| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၇. နိက္ကဍ္ဎနသိက္ခာပဒဝဏ္ဏနာ
7. Nikkaḍḍhanasikkhāpadavaṇṇanā
အနေကကောဋ္ဌကာနီတိ အနေကဒ္ဝာရကောဋ္ဌကာနိ။ ‘‘နိက္ခမာတိ ဝစနံ သုတ္ဝာ အတ္တနော ရုစိယာ စေ နိက္ခမတိ, အနာပတ္တီ’’တိ (သာရတ္ထ. ဋီ. ပာစိတ္တိယ ၁၂၆) ဝဒန္တိ။
Anekakoṭṭhakānīti anekadvārakoṭṭhakāni. ‘‘Nikkhamāti vacanaṃ sutvā attano ruciyā ce nikkhamati, anāpattī’’ti (sārattha. ṭī. pācittiya 126) vadanti.
တသ္သ ပရိက္ခာရနိက္ကဍ္ဎနေတိ တသ္သ သန္တကံ ယံ ကိဉ္စိ ပတ္တစီဝရပရိသ္သာဝနဓမ္မကရဏမဉ္စပီဌဘိသိဗိဗ္ဗောဟနာဒိဘေဒံ အန္တမသော ရဇနဆလ္လိပိ အတ္ထိ, တသ္သ ပရိက္ခာရသ္သ နိက္ကဍ္ဎနေ။ တဉ္စာတိ ဒုက္ကဋံ ပရာမသတိ။ နိက္ကဍ္ဎာပနေပိ ဧသေဝ နယော။ ဂာဠ္ဟံ ဗန္ဓိတ္ဝာ ဌပိတေသု ပန ဧကာဝ အာပတ္တိ။
Tassaparikkhāranikkaḍḍhaneti tassa santakaṃ yaṃ kiñci pattacīvaraparissāvanadhammakaraṇamañcapīṭhabhisibibbohanādibhedaṃ antamaso rajanachallipi atthi, tassa parikkhārassa nikkaḍḍhane. Tañcāti dukkaṭaṃ parāmasati. Nikkaḍḍhāpanepi eseva nayo. Gāḷhaṃ bandhitvā ṭhapitesu pana ekāva āpatti.
ဘဏ္ဍနကာရကကလဟကာရကမေဝ သကလသင္ဃာရာမတော နိက္ကဍ္ဎိတုံ လဘတိ။ သော ဟိ ပက္ခံ လဘိတ္ဝာ သင္ဃမ္ပိ ဘိန္ဒေယ္ယ။ အလဇ္ဇိအာဒယော ပန အတ္တနော ဝသနဋ္ဌာနတောယေဝ နိက္ကဍ္ဎိတဗ္ဗာ။ သကလသင္ဃာရာမတော နိက္ကဍ္ဎိတုံ န ဝဋ္ဋတိ။ တေနာဟ ‘‘သကလသင္ဃာရာမတောပီ’’တိအာဒိ။
Bhaṇḍanakārakakalahakārakameva sakalasaṅghārāmato nikkaḍḍhituṃ labhati. So hi pakkhaṃ labhitvā saṅghampi bhindeyya. Alajjiādayo pana attano vasanaṭṭhānatoyeva nikkaḍḍhitabbā. Sakalasaṅghārāmato nikkaḍḍhituṃ na vaṭṭati. Tenāha ‘‘sakalasaṅghārāmatopī’’tiādi.
နိက္ကဍ္ဎနသိက္ခာပဒဝဏ္ဏနာ နိဋ္ဌိတာ။
Nikkaḍḍhanasikkhāpadavaṇṇanā niṭṭhitā.
