ca navakattherānaṃ vattabbākāradassanamattameva, na icchitatthavipattidassanaṃ. Vuttampīti pisaddena na kevalaṃ pāḷinayeneva suvuttaṃ, iminā nayenapi suvuttanti dasseti. ‘‘Passasī’’ti idañca vattabbanti sambandho. Vattabbākāraṃ pana suviññeyyaṃ. ‘‘Āma passāmī’’ti idaṃ pana suvuttameva hotīti sambandho. Vuttampīti pisaddo pāḷinayaṃ sampiṇḍeti. Āyatiṃ saṃvareyyāsīti ettha pana vattabboti sambandho. Garūsu bahuvacanassa kattabbattā vuttaṃ ‘‘saṃvareyyāthā’’ti. Evaṃ vuttena āpattidesakenāti sambandho.
តត្រាតិ ‘‘យទា និព្ពេមតិកោ’’តិ បាឋេ។ សូរិយេ មេឃច្ឆន្នេ សតីតិ យោជនា។ តេន ភិក្ខុនា វត្តព្ពន្តិ សម្ពន្ធោ, វត្ថុំ កិត្តេត្វាតិ ភោជនសង្ខាតំ វត្ថុំ កិត្តេត្វា។ តាតិ អាបត្តិយោ។
Tatrāti ‘‘yadā nibbematiko’’ti pāṭhe. Sūriye meghacchanne satīti yojanā. Tena bhikkhunā vattabbanti sambandho, vatthuṃ kittetvāti bhojanasaṅkhātaṃ vatthuṃ kittetvā. Tāti āpattiyo.
សភាគា អាបត្តីតិ ឯត្ថ ទ្វីសុ វត្ថុសភាគអាបត្តិសភាគាសុ វត្ថុសភាគាវ អធិប្បេតាតិ ទស្សេន្តោ អាហ ‘‘យំ ទ្វេបិ ជនា’’តិអាទិ។ យំ អាបត្តិន្តិ សម្ពន្ធោ។ សមានោ ភាគោ ឯតាសន្តិ សភាគា។ ទេសេតុំ វដ្ដតីតិ អាបត្តិសភាគាបិ វត្ថុវិសភាគត្តា ទេសេតុំ វដ្ដតិ។ សុទេសិតាវាតិ អាបត្តិតោ ភិក្ខុ វុដ្ឋាតិយេវាតិ អធិប្បាយោ។ អញ្ញំ ទុក្កដន្តិ សម្ពន្ធោ។ បនសទ្ទោ គរហត្ថជោតកោ សុទេសិតាយ គរហាការេន បវត្តត្តា។ កិញ្ចាបិ សុទេសិតាវ, បន តថាបីតិ យោជនា។ តន្តិ ទុក្កដំ។ នានាវត្ថុកន្តិ ទេសនាបដិគ្គហណវសេន នានាវត្ថុកំ។
Sabhāgā āpattīti ettha dvīsu vatthusabhāgaāpattisabhāgāsu vatthusabhāgāva adhippetāti dassento āha ‘‘yaṃ dvepi janā’’tiādi. Yaṃ āpattinti sambandho. Samāno bhāgo etāsanti sabhāgā. Desetuṃ vaṭṭatīti āpattisabhāgāpi vatthuvisabhāgattā desetuṃ vaṭṭati. Sudesitāvāti āpattito bhikkhu vuṭṭhātiyevāti adhippāyo. Aññaṃ dukkaṭanti sambandho. Panasaddo garahatthajotako sudesitāya garahākārena pavattattā. Kiñcāpi sudesitāva, pana tathāpīti yojanā. Tanti dukkaṭaṃ. Nānāvatthukanti desanāpaṭiggahaṇavasena nānāvatthukaṃ.
១៧០. សភាគោយេវ វត្តព្ពោ, ន វិសភាគោ។ ហីតិ សច្ចំ, យស្មា វា។ តស្សាតិ វិសភាគស្ស។ ឥតោតិ សង្ឃសន្និបាតតោ។
170. Sabhāgoyeva vattabbo, na visabhāgo. Hīti saccaṃ, yasmā vā. Tassāti visabhāgassa. Itoti saṅghasannipātato.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi
៩២. អាបត្តិបដិកម្មវិធិ • 92. Āpattipaṭikammavidhi
៩៣. អាបត្តិអាវិករណវិធិ • 93. Āpattiāvikaraṇavidhi
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā / អាបត្តិបដិកម្មវិធិកថា • Āpattipaṭikammavidhikathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / អាបត្តិបដិកម្មវិធិកថាវណ្ណនា • Āpattipaṭikammavidhikathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / អាបត្តិបដិកម្មវិធិកថាទិវណ្ណនា • Āpattipaṭikammavidhikathādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ឆន្ទទានកថាទិវណ្ណនា • Chandadānakathādivaṇṇanā
