| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
៦. អន្នសំសាវកត្ថេរអបទានំ
6. Annasaṃsāvakattheraapadānaṃ
៣៤.
34.
‘‘សុវណ្ណវណ្ណំ សម្ពុទ្ធំ, គច្ឆន្តំ អន្តរាបណេ;
‘‘Suvaṇṇavaṇṇaṃ sambuddhaṃ, gacchantaṃ antarāpaṇe;
កញ្ចនគ្ឃិយសង្កាសំ, ពាត្តិំសវរលក្ខណំ។
Kañcanagghiyasaṅkāsaṃ, bāttiṃsavaralakkhaṇaṃ.
៣៥.
35.
‘‘សិទ្ធត្ថំ សព្ពសិទ្ធត្ថំ, អនេជំ អបរាជិតំ;
‘‘Siddhatthaṃ sabbasiddhatthaṃ, anejaṃ aparājitaṃ;
សម្ពុទ្ធំ អតិនាមេត្វា, ភោជយិំ តំ មហាមុនិំ។
Sambuddhaṃ atināmetvā, bhojayiṃ taṃ mahāmuniṃ.
៣៦.
36.
‘‘មុនិ ការុណិកោ លោកេ, ឱភាសយិ មមំ តទា;
‘‘Muni kāruṇiko loke, obhāsayi mamaṃ tadā;
ពុទ្ធេ ចិត្តំ បសាទេត្វា, កប្បំ សគ្គម្ហិ មោទហំ។
Buddhe cittaṃ pasādetvā, kappaṃ saggamhi modahaṃ.
៣៧.
37.
‘‘ចតុន្នវុតិតោ កប្បេ, យំ ទានមទទិំ តទា;
‘‘Catunnavutito kappe, yaṃ dānamadadiṃ tadā;
ទុគ្គតិំ នាភិជានាមិ, ភិក្ខាទានស្សិទំ ផលំ។
Duggatiṃ nābhijānāmi, bhikkhādānassidaṃ phalaṃ.
៣៨.
38.
‘‘បដិសម្ភិទា ចតស្សោ…បេ.… កតំ ពុទ្ធស្ស សាសនំ’’។
‘‘Paṭisambhidā catasso…pe… kataṃ buddhassa sāsanaṃ’’.
ឥត្ថំ សុទំ អាយស្មា អន្នសំសាវកោ ថេរោ ឥមា គាថាយោ អភាសិត្ថាតិ;
Itthaṃ sudaṃ āyasmā annasaṃsāvako thero imā gāthāyo abhāsitthāti;
អន្នសំសាវកត្ថេរស្សាបទានំ ឆដ្ឋំ។
Annasaṃsāvakattherassāpadānaṃ chaṭṭhaṃ.
