| Library / Tipiṭaka / তিপিটক • Tipiṭaka / পরিৰার-অট্ঠকথা • Parivāra-aṭṭhakathā |
উপালিপঞ্চকং
Upālipañcakaṃ
অনিস্সিতৰগ্গৰণ্ণনা
Anissitavaggavaṇṇanā
৪১৭. উপালিপঞ্হেসু কতিহি নু খো ভন্তেতি পুচ্ছায অযং সম্বন্ধো। থেরো কির রহোগতো সব্বানি ইমানি পঞ্চকানি আৰজ্জেত্ৰা ‘‘ভগৰন্তং দানি পুচ্ছিত্ৰা ইমেসং নিস্সায ৰসনকাদীনং অত্থায তন্তিং ঠপেস্সামী’’তি ভগৰন্তং উপসঙ্কমিত্ৰা ‘‘কতিহি নু খো ভন্তে’’তিআদিনা নযেন পঞ্হে পুচ্ছি। তেসং ৰিস্সজ্জনে উপোসথং ন জানাতীতি নৰৰিধং উপোসথং ন জানাতি। উপোসথকম্মং ন জানাতীতি অধম্মেনৰগ্গাদিভেদং চতুব্বিধং উপোসথকম্মং ন জানাতি। পাতিমোক্খং ন জানাতীতি দ্ৰে মাতিকা ন জানাতি। পাতিমোক্খুদ্দেসং ন জানাতীতি ভিক্খূনং পঞ্চৰিধং ভিক্খুনীনং চতুব্বিধন্তি নৰৰিধং পাতিমোক্খুদ্দেসং ন জানাতি।
417. Upālipañhesu katihi nu kho bhanteti pucchāya ayaṃ sambandho. Thero kira rahogato sabbāni imāni pañcakāni āvajjetvā ‘‘bhagavantaṃ dāni pucchitvā imesaṃ nissāya vasanakādīnaṃ atthāya tantiṃ ṭhapessāmī’’ti bhagavantaṃ upasaṅkamitvā ‘‘katihi nu kho bhante’’tiādinā nayena pañhe pucchi. Tesaṃ vissajjane uposathaṃ na jānātīti navavidhaṃ uposathaṃ na jānāti. Uposathakammaṃ na jānātīti adhammenavaggādibhedaṃ catubbidhaṃ uposathakammaṃ na jānāti. Pātimokkhaṃ na jānātīti dve mātikā na jānāti. Pātimokkhuddesaṃ na jānātīti bhikkhūnaṃ pañcavidhaṃ bhikkhunīnaṃ catubbidhanti navavidhaṃ pātimokkhuddesaṃ na jānāti.
পৰারণং ন জানাতীতি নৰৰিধং পৰারণং ন জানাতি। পৰারণাকম্মং ন জানাতীতি অধম্মেনৰগ্গাদিভেদং চতুব্বিধং পৰারণাকম্মং ন জানাতি।
Pavāraṇaṃ na jānātīti navavidhaṃ pavāraṇaṃ na jānāti. Pavāraṇākammaṃ na jānātīti adhammenavaggādibhedaṃ catubbidhaṃ pavāraṇākammaṃ na jānāti.
আপত্তানাপত্তিং ন জানাতীতি তস্মিং তস্মিং সিক্খাপদে নিদ্দিট্ঠং আপত্তিঞ্চ অনাপত্তিঞ্চ ন জানাতি।
Āpattānāpattiṃ na jānātīti tasmiṃ tasmiṃ sikkhāpade niddiṭṭhaṃ āpattiñca anāpattiñca na jānāti.
আপন্নো কম্মকতোতি আপত্তিং আপন্নো তপ্পচ্চযাৰ সঙ্ঘেন কম্মং কতং হোতি।
Āpanno kammakatoti āpattiṃ āpanno tappaccayāva saṅghena kammaṃ kataṃ hoti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ১. অনিস্সিতৰগ্গো • 1. Anissitavaggo
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / অনিস্সিতৰগ্গৰণ্ণনা • Anissitavaggavaṇṇanā
