| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၂. အနောတ္တပ္ပီသုတ္တဝဏ္ဏနာ
2. Anottappīsuttavaṇṇanā
၁၄၅. တေန ရဟိတောတိ တေန သမ္မာဝာယာမေန ရဟိတော။ နိဗ္ဘယောတိ ဘယရဟိတော။ ကုသလာနုပ္ပာဒနမ္ပိ ဟိ သာဝဇ္ဇမေဝ အညာဏာလသိယဟေတုကတ္တာ။ သမ္ဗုဇ္ဈနတ္ထာယာတိ အရိယမဂ္ဂေဟိ သမ္ဗုဇ္ဈနာယ။ ယောဂေဟိ ခေမံ တေဟိ အနုပဒ္ဒုတတ္တာ။
145.Tena rahitoti tena sammāvāyāmena rahito. Nibbhayoti bhayarahito. Kusalānuppādanampi hi sāvajjameva aññāṇālasiyahetukattā. Sambujjhanatthāyāti ariyamaggehi sambujjhanāya. Yogehi khemaṃ tehi anupaddutattā.
မနုညဝတ္ထုန္တိ မနောရမံ လောဘုပ္ပတ္တိကာရဏံ။ ယထာ ဝာ တထာ ဝာတိ သုဘသုခာဒိဝသေန။ တေတိ လောဘာဒယော။ အနုပ္ပန္နာတိ ဝေဒိတဗ္ဗာ တထာရူပေ ဝတ္ထာရမ္မဏေ တထာ အနုပ္ပန္နပုဗ္ဗတ္တာ။ အညထာတိ ဝုတ္တနယေနေဝ ဝတ္ထာရမ္မဏေဟိ အယောဇေတ္ဝာ ဂယ္ဟမာနေ။ ဝတ္ထုမ္ဟီတိ ဥပဋ္ဌာကာဒိစီဝရာဒိဝတ္ထုမ္ဟိ။ အာရမ္မဏေတိ မနာပိယာဒိဘေဒေ အာရမ္မဏေ။ တာဒိသေန ပစ္စယေနာတိ အယောနိသောမနသိကာရသတိဝောသ္သဂ္ဂာဒိပစ္စယေန ။ ဣမေတိ ဝုတ္တနယေန ပစ္စယလာဘေန ပစ္ဆာ ဥပ္ပဇ္ဇမာနာ ပာဠိယံ တထာ ဝုတ္တာတိ ဒဋ္ဌဗ္ဗံ။ ဧဝံ ဥပ္ပဇ္ဇမာနတာယ နပ္ပဟီယန္တိ နာမ။ အနုပ္ပာဒော ဟိ ပရမတ္ထတော ပဟာနံ ကထိတံ, တသ္မာ တတ္ထ ကထိတနယေနေဝ ဂဟေတဗ္ဗန္တိ အဓိပ္ပာယော။
Manuññavatthunti manoramaṃ lobhuppattikāraṇaṃ. Yathā vā tathā vāti subhasukhādivasena. Teti lobhādayo. Anuppannāti veditabbā tathārūpe vatthārammaṇe tathā anuppannapubbattā. Aññathāti vuttanayeneva vatthārammaṇehi ayojetvā gayhamāne. Vatthumhīti upaṭṭhākādicīvarādivatthumhi. Ārammaṇeti manāpiyādibhede ārammaṇe. Tādisena paccayenāti ayonisomanasikārasativossaggādipaccayena . Imeti vuttanayena paccayalābhena pacchā uppajjamānā pāḷiyaṃ tathā vuttāti daṭṭhabbaṃ. Evaṃ uppajjamānatāya nappahīyanti nāma. Anuppādo hi paramatthato pahānaṃ kathitaṃ, tasmā tattha kathitanayeneva gahetabbanti adhippāyo.
အပ္ပဋိလဒ္ဓာတိ အနုပ္ပတ္တိယာ။ တေတိ ယထာဝုတ္တသီလာဒိအနဝဇ္ဇဓမ္မာ။ ပဋိလဒ္ဓာတိ အဓိဂတာ။ ‘‘သီလာဒိဓမ္မာ’’တိ ဧတ္ထ ယဒိ မဂ္ဂဖလာနိပိ ဂဟိတာနိ, အထ ကသ္မာ ‘‘ပရိဟာနိဝသေနာ’’တိ ဝုတ္တန္တိ အာဟ ‘‘ဧတ္ထ စာ’’တိအာဒိ။ ဣမသ္သ ပန သမ္မပ္ပဓာနသ္သာတိ စတုတ္ထသ္သ သမ္မပ္ပဓာနသ္သ ဝသေန။ အယံ ဒေသနာတိ ‘‘ဥပ္ပန္နာ မေ ကုသလာ ဓမ္မာ နိရုဇ္ဈမာနာ အနတ္ထာယ သံဝတ္တေယ္ယု’’န္တိ အယံ ဒေသနာ ကတာ။ ဒုတိယမဂ္ဂော ဝာ။ပေ.။ သံဝတ္တေယ္ယာတိ ဣဒံ အာယတိံ သတ္တသု အတ္တဘာဝေသု ဥပ္ပဇ္ဇမာနဒုက္ခသင္ခာတအနတ္ထုပ္ပတ္တိံ သန္ဓာယ ဝုတ္တံ။ ‘‘အာတာပီ ဩတ္တပ္ပီ ဘဗ္ဗော သမ္ဗောဓာယာ’’တိအာဒိဝစနတော ‘‘ဣမေ စတ္တာရော သမ္မပ္ပဓာနာ ပုဗ္ဗဘာဂဝိပသ္သနာဝသေန ကထိတာ’’တိ ဝုတ္တံ။
Appaṭiladdhāti anuppattiyā. Teti yathāvuttasīlādianavajjadhammā. Paṭiladdhāti adhigatā. ‘‘Sīlādidhammā’’ti ettha yadi maggaphalānipi gahitāni, atha kasmā ‘‘parihānivasenā’’ti vuttanti āha ‘‘ettha cā’’tiādi. Imassa pana sammappadhānassāti catutthassa sammappadhānassa vasena. Ayaṃ desanāti ‘‘uppannā me kusalā dhammā nirujjhamānā anatthāya saṃvatteyyu’’nti ayaṃ desanā katā. Dutiyamaggo vā…pe… saṃvatteyyāti idaṃ āyatiṃ sattasu attabhāvesu uppajjamānadukkhasaṅkhātaanatthuppattiṃ sandhāya vuttaṃ. ‘‘Ātāpī ottappī bhabbo sambodhāyā’’tiādivacanato ‘‘ime cattāro sammappadhānā pubbabhāgavipassanāvasena kathitā’’ti vuttaṃ.
အနောတ္တပ္ပီသုတ္တဝဏ္ဏနာ နိဋ္ဌိတာ။
Anottappīsuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၂. အနောတ္တပ္ပီသုတ္တံ • 2. Anottappīsuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၂. အနောတ္တပ္ပီသုတ္တဝဏ္ဏနာ • 2. Anottappīsuttavaṇṇanā
