| Library / Tipiṭaka / តិបិដក • Tipiṭaka / វជិរពុទ្ធិ-ដីកា • Vajirabuddhi-ṭīkā |
៤. អនាទរិយសិក្ខាបទវណ្ណនា
4. Anādariyasikkhāpadavaṇṇanā
៣៤៤. ‘‘លោកវជ្ជំ អតិក្កមិត្វា ‘ឥទំ អម្ហាកំ អាចរិយុគ្គហោ’តិ វទន្តស្ស ន វដ្ដតី’’តិ លិខិតំ។ យំ សំកិលិដ្ឋេនេវ ចិត្តេន អាបជ្ជតិ, យំ វា អរិយបុគ្គលោ អបញ្ញត្តេ សិក្ខាបទេ អជ្ឈាចរតិ, ឥទំ លោកវជ្ជន្តិ សព្ពត្ថិកវាទីអាទីនិ អាចរិយកុលានិ។ តត្ថ ទុតិយតតិយវិកប្បោ ឥធ ន អធិប្បេតោ សេខិយានំ លោកវជ្ជត្តា។
344. ‘‘Lokavajjaṃ atikkamitvā ‘idaṃ amhākaṃ ācariyuggaho’ti vadantassa na vaṭṭatī’’ti likhitaṃ. Yaṃ saṃkiliṭṭheneva cittena āpajjati, yaṃ vā ariyapuggalo apaññatte sikkhāpade ajjhācarati, idaṃ lokavajjanti sabbatthikavādīādīni ācariyakulāni. Tattha dutiyatatiyavikappo idha na adhippeto sekhiyānaṃ lokavajjattā.
គារយ្ហោ អាចរិយុគ្គហោតិ ឯត្ថ ‘‘យស្មា ឧច្ឆុរសោ សត្តាហកាលិកោ, តស្ស កសដោ យាវជីវិកោ, ទ្វិន្នំយេវ សមវាយោ ឧច្ឆុយដ្ឋិ, តស្មា វិកាលេ ឧច្ឆុយដ្ឋិំ ខាទិតុំ វដ្ដតិ គុឡហរីដកំ វិយា’តិ ឯវមាទិកោ សម្បតិ និព្ពត្តោ គារយ្ហាចរិយវាទោ ន គហេតព្ពោ’’តិ ច, បណ្ណត្តិវជ្ជេ បន វដ្ដតីតិ ‘‘ន បត្តហត្ថេន កវាដោ បណាមេតព្ពោ’តិ ឥមស្ស ‘យេន ហត្ថេន បត្តោ គហិតោ, តេន ហត្ថេន ន បណាមេតព្ពោ, ឥតរេន បណាមេតព្ពោ’តិ អត្ថំ គហេត្វា តថា អាចរន្តោ ន អាបត្តិយា ការេតព្ពោ។ ‘តថា ពុទ្ធពោធិចេតិយានំ បុប្ផំ គណ្ហិតុំ វដ្ដតីតិ តថា អាចរន្តោ’’តិ ច។ តថា អាចរតិ អភយគិរិវាសិកោ។ មហាវិហារវាសិនោ ចេ ឯវំ វទន្តិ, ‘‘មា ឯវំ វទា’’តិ អបសាទេតព្ពោ។ តេន វុត្តំ ‘‘សុត្តំ សុត្តានុលោមញ្ច ឧគ្គហិតកានំយេវា’’តិអាទិ។ ‘‘ឥទំ សព្ពំ ឧបតិស្សត្ថេរោ អាហា’’តិ ច វុត្តំ។ ‘‘សុត្តានុលោមំ អដ្ឋកថា’’តិ លិខិតំ។
Gārayho ācariyuggahoti ettha ‘‘yasmā ucchuraso sattāhakāliko, tassa kasaṭo yāvajīviko, dvinnaṃyeva samavāyo ucchuyaṭṭhi, tasmā vikāle ucchuyaṭṭhiṃ khādituṃ vaṭṭati guḷaharīṭakaṃ viyā’ti evamādiko sampati nibbatto gārayhācariyavādo na gahetabbo’’ti ca, paṇṇattivajje pana vaṭṭatīti ‘‘na pattahatthena kavāṭo paṇāmetabbo’ti imassa ‘yena hatthena patto gahito, tena hatthena na paṇāmetabbo, itarena paṇāmetabbo’ti atthaṃ gahetvā tathā ācaranto na āpattiyā kāretabbo. ‘Tathā buddhabodhicetiyānaṃ pupphaṃ gaṇhituṃ vaṭṭatīti tathā ācaranto’’ti ca. Tathā ācarati abhayagirivāsiko. Mahāvihāravāsino ce evaṃ vadanti, ‘‘mā evaṃ vadā’’ti apasādetabbo. Tena vuttaṃ ‘‘suttaṃ suttānulomañca uggahitakānaṃyevā’’tiādi. ‘‘Idaṃ sabbaṃ upatissatthero āhā’’ti ca vuttaṃ. ‘‘Suttānulomaṃ aṭṭhakathā’’ti likhitaṃ.
អនាទរិយសិក្ខាបទវណ្ណនា និដ្ឋិតា។
Anādariyasikkhāpadavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៦. សុរាបានវគ្គោ • 6. Surāpānavaggo
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវិភង្គ-អដ្ឋកថា • Mahāvibhaṅga-aṭṭhakathā / ៤. អនាទរិយសិក្ខាបទវណ្ណនា • 4. Anādariyasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៤. អនាទរិយសិក្ខាបទវណ្ណនា • 4. Anādariyasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៤. អនាទរិយសិក្ខាបទវណ្ណនា • 4. Anādariyasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ៤. អនាទរិយសិក្ខាបទំ • 4. Anādariyasikkhāpadaṃ
