| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၆. အနုပခဇ္ဇသိက္ခာပဒဝဏ္ဏနာ
6. Anupakhajjasikkhāpadavaṇṇanā
‘‘ဇာန’’န္တိ ဝုတ္တေ ‘‘အနုဋ္ဌာပနီယော ‘အယ’န္တိ ဇာနန္တော’’တိ အယံ ဝိသေသော ကုတော လဗ္ဘတီတိ အာဟ ‘‘တေနေဝသ္သာ’’တိအာဒိ။ နနု ပဒဘာဇနေပိ ဝုဍ္ဎဘာဝာဒိဇာနနမေဝ ဝုတ္တံ, န တု အနုဋ္ဌာပနီယဘာဝန္တိ အနုယောဂံ သန္ဓာယာဟ ‘‘ဝုဍ္ဎော ဟီ’’တိအာဒိ။ ဗဟူပကာရတန္တိ ‘‘ဘဏ္ဍာဂာရိကတ္တာဒိဗဟုဥပကာရဘာဝံ’’။ န ကေဝလံ ဣဒမေဝာတိ အာဟ ‘‘ဂုဏဝိသိဋ္ဌတဉ္စာ’’တိအာဒိ, တေန ဗဟူပကာရတ္တေပိ ဂုဏဝိသိဋ္ဌတ္တာဘာဝေ, ဂုဏဝိသိဋ္ဌတ္တေပိ ဗဟူပကာရတ္တာဘာဝေ ဒာတုံ န ဝဋ္ဋတီတိ ဒသ္သေတိ။ ‘‘ဘဏ္ဍာဂာရိကသ္သ ဗဟူပကာရတံ, ဓမ္မကထိကာဒီနံ ဂုဏဝိသိဋ္ဌတဉ္စ သလ္လက္ခေတ္ဝာ’’တိ (သာရတ္ထ. ဋီ. ပာစိတ္တိယ ၃.၁၁၉-၁၂၁) ကေစိ။ ဓုဝဝာသတ္ထာယာတိ နိစ္စဝာသတ္ထာယ။ သမ္မန္နိတ္ဝာတိ အပလောကနေန ကမ္မေန သမ္မန္နိတ္ဝာ။ ကာမဉ္စေတ္ထ ဂိလာနသ္သာပိ သင္ဃောယေဝ အနုစ္ဆဝိကံ သေနာသနံ ဒေတိ, ဂိလာနော ပန အပလောကေတ္ဝာ သင္ဃေန အဒိန္နသေနာသနောပိ န ပီဠေတဗ္ဗော အနုကမ္ပိတဗ္ဗောတိ ဒသ္သေတုံ ဝိသုံ ဝုတ္တော။
‘‘Jāna’’nti vutte ‘‘anuṭṭhāpanīyo ‘aya’nti jānanto’’ti ayaṃ viseso kuto labbhatīti āha ‘‘tenevassā’’tiādi. Nanu padabhājanepi vuḍḍhabhāvādijānanameva vuttaṃ, na tu anuṭṭhāpanīyabhāvanti anuyogaṃ sandhāyāha ‘‘vuḍḍho hī’’tiādi. Bahūpakāratanti ‘‘bhaṇḍāgārikattādibahuupakārabhāvaṃ’’. Na kevalaṃ idamevāti āha ‘‘guṇavisiṭṭhatañcā’’tiādi, tena bahūpakārattepi guṇavisiṭṭhattābhāve, guṇavisiṭṭhattepi bahūpakārattābhāve dātuṃ na vaṭṭatīti dasseti. ‘‘Bhaṇḍāgārikassa bahūpakārataṃ, dhammakathikādīnaṃ guṇavisiṭṭhatañca sallakkhetvā’’ti (sārattha. ṭī. pācittiya 3.119-121) keci. Dhuvavāsatthāyāti niccavāsatthāya. Sammannitvāti apalokanena kammena sammannitvā. Kāmañcettha gilānassāpi saṅghoyeva anucchavikaṃ senāsanaṃ deti, gilāno pana apaloketvā saṅghena adinnasenāsanopi na pīḷetabbo anukampitabboti dassetuṃ visuṃ vutto.
သမန္တာ ဒိယဍ္ဎော ဟတ္ထောတိ မဇ္ဈေ ပညတ္တံ မဉ္စပီဌံ သန္ဓာယ ဝုတ္တံ။ ဧကပသ္သေန စေ ပဟောနကဒိသာ ဒိသ္သတိ, တတော ဂဟေတဗ္ဗံ။ ပာဒဓောဝနပာသာဏတောတိ ဒ္ဝာရေ နိက္ခိတ္တပာဒဓောဝနပာသာဏတော။ နိသီဒန္တသ္သ ဝာ နိပဇ္ဇန္တသ္သ ဝာ ပာစိတ္တိယန္တိ ဧတ္ထ နိသီဒနမတ္တေန, နိပဇ္ဇနမတ္တေနေဝ ဝာ ပာစိတ္တိယံ။ ပုနပ္ပုနံ ကရောန္တသ္သာတိ ဥဋ္ဌာယုဋ္ဌာယ နိသီဒတော ဝာ နိပဇ္ဇတော ဝာ။
Samantā diyaḍḍho hatthoti majjhe paññattaṃ mañcapīṭhaṃ sandhāya vuttaṃ. Ekapassena ce pahonakadisā dissati, tato gahetabbaṃ. Pādadhovanapāsāṇatoti dvāre nikkhittapādadhovanapāsāṇato. Nisīdantassa vā nipajjantassa vā pācittiyanti ettha nisīdanamattena, nipajjanamatteneva vā pācittiyaṃ. Punappunaṃ karontassāti uṭṭhāyuṭṭhāya nisīdato vā nipajjato vā.
သင္ဃိကေ သင္ဃိကသညိဝေမတိကပုဂ္ဂလိကသညီနံ ဝသေန တိကပာစိတ္တိယံ ဝေဒိတဗ္ဗံ။ တိကဒုက္ကဋံ ပန ပုဂ္ဂလိကေ သင္ဃိကသညိဝေမတိကအညပုဂ္ဂလိကသညီနံ ဝသေန။ ဝိဟာရသ္သ ဥပစာရေတိ တသ္သ ဗဟိ အာသန္နပ္ပဒေသေ။
Saṅghike saṅghikasaññivematikapuggalikasaññīnaṃ vasena tikapācittiyaṃ veditabbaṃ. Tikadukkaṭaṃ pana puggalike saṅghikasaññivematikaaññapuggalikasaññīnaṃ vasena. Vihārassa upacāreti tassa bahi āsannappadese.
အနုပခဇ္ဇသိက္ခာပဒဝဏ္ဏနာ နိဋ္ဌိတာ။
Anupakhajjasikkhāpadavaṇṇanā niṭṭhitā.
