| Library / Tipiṭaka / តិបិដក • Tipiṭaka / បរិវារ-អដ្ឋកថា • Parivāra-aṭṭhakathā |
ឧបាលិបញ្ចកំ
Upālipañcakaṃ
អនិស្សិតវគ្គវណ្ណនា
Anissitavaggavaṇṇanā
៤១៧. ឧបាលិបញ្ហេសុ កតិហិ នុ ខោ ភន្តេតិ បុច្ឆាយ អយំ សម្ពន្ធោ។ ថេរោ កិរ រហោគតោ សព្ពានិ ឥមានិ បញ្ចកានិ អាវជ្ជេត្វា ‘‘ភគវន្តំ ទានិ បុច្ឆិត្វា ឥមេសំ និស្សាយ វសនកាទីនំ អត្ថាយ តន្តិំ ឋបេស្សាមី’’តិ ភគវន្តំ ឧបសង្កមិត្វា ‘‘កតិហិ នុ ខោ ភន្តេ’’តិអាទិនា នយេន បញ្ហេ បុច្ឆិ។ តេសំ វិស្សជ្ជនេ ឧបោសថំ ន ជានាតីតិ នវវិធំ ឧបោសថំ ន ជានាតិ។ ឧបោសថកម្មំ ន ជានាតីតិ អធម្មេនវគ្គាទិភេទំ ចតុព្ពិធំ ឧបោសថកម្មំ ន ជានាតិ។ បាតិមោក្ខំ ន ជានាតីតិ ទ្វេ មាតិកា ន ជានាតិ។ បាតិមោក្ខុទ្ទេសំ ន ជានាតីតិ ភិក្ខូនំ បញ្ចវិធំ ភិក្ខុនីនំ ចតុព្ពិធន្តិ នវវិធំ បាតិមោក្ខុទ្ទេសំ ន ជានាតិ។
417. Upālipañhesu katihi nu kho bhanteti pucchāya ayaṃ sambandho. Thero kira rahogato sabbāni imāni pañcakāni āvajjetvā ‘‘bhagavantaṃ dāni pucchitvā imesaṃ nissāya vasanakādīnaṃ atthāya tantiṃ ṭhapessāmī’’ti bhagavantaṃ upasaṅkamitvā ‘‘katihi nu kho bhante’’tiādinā nayena pañhe pucchi. Tesaṃ vissajjane uposathaṃ na jānātīti navavidhaṃ uposathaṃ na jānāti. Uposathakammaṃ na jānātīti adhammenavaggādibhedaṃ catubbidhaṃ uposathakammaṃ na jānāti. Pātimokkhaṃ na jānātīti dve mātikā na jānāti. Pātimokkhuddesaṃ na jānātīti bhikkhūnaṃ pañcavidhaṃ bhikkhunīnaṃ catubbidhanti navavidhaṃ pātimokkhuddesaṃ na jānāti.
បវារណំ ន ជានាតីតិ នវវិធំ បវារណំ ន ជានាតិ។ បវារណាកម្មំ ន ជានាតីតិ អធម្មេនវគ្គាទិភេទំ ចតុព្ពិធំ បវារណាកម្មំ ន ជានាតិ។
Pavāraṇaṃ na jānātīti navavidhaṃ pavāraṇaṃ na jānāti. Pavāraṇākammaṃ na jānātīti adhammenavaggādibhedaṃ catubbidhaṃ pavāraṇākammaṃ na jānāti.
អាបត្តានាបត្តិំ ន ជានាតីតិ តស្មិំ តស្មិំ សិក្ខាបទេ និទ្ទិដ្ឋំ អាបត្តិញ្ច អនាបត្តិញ្ច ន ជានាតិ។
Āpattānāpattiṃ na jānātīti tasmiṃ tasmiṃ sikkhāpade niddiṭṭhaṃ āpattiñca anāpattiñca na jānāti.
អាបន្នោ កម្មកតោតិ អាបត្តិំ អាបន្នោ តប្បច្ចយាវ សង្ឃេន កម្មំ កតំ ហោតិ។
Āpanno kammakatoti āpattiṃ āpanno tappaccayāva saṅghena kammaṃ kataṃ hoti.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / បរិវារបាឡិ • Parivārapāḷi / ១. អនិស្សិតវគ្គោ • 1. Anissitavaggo
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / អនិស្សិតវគ្គវណ្ណនា • Anissitavaggavaṇṇanā
