| Library / Tipiṭaka / ತಿಪಿಟಕ • Tipiṭaka / ಜಾತಕ-ಅಟ್ಠಕಥಾ • Jātaka-aṭṭhakathā |
[೨೯೫] ೫. ಅನ್ತಜಾತಕವಣ್ಣನಾ
[295] 5. Antajātakavaṇṇanā
ಉಸಭಸ್ಸೇವ ತೇ ಖನ್ಧೋತಿ ಇದಂ ಸತ್ಥಾ ಜೇತವನೇ ವಿಹರನ್ತೋ ತೇಯೇವ ದ್ವೇ ಜನೇ ಆರಬ್ಭ ಕಥೇಸಿ। ಪಚ್ಚುಪ್ಪನ್ನವತ್ಥು ಪುರಿಮಸದಿಸಮೇವ।
Usabhasseva te khandhoti idaṃ satthā jetavane viharanto teyeva dve jane ārabbha kathesi. Paccuppannavatthu purimasadisameva.
ಅತೀತೇ ಬಾರಾಣಸಿಯಂ ಬ್ರಹ್ಮದತ್ತೇ ರಜ್ಜಂ ಕಾರೇನ್ತೇ ಬೋಧಿಸತ್ತೋ ಏಕಸ್ಮಿಂ ಗಾಮೂಪಚಾರೇ ಏರಣ್ಡರುಕ್ಖದೇವತಾ ಹುತ್ವಾ ನಿಬ್ಬತ್ತಿ। ತದಾ ಏಕಸ್ಮಿಂ ಗಾಮಕೇ ಮತಂ ಜರಗ್ಗವಂ ನಿಕ್ಕಡ್ಢಿತ್ವಾ ಗಾಮದ್ವಾರೇ ಏರಣ್ಡವನೇ ಛಡ್ಡೇಸುಂ। ಏಕೋ ಸಿಙ್ಗಾಲೋ ಆಗನ್ತ್ವಾ ತಸ್ಸ ಮಂಸಂ ಖಾದಿ। ಏಕೋ ಕಾಕೋ ಆಗನ್ತ್ವಾ ಏರಣ್ಡೇ ನಿಲೀನೋ ತಂ ದಿಸ್ವಾ ‘‘ಯಂನೂನಾಹಂ ಏತಸ್ಸ ಅಭೂತಗುಣಕಥಂ ಕಥೇತ್ವಾ ಮಂಸಂ ಖಾದೇಯ್ಯ’’ನ್ತಿ ಚಿನ್ತೇತ್ವಾ ಪಠಮಂ ಗಾಥಮಾಹ –
Atīte bārāṇasiyaṃ brahmadatte rajjaṃ kārente bodhisatto ekasmiṃ gāmūpacāre eraṇḍarukkhadevatā hutvā nibbatti. Tadā ekasmiṃ gāmake mataṃ jaraggavaṃ nikkaḍḍhitvā gāmadvāre eraṇḍavane chaḍḍesuṃ. Eko siṅgālo āgantvā tassa maṃsaṃ khādi. Eko kāko āgantvā eraṇḍe nilīno taṃ disvā ‘‘yaṃnūnāhaṃ etassa abhūtaguṇakathaṃ kathetvā maṃsaṃ khādeyya’’nti cintetvā paṭhamaṃ gāthamāha –
೧೩೩.
133.
‘‘ಉಸಭಸ್ಸೇವ ತೇ ಖನ್ಧೋ, ಸೀಹಸ್ಸೇವ ವಿಜಮ್ಭಿತಂ।
‘‘Usabhasseva te khandho, sīhasseva vijambhitaṃ;
ಮಿಗರಾಜ ನಮೋ ತ್ಯತ್ಥು, ಅಪಿ ಕಿಞ್ಚಿ ಲಭಾಮಸೇ’’ತಿ॥
Migarāja namo tyatthu, api kiñci labhāmase’’ti.
ತತ್ಥ ನಮೋ ತ್ಯತ್ಥೂತಿ ನಮೋ ತೇ ಅತ್ಥು।
Tattha namo tyatthūti namo te atthu.
ತಂ ಸುತ್ವಾ ಸಿಙ್ಗಾಲೋ ದುತಿಯಂ ಗಾಥಮಾಹ –
Taṃ sutvā siṅgālo dutiyaṃ gāthamāha –
೧೩೪.
134.
‘‘ಕುಲಪುತ್ತೋವ ಜಾನಾತಿ, ಕುಲಪುತ್ತಂ ಪಸಂಸಿತುಂ।
‘‘Kulaputtova jānāti, kulaputtaṃ pasaṃsituṃ;
ಮಯೂರಗೀವಸಙ್ಕಾಸ, ಇತೋ ಪರಿಯಾಹಿ ವಾಯಸಾ’’ತಿ॥
Mayūragīvasaṅkāsa, ito pariyāhi vāyasā’’ti.
ತತ್ಥ ಇತೋ ಪರಿಯಾಹೀತಿ ಏರಣ್ಡತೋ ಓತರಿತ್ವಾ ಇತೋ ಯೇನಾಹಂ, ತೇನಾಗನ್ತ್ವಾ ಮಂಸಂ ಖಾದಾತಿ ವದತಿ।
Tattha ito pariyāhīti eraṇḍato otaritvā ito yenāhaṃ, tenāgantvā maṃsaṃ khādāti vadati.
ತಂ ತೇಸಂ ಕಿರಿಯಂ ದಿಸ್ವಾ ರುಕ್ಖದೇವತಾ ತತಿಯಂ ಗಾಥಮಾಹ –
Taṃ tesaṃ kiriyaṃ disvā rukkhadevatā tatiyaṃ gāthamāha –
೧೩೫.
135.
‘‘ಮಿಗಾನಂ ಸಿಙ್ಗಾಲೋ ಅನ್ತೋ, ಪಕ್ಖೀನಂ ಪನ ವಾಯಸೋ।
‘‘Migānaṃ siṅgālo anto, pakkhīnaṃ pana vāyaso;
ಏರಣ್ಡೋ ಅನ್ತೋ ರುಕ್ಖಾನಂ, ತಯೋ ಅನ್ತಾ ಸಮಾಗತಾ’’ತಿ॥
Eraṇḍo anto rukkhānaṃ, tayo antā samāgatā’’ti.
ತತ್ಥ ಅನ್ತೋತಿ ಹೀನೋ ಲಾಮಕೋ।
Tattha antoti hīno lāmako.
ಸತ್ಥಾ ಇಮಂ ಧಮ್ಮದೇಸನಂ ಆಹರಿತ್ವಾ ಜಾತಕಂ ಸಮೋಧಾನೇಸಿ – ‘‘ತದಾ ಸಿಙ್ಗಾಲೋ ದೇವದತ್ತೋ ಅಹೋಸಿ, ಕಾಕೋ ಕೋಕಾಲಿಕೋ, ರುಕ್ಖದೇವತಾ ಪನ ಅಹಮೇವ ಅಹೋಸಿ’’ನ್ತಿ।
Satthā imaṃ dhammadesanaṃ āharitvā jātakaṃ samodhānesi – ‘‘tadā siṅgālo devadatto ahosi, kāko kokāliko, rukkhadevatā pana ahameva ahosi’’nti.
ಅನ್ತಜಾತಕವಣ್ಣನಾ ಪಞ್ಚಮಾ।
Antajātakavaṇṇanā pañcamā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಜಾತಕಪಾಳಿ • Jātakapāḷi / ೨೯೫. ಅನ್ತಜಾತಕಂ • 295. Antajātakaṃ
