| Library / Tipiṭaka / ติปิฎก • Tipiṭaka / พุทฺธวํสปาฬิ • Buddhavaṃsapāḷi |
๙. อโนมทสฺสีพุทฺธวํโส
9. Anomadassībuddhavaṃso
๑.
1.
โสภิตสฺส อปเรน, สมฺพุโทฺธ ทฺวิปทุตฺตโม;
Sobhitassa aparena, sambuddho dvipaduttamo;
อโนมทสฺสี อมิตยโส, เตชสฺสี ทุรติกฺกโมฯ
Anomadassī amitayaso, tejassī duratikkamo.
๒.
2.
โส เฉตฺวา พนฺธนํ สพฺพํ, วิทฺธํเสตฺวา ตโย ภเว;
So chetvā bandhanaṃ sabbaṃ, viddhaṃsetvā tayo bhave;
อนิวตฺติคมนํ มคฺคํ, เทเสสิ เทวมานุเสฯ
Anivattigamanaṃ maggaṃ, desesi devamānuse.
๓.
3.
สาคโรว อสโงฺขโภ, ปพฺพโตว ทุราสโท;
Sāgarova asaṅkhobho, pabbatova durāsado;
อากาโสว อนโนฺต โส, สาลราชาว ผุลฺลิโตฯ
Ākāsova ananto so, sālarājāva phullito.
๔.
4.
ทสฺสเนนปิ ตํ พุทฺธํ, โตสิตา โหนฺติ ปาณิโน;
Dassanenapi taṃ buddhaṃ, tositā honti pāṇino;
พฺยาหรนฺตํ คิรํ สุตฺวา, อมตํ ปาปุณนฺติ เตฯ
Byāharantaṃ giraṃ sutvā, amataṃ pāpuṇanti te.
๕.
5.
ธมฺมาภิสมโย ตสฺส, อิโทฺธ ผีโต ตทา อหุ;
Dhammābhisamayo tassa, iddho phīto tadā ahu;
โกฎิสตานิ อภิสมิํสุ, ปฐเม ธมฺมเทสเนฯ
Koṭisatāni abhisamiṃsu, paṭhame dhammadesane.
๖.
6.
ตโต ปรํ อภิสมเย, วสฺสเนฺต ธมฺมวุฎฺฐิโย;
Tato paraṃ abhisamaye, vassante dhammavuṭṭhiyo;
อสีติโกฎิโยภิสมิํสุ, ทุติเย ธมฺมเทสเนฯ
Asītikoṭiyobhisamiṃsu, dutiye dhammadesane.
๗.
7.
ตโตปรญฺหิ วสฺสเนฺต, ตปฺปยเนฺต จ ปาณินํ;
Tatoparañhi vassante, tappayante ca pāṇinaṃ;
อฎฺฐสตฺตติโกฎีนํ, ตติยาภิสมโย อหุฯ
Aṭṭhasattatikoṭīnaṃ, tatiyābhisamayo ahu.
๘.
8.
สนฺนิปาตา ตโย อาสุํ, ตสฺสาปิ จ มเหสิโน;
Sannipātā tayo āsuṃ, tassāpi ca mahesino;
อภิญฺญาพลปฺปตฺตานํ, ปุปฺผิตานํ วิมุตฺติยาฯ
Abhiññābalappattānaṃ, pupphitānaṃ vimuttiyā.
๙.
9.
อฎฺฐสตสหสฺสานํ, สนฺนิปาโต ตทา อหุ;
Aṭṭhasatasahassānaṃ, sannipāto tadā ahu;
ปหีนมทโมหานํ, สนฺตจิตฺตาน ตาทินํฯ
Pahīnamadamohānaṃ, santacittāna tādinaṃ.
๑๐.
10.
สตฺตสตสหสฺสานํ , ทุติโย อาสิ สมาคโม;
Sattasatasahassānaṃ , dutiyo āsi samāgamo;
อนงฺคณานํ วิรชานํ, อุปสนฺตาน ตาทินํฯ
Anaṅgaṇānaṃ virajānaṃ, upasantāna tādinaṃ.
๑๑.
11.
ฉนฺนํ สตสหสฺสานํ, ตติโย อาสิ สมาคโม;
Channaṃ satasahassānaṃ, tatiyo āsi samāgamo;
อภิญฺญาพลปฺปตฺตานํ, นิพฺพุตานํ ตปสฺสินํฯ
Abhiññābalappattānaṃ, nibbutānaṃ tapassinaṃ.
๑๒.
12.
อหํ เตน สมเยน, ยโกฺข อาสิํ มหิทฺธิโก;
Ahaṃ tena samayena, yakkho āsiṃ mahiddhiko;
เนกานํ ยกฺขโกฎีนํ, วสวตฺติมฺหิ อิสฺสโรฯ
Nekānaṃ yakkhakoṭīnaṃ, vasavattimhi issaro.
๑๓.
13.
ตทาปิ ตํ พุทฺธวรํ, อุปคนฺตฺวา มเหสินํ;
Tadāpi taṃ buddhavaraṃ, upagantvā mahesinaṃ;
อนฺนปาเนน ตเปฺปสิํ, สสงฺฆํ โลกนายกํฯ
Annapānena tappesiṃ, sasaṅghaṃ lokanāyakaṃ.
๑๔.
14.
โสปิ มํ ตทา พฺยากาสิ, วิสุทฺธนยโน มุนิ;
Sopi maṃ tadā byākāsi, visuddhanayano muni;
‘‘อปริเมยฺยิโต กเปฺป, อยํ พุโทฺธ ภวิสฺสติฯ
‘‘Aparimeyyito kappe, ayaṃ buddho bhavissati.
๑๕.
15.
‘‘ปธานํ ปทหิตฺวาน…เป.… เหสฺสาม สมฺมุขา อิมํ’’ฯ
‘‘Padhānaṃ padahitvāna…pe… hessāma sammukhā imaṃ’’.
๑๖.
16.
ตสฺสาปิ วจนํ สุตฺวา, หโฎฺฐ สํวิคฺคมานโส;
Tassāpi vacanaṃ sutvā, haṭṭho saṃviggamānaso;
อุตฺตริํ วตมธิฎฺฐาสิํ, ทสปารมิปูริยาฯ
Uttariṃ vatamadhiṭṭhāsiṃ, dasapāramipūriyā.
๑๗.
17.
นครํ จนฺทวตี นาม, ยสวา นาม ขตฺติโย;
Nagaraṃ candavatī nāma, yasavā nāma khattiyo;
มาตา ยโสธรา นาม, อโนมทสฺสิสฺส สตฺถุโนฯ
Mātā yasodharā nāma, anomadassissa satthuno.
๑๘.
18.
ทสวสฺสสหสฺสานิ, อคารํ อชฺฌ โส วสิ;
Dasavassasahassāni, agāraṃ ajjha so vasi;
สิรี อุปสิรี วโฑฺฒ, ตโย ปาสาทมุตฺตมาฯ
Sirī upasirī vaḍḍho, tayo pāsādamuttamā.
๑๙.
19.
เตวีสติสหสฺสานิ, นาริโย สมลงฺกตา;
Tevīsatisahassāni, nāriyo samalaṅkatā;
สิริมา นาม สา นารี, อุปวาโณ นาม อตฺรโชฯ
Sirimā nāma sā nārī, upavāṇo nāma atrajo.
๒๐.
20.
นิมิเตฺต จตุโร ทิสฺวา, สิวิกายาภินิกฺขมิ;
Nimitte caturo disvā, sivikāyābhinikkhami;
อนูนทสมาสานิ, ปธานํ ปทหี ชิโนฯ
Anūnadasamāsāni, padhānaṃ padahī jino.
๒๑.
21.
พฺรหฺมุนา ยาจิโต สโนฺต, อโนมทสฺสี มหามุนิ;
Brahmunā yācito santo, anomadassī mahāmuni;
๒๒.
22.
วรุโณ นามุปฎฺฐาโก, อโนมทสฺสิสฺส สตฺถุโนฯ
Varuṇo nāmupaṭṭhāko, anomadassissa satthuno.
๒๓.
23.
สุนฺทรี จ สุมนา จ, อเหสุํ อคฺคสาวิกา;
Sundarī ca sumanā ca, ahesuṃ aggasāvikā;
โพธิ ตสฺส ภควโต, อชฺชุโนติ ปวุจฺจติฯ
Bodhi tassa bhagavato, ajjunoti pavuccati.
๒๔.
24.
นนฺทิวโฑฺฒ สิริวโฑฺฒ, อเหสุํ อคฺคุปฎฺฐกา;
Nandivaḍḍho sirivaḍḍho, ahesuṃ aggupaṭṭhakā;
อุปฺปลา เจว ปทุมา จ, อเหสุํ อคฺคุปฎฺฐิกาฯ
Uppalā ceva padumā ca, ahesuṃ aggupaṭṭhikā.
๒๕.
25.
อฎฺฐปณฺณาสรตนํ , อจฺจุคฺคโต มหามุนิ;
Aṭṭhapaṇṇāsaratanaṃ , accuggato mahāmuni;
ปภา นิทฺธาวตี ตสฺส, สตรํสีว อุคฺคโตฯ
Pabhā niddhāvatī tassa, sataraṃsīva uggato.
๒๖.
26.
วสฺสสตสหสฺสานิ, อายุ วิชฺชติ ตาวเท;
Vassasatasahassāni, āyu vijjati tāvade;
ตาวตา ติฎฺฐมาโน โส, ตาเรสิ ชนตํ พหุํฯ
Tāvatā tiṭṭhamāno so, tāresi janataṃ bahuṃ.
๒๗.
27.
สุปุปฺผิตํ ปาวจนํ, อรหเนฺตหิ ตาทิหิ;
Supupphitaṃ pāvacanaṃ, arahantehi tādihi;
วีตราเคหิ วิมเลหิ, โสภิตฺถ ชินสาสนํฯ
Vītarāgehi vimalehi, sobhittha jinasāsanaṃ.
๒๘.
28.
โส จ สตฺถา อมิตยโส, ยุคานิ ตานิ อตุลิยานิ;
So ca satthā amitayaso, yugāni tāni atuliyāni;
สพฺพํ ตมนฺตรหิตํ, นนุ ริตฺตา สพฺพสงฺขาราฯ
Sabbaṃ tamantarahitaṃ, nanu rittā sabbasaṅkhārā.
๒๙.
29.
อโนมทสฺสี ชิโน สตฺถา, ธมฺมารามมฺหิ นิพฺพุโต;
Anomadassī jino satthā, dhammārāmamhi nibbuto;
ตเตฺถวสฺส ชินถูโป, อุเพฺพโธ ปญฺจวีสตีติฯ
Tatthevassa jinathūpo, ubbedho pañcavīsatīti.
อโนมทสฺสิสฺส ภควโต วํโส สตฺตโมฯ
Anomadassissa bhagavato vaṃso sattamo.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / พุทฺธวํส-อฎฺฐกถา • Buddhavaṃsa-aṭṭhakathā / ๙. อโนมทสฺสีพุทฺธวํสวณฺณนา • 9. Anomadassībuddhavaṃsavaṇṇanā
