| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৩. অনিচ্চসুত্তং
3. Aniccasuttaṃ
৪৫. সাৰত্থিনিদানং। ‘‘রূপং, ভিক্খৰে, অনিচ্চং। যদনিচ্চং তং দুক্খং ; যং দুক্খং তদনত্তা ; যদনত্তা তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং। এৰমেতং যথাভূতং সম্মপ্পঞ্ঞায পস্সতো চিত্তং ৰিরজ্জতি ৰিমুচ্চতি অনুপাদায আসৰেহি। ৰেদনা অনিচ্চা… সঞ্ঞা… সঙ্খারা… ৰিঞ্ঞাণং অনিচ্চং। যদনিচ্চং তং দুক্খং; যং দুক্খং তদনত্তা; যদনত্তা তং ‘নেতং মম, নেসোহমস্মি, ন মেসো অত্তা’তি এৰমেতং যথাভূতং সম্মপ্পঞ্ঞায দট্ঠব্বং। এৰমেতং যথাভূতং সম্মপ্পঞ্ঞায পস্সতো চিত্তং ৰিরজ্জতি ৰিমুচ্চতি অনুপাদায আসৰেহি। রূপধাতুযা চে, ভিক্খৰে, ভিক্খুনো চিত্তং ৰিরত্তং ৰিমুত্তং হোতি অনুপাদায আসৰেহি, ৰেদনাধাতুযা…পে॰… সঞ্ঞাধাতুযা… সঙ্খারধাতুযা… ৰিঞ্ঞাণধাতুযা চে, ভিক্খৰে, ভিক্খুনো চিত্তং ৰিরত্তং ৰিমুত্তং হোতি অনুপাদায আসৰেহি। ৰিমুত্তত্তা ঠিতং। ঠিতত্তা সন্তুসিতং 1। সন্তুসিতত্তা ন পরিতস্সতি। অপরিতস্সং পচ্চত্তঞ্ঞেৰ পরিনিব্বাযতি। ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতী’’তি। ততিযং।
45. Sāvatthinidānaṃ. ‘‘Rūpaṃ, bhikkhave, aniccaṃ. Yadaniccaṃ taṃ dukkhaṃ ; yaṃ dukkhaṃ tadanattā ; yadanattā taṃ ‘netaṃ mama, nesohamasmi, na meso attā’ti evametaṃ yathābhūtaṃ sammappaññāya daṭṭhabbaṃ. Evametaṃ yathābhūtaṃ sammappaññāya passato cittaṃ virajjati vimuccati anupādāya āsavehi. Vedanā aniccā… saññā… saṅkhārā… viññāṇaṃ aniccaṃ. Yadaniccaṃ taṃ dukkhaṃ; yaṃ dukkhaṃ tadanattā; yadanattā taṃ ‘netaṃ mama, nesohamasmi, na meso attā’ti evametaṃ yathābhūtaṃ sammappaññāya daṭṭhabbaṃ. Evametaṃ yathābhūtaṃ sammappaññāya passato cittaṃ virajjati vimuccati anupādāya āsavehi. Rūpadhātuyā ce, bhikkhave, bhikkhuno cittaṃ virattaṃ vimuttaṃ hoti anupādāya āsavehi, vedanādhātuyā…pe… saññādhātuyā… saṅkhāradhātuyā… viññāṇadhātuyā ce, bhikkhave, bhikkhuno cittaṃ virattaṃ vimuttaṃ hoti anupādāya āsavehi. Vimuttattā ṭhitaṃ. Ṭhitattā santusitaṃ 2. Santusitattā na paritassati. Aparitassaṃ paccattaññeva parinibbāyati. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānātī’’ti. Tatiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩. অনিচ্চসুত্তৰণ্ণনা • 3. Aniccasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩. অনিচ্চসুত্তৰণ্ণনা • 3. Aniccasuttavaṇṇanā
