| Library / Tipiṭaka / តិបិដក • Tipiṭaka / ខុទ្ទសិក្ខា-មូលសិក្ខា • Khuddasikkhā-mūlasikkhā |
២៣. អនោលោកិយនិទ្ទេសវណ្ណនា
23. Anolokiyaniddesavaṇṇanā
១៨១. សារត្តោតិ សំរត្តោ, សញ្ជាតរាគចិត្តោតិ អត្ថោ។ ឥត្ថិយាតិ តទហុជាតាយបិ បដសតនិវត្ថាយ អនោកាសុបនិជ្ឈាយនេ អន្តមសោ តិរច្ឆានគតានម្បិ ទុក្កដមេវ។ ភិក្ខាទាយិយាតិ ឧបលក្ខណមត្តំ, ឥត្ថី វា ហោតុ បុរិសោ វា, ភិក្ខាទានសមយេ អសារត្តេនាបិ មុខំ ន ឧល្លោកេតព្ពំ។ ឧជ្ឈានំ លាមកតោ សំចិន្តនំ, កោបោ, តត្ថ សញ្ញា អស្សាតិ ឧជ្ឈានសញ្ញី។ ឥធ បន គិលានោបិ ន មុច្ចតិ។ អាទាសេ ឧទកបត្តេតិ ឥមិនា សេសេសុ កំសបត្តាទីសុ កញ្ជិយាទីសុ ច មុខនិមិត្តំ បញ្ញាយតិ, តេសំ សង្គហោ។ ‘‘សញ្ឆវិ នុ ខោ មេ វណ្ណោ, នោ, ជិណ្ណោ នុ ខោម្ហិ, នោ’’តិ បន ឱលោកេតុំ វដ្ដតិ។ អស្សាតិ ភិក្ខុនោ។
181.Sārattoti saṃratto, sañjātarāgacittoti attho. Itthiyāti tadahujātāyapi paṭasatanivatthāya anokāsupanijjhāyane antamaso tiracchānagatānampi dukkaṭameva. Bhikkhādāyiyāti upalakkhaṇamattaṃ, itthī vā hotu puriso vā, bhikkhādānasamaye asārattenāpi mukhaṃ na ulloketabbaṃ. Ujjhānaṃ lāmakato saṃcintanaṃ, kopo, tattha saññā assāti ujjhānasaññī. Idha pana gilānopi na muccati. Ādāse udakapatteti iminā sesesu kaṃsapattādīsu kañjiyādīsu ca mukhanimittaṃ paññāyati, tesaṃ saṅgaho. ‘‘Sañchavi nu kho me vaṇṇo, no, jiṇṇo nu khomhi, no’’ti pana oloketuṃ vaṭṭati. Assāti bhikkhuno.
អនោលោកិយនិទ្ទេសវណ្ណនា និដ្ឋិតា។
Anolokiyaniddesavaṇṇanā niṭṭhitā.
