| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੧੦. ਅਨਿਚ੍ਚਸਞ੍ਞਾਸੁਤ੍ਤવਣ੍ਣਨਾ
10. Aniccasaññāsuttavaṇṇanā
੧੦੨. ਦਸਮੇ ਅਨਿਚ੍ਚਸਞ੍ਞਾਤਿ ਅਨਿਚ੍ਚਂ ਅਨਿਚ੍ਚਨ੍ਤਿ ਭਾવੇਨ੍ਤਸ੍ਸ ਉਪ੍ਪਨ੍ਨਸਞ੍ਞਾ। ਪਰਿਯਾਦਿਯਤੀਤਿ ਖੇਪਯਤਿ। ਸਬ੍ਬਂ ਅਸ੍ਮਿਮਾਨਨ੍ਤਿ ਨવવਿਧਂ ਅਸ੍ਮਿਮਾਨਂ। ਮੂਲਸਨ੍ਤਾਨਕਾਨੀਤਿ ਸਨ੍ਤਾਨੇਤ੍વਾ ਠਿਤਮੂਲਾਨਿ। ਮਹਾਨਙ੍ਗਲਂ વਿਯ ਹਿ ਅਨਿਚ੍ਚਸਞ੍ਞਾ, ਖੁਦ੍ਦਾਨੁਖੁਦ੍ਦਕਾਨਿ ਮੂਲਸਨ੍ਤਾਨਕਾਨਿ વਿਯ ਕਿਲੇਸਾ, ਯਥਾ ਕਸ੍ਸਕੋ ਕਸਨ੍ਤੋ ਨਙ੍ਗਲੇਨ ਤਾਨਿ ਪਦਾਲੇਤਿ, ਏવਂ ਯੋਗੀ ਅਨਿਚ੍ਚਸਞ੍ਞਂ ਭਾવੇਨ੍ਤੋ ਅਨਿਚ੍ਚਸਞ੍ਞਾਞਾਣੇਨ ਕਿਲੇਸੇ ਪਦਾਲੇਤੀਤਿ ਇਦਮੇਤ੍ਥ ਓਪਮ੍ਮਸਂਸਨ੍ਦਨਂ।
102. Dasame aniccasaññāti aniccaṃ aniccanti bhāventassa uppannasaññā. Pariyādiyatīti khepayati. Sabbaṃ asmimānanti navavidhaṃ asmimānaṃ. Mūlasantānakānīti santānetvā ṭhitamūlāni. Mahānaṅgalaṃ viya hi aniccasaññā, khuddānukhuddakāni mūlasantānakāni viya kilesā, yathā kassako kasanto naṅgalena tāni padāleti, evaṃ yogī aniccasaññaṃ bhāvento aniccasaññāñāṇena kilese padāletīti idamettha opammasaṃsandanaṃ.
ਓਧੁਨਾਤੀਤਿ ਹੇਟ੍ਠਾ ਧੁਨਾਤਿ। ਨਿਦ੍ਧੁਨਾਤੀਤਿ ਪਪ੍ਫੋਟੇਤਿ। ਨਿਚ੍ਛੋਟੇਤੀਤਿ ਪਪ੍ਫੋਟੇਤ੍વਾ ਛਡ੍ਡੇਤਿ। ਇਧਾਪਿ ਪਬ੍ਬਜਾਨਿ વਿਯ ਕਿਲੇਸਾ, ਲਾਯਨਂ ਨਿਚ੍ਛੋਟਨਂ વਿਯ ਅਨਿਚ੍ਚਸਞ੍ਞਾਞਾਣਨ੍ਤਿ ਇਮਿਨਾ ਅਤ੍ਥੇਨ ਉਪਮਾ ਸਂਸਨ੍ਦੇਤਬ੍ਬਾ।
Odhunātīti heṭṭhā dhunāti. Niddhunātīti papphoṭeti. Nicchoṭetīti papphoṭetvā chaḍḍeti. Idhāpi pabbajāni viya kilesā, lāyanaṃ nicchoṭanaṃ viya aniccasaññāñāṇanti iminā atthena upamā saṃsandetabbā.
વਣ੍ਟਚ੍ਛਿਨ੍ਨਾਯਾਤਿ ਤਿਣ੍ਹੇਨ ਖੁਰਪ੍ਪੇਨ વਣ੍ਟਚ੍ਛਿਨ੍ਨਾਯ। ਤਦਨ੍વਯਾਨਿ ਭવਨ੍ਤੀਤਿ ਤਂ ਅਮ੍ਬਪਿਣ੍ਡਿਂ ਅਨੁਗਚ੍ਛਨ੍ਤਿ, ਤਸ੍ਸਾ ਪਤਮਾਨਾਯ ਅਮ੍ਬਾਨਿ ਭੂਮਿਯਂ ਪਤਨ੍ਤਿ। ਇਧਾਪਿ ਅਮ੍ਬਪਿਣ੍ਡਿ વਿਯ ਕਿਲੇਸਾ, ਤਿਣ੍ਹਖੁਰਪ੍ਪੋ વਿਯ ਅਨਿਚ੍ਚਸਞ੍ਞਾ, ਯਥਾ ਖੁਰਪ੍ਪੇਨ ਛਿਨ੍ਨਾਯ ਅਮ੍ਬਪਿਣ੍ਡਿਯਾ ਸਬ੍ਬਾਨਿ ਅਮ੍ਬਾਨਿ ਭੂਮਿਯਂ ਪਤਨ੍ਤਿ, ਏવਂ ਅਨਿਚ੍ਚਸਞ੍ਞਾਞਾਣੇਨ ਕਿਲੇਸਾਨਂ ਮੂਲਭੂਤਾਯ ਅવਿਜ੍ਜਾਯ ਛਿਨ੍ਨਾਯ ਸਬ੍ਬਕਿਲੇਸਾ ਸਮੁਗ੍ਘਾਤਂ ਗਚ੍ਛਨ੍ਤੀਤਿ, ਇਦਂ ਓਪਮ੍ਮਸਂਸਨ੍ਦਨਂ।
Vaṇṭacchinnāyāti tiṇhena khurappena vaṇṭacchinnāya. Tadanvayāni bhavantīti taṃ ambapiṇḍiṃ anugacchanti, tassā patamānāya ambāni bhūmiyaṃ patanti. Idhāpi ambapiṇḍi viya kilesā, tiṇhakhurappo viya aniccasaññā, yathā khurappena chinnāya ambapiṇḍiyā sabbāni ambāni bhūmiyaṃ patanti, evaṃ aniccasaññāñāṇena kilesānaṃ mūlabhūtāya avijjāya chinnāya sabbakilesā samugghātaṃ gacchantīti, idaṃ opammasaṃsandanaṃ.
ਕੂਟਙ੍ਗਮਾਤਿ ਕੂਟਂ ਗਚ੍ਛਨ੍ਤਿ। ਕੂਟਨਿਨ੍ਨਾਤਿ ਕੂਟਂ ਪવਿਸਨਭਾવੇਨ ਕੂਟੇ ਨਿਨ੍ਨਾ। ਕੂਟਸਮੋਸਰਣਾਤਿ ਕੂਟੇ ਸਮੋਸਰਿਤ੍વਾ ਠਿਤਾ। ਇਧਾਪਿ ਕੂਟਂ વਿਯ ਅਨਿਚ੍ਚਸਞ੍ਞਾ, ਗੋਪਾਨਸਿਯੋ વਿਯ ਚਤੁਭੂਮਕਕੁਸਲਧਮ੍ਮਾ, ਯਥਾ ਸਬ੍ਬਗੋਪਾਨਸੀਨਂ ਕੂਟਂ ਅਗ੍ਗਂ, ਏવਂ ਕੁਸਲਧਮ੍ਮਾਨਂ ਅਨਿਚ੍ਚਸਞ੍ਞਾ ਅਗ੍ਗਾ। ਨਨੁ ਚ ਅਨਿਚ੍ਚਸਞ੍ਞਾ ਲੋਕਿਯਾ, ਸਾ ਲੋਕਿਯਕੁਸਲਾਨਂ ਤਾવ ਅਗ੍ਗਂ ਹੋਤੁ, ਲੋਕੁਤ੍ਤਰਾਨਂ ਕਥਂ ਅਗ੍ਗਨ੍ਤਿ? ਤੇਸਮ੍ਪਿ ਪਟਿਲਾਭਕਰਣਤ੍ਥੇਨ ਅਗ੍ਗਨ੍ਤਿ વੇਦਿਤਬ੍ਬਾ। ਇਮਿਨਾ ਉਪਾਯੇਨ ਸਬ੍ਬਾਸੁ ਉਪਮਾਸੁ ਓਪਮ੍ਮਸਂਸਨ੍ਦਨਂ વੇਦਿਤਬ੍ਬਂ। ਪੁਰਿਮਾਹਿ ਪਨੇਤ੍ਥ ਤੀਹਿ ਅਨਿਚ੍ਚਸਞ੍ਞਾਯ ਕਿਚ੍ਚਂ, ਪਚ੍ਛਿਮਾਹਿ ਬਲਨ੍ਤਿ। ਦਸਮਂ।
Kūṭaṅgamāti kūṭaṃ gacchanti. Kūṭaninnāti kūṭaṃ pavisanabhāvena kūṭe ninnā. Kūṭasamosaraṇāti kūṭe samosaritvā ṭhitā. Idhāpi kūṭaṃ viya aniccasaññā, gopānasiyo viya catubhūmakakusaladhammā, yathā sabbagopānasīnaṃ kūṭaṃ aggaṃ, evaṃ kusaladhammānaṃ aniccasaññā aggā. Nanu ca aniccasaññā lokiyā, sā lokiyakusalānaṃ tāva aggaṃ hotu, lokuttarānaṃ kathaṃ agganti? Tesampi paṭilābhakaraṇatthena agganti veditabbā. Iminā upāyena sabbāsu upamāsu opammasaṃsandanaṃ veditabbaṃ. Purimāhi panettha tīhi aniccasaññāya kiccaṃ, pacchimāhi balanti. Dasamaṃ.
ਪੁਪ੍ਫવਗ੍ਗੋ ਦਸਮੋ।
Pupphavaggo dasamo.
ਮਜ੍ਝਿਮਪਣ੍ਣਾਸਕੋ ਸਮਤ੍ਤੋ।
Majjhimapaṇṇāsako samatto.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੧੦. ਅਨਿਚ੍ਚਸਞ੍ਞਾਸੁਤ੍ਤਂ • 10. Aniccasaññāsuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੧੦. ਅਨਿਚ੍ਚਸਞ੍ਞਾਸੁਤ੍ਤવਣ੍ਣਨਾ • 10. Aniccasaññāsuttavaṇṇanā
