| Library / Tipiṭaka / তিপিটক • Tipiṭaka / ৰিমানৰত্থু-অট্ঠকথা • Vimānavatthu-aṭṭhakathā |
৮. অম্বৰিমানৰণ্ণনা
8. Ambavimānavaṇṇanā
দিব্বং তে অম্বৰনং রম্মন্তি অম্বৰিমানং। তস্স কা উপ্পত্তি? ভগৰা সাৰত্থিযং ৰিহরতি জেতৰনে। তেন সমযেন সাৰত্থিযং অঞ্ঞতরা উপাসিকা আৰাসদানস্স মহপ্ফলতং মহানিসংসতঞ্চ সুত্ৰা ছন্দজাতা ভগৰন্তং অভিৰাদেত্ৰা এৰমাহ ‘‘অহং, ভন্তে, একং আৰাসং কারেতুকামা, ইচ্ছামি তাদিসং ওকাসং, আচিক্খতূ’’তি। ভগৰা ভিক্খূ আণাপেসি, ভিক্খূ তস্সা ওকাসং দস্সেসুং। সা তত্থ রমণীযং আৰাসং কারেত্ৰা তস্স সমন্ততো অম্বরুক্খে রোপেসি। সো আৰাসো সমন্ততো অম্বপন্তীহি পরিক্খিত্তো ছাযূদকসম্পন্নো মুত্তাজালসদিসৰালুকাকিণ্ণপণ্ডরভূমিভাগো অতিৰিয মনোহরো অহোসি। সা তং ৰিহারং নানাৰণ্ণেহি ৰত্থেহি পুপ্ফদামগন্ধদামাদীহি চ দেৰৰিমানং ৰিয অলঙ্করিত্ৰা তেলপদীপং আরোপেত্ৰা অম্বরুক্খে চ অহতেহি ৰত্থেহি ৰেঠেত্ৰা সঙ্ঘস্স নিয্যাদেসি।
Dibbaṃte ambavanaṃ rammanti ambavimānaṃ. Tassa kā uppatti? Bhagavā sāvatthiyaṃ viharati jetavane. Tena samayena sāvatthiyaṃ aññatarā upāsikā āvāsadānassa mahapphalataṃ mahānisaṃsatañca sutvā chandajātā bhagavantaṃ abhivādetvā evamāha ‘‘ahaṃ, bhante, ekaṃ āvāsaṃ kāretukāmā, icchāmi tādisaṃ okāsaṃ, ācikkhatū’’ti. Bhagavā bhikkhū āṇāpesi, bhikkhū tassā okāsaṃ dassesuṃ. Sā tattha ramaṇīyaṃ āvāsaṃ kāretvā tassa samantato ambarukkhe ropesi. So āvāso samantato ambapantīhi parikkhitto chāyūdakasampanno muttājālasadisavālukākiṇṇapaṇḍarabhūmibhāgo ativiya manoharo ahosi. Sā taṃ vihāraṃ nānāvaṇṇehi vatthehi pupphadāmagandhadāmādīhi ca devavimānaṃ viya alaṅkaritvā telapadīpaṃ āropetvā ambarukkhe ca ahatehi vatthehi veṭhetvā saṅghassa niyyādesi.
সা অপরভাগে কালং কত্ৰা তাৰতিংসভৰনে নিব্বত্তি, তস্সা মহন্তং ৰিমানং পাতুরহোসি অম্বৰনপরিক্খিত্তং। সা তত্থ অচ্ছরাগণপরিৰারিতা দিব্বসম্পত্তিং অনুভৰতি। তং আযস্মা মহামোগ্গল্লানো উপগন্ত্ৰা ইমাহি গাথাহি পুচ্ছি –
Sā aparabhāge kālaṃ katvā tāvatiṃsabhavane nibbatti, tassā mahantaṃ vimānaṃ pāturahosi ambavanaparikkhittaṃ. Sā tattha accharāgaṇaparivāritā dibbasampattiṃ anubhavati. Taṃ āyasmā mahāmoggallāno upagantvā imāhi gāthāhi pucchi –
৭৮৩.
783.
‘‘দিব্বং তে অম্বৰনং রম্মং, পাসাদেত্থ মহল্লকো।
‘‘Dibbaṃ te ambavanaṃ rammaṃ, pāsādettha mahallako;
নানাতূরিযসঙ্ঘুট্ঠো, অচ্ছরাগণঘোসিতো॥
Nānātūriyasaṅghuṭṭho, accharāgaṇaghosito.
৭৮৪.
784.
‘‘পদীপো চেত্থ জলতি, নিচ্চং সোৰণ্ণযো মহা।
‘‘Padīpo cettha jalati, niccaṃ sovaṇṇayo mahā;
দুস্সফলেহি রুক্খেহি, সমন্তা পরিৰারিতো॥
Dussaphalehi rukkhehi, samantā parivārito.
৭৮৫. ‘‘কেন তেতাদিসো ৰণ্ণো…পে॰…ৰণ্ণো চ তে সব্বদিসা পভাসতী’’তি॥
785. ‘‘Kena tetādiso vaṇṇo…pe…vaṇṇo ca te sabbadisā pabhāsatī’’ti.
৭৮৭. ‘‘সা দেৰতা অত্তমনা…পে॰… যস্স কম্মস্সিদং ফলং’’॥
787. ‘‘Sā devatā attamanā…pe… yassa kammassidaṃ phalaṃ’’.
৭৮৮.
788.
‘‘অহং মনুস্সেসু মনুস্সভূতা, পুরিমায জাতিযা মনুস্সলোকে।
‘‘Ahaṃ manussesu manussabhūtā, purimāya jātiyā manussaloke;
ৰিহারং সঙ্ঘস্স কারেসিং, অম্বেহি পরিৰারিতং॥
Vihāraṃ saṅghassa kāresiṃ, ambehi parivāritaṃ.
৭৮৯.
789.
‘‘পরিযোসিতে ৰিহারে, কারেন্তে নিট্ঠিতে মহে।
‘‘Pariyosite vihāre, kārente niṭṭhite mahe;
অম্বেহি ছাদযিত্ৰান, কত্ৰা দুস্সমযে ফলে॥
Ambehi chādayitvāna, katvā dussamaye phale.
৭৯০.
790.
‘‘পদীপং তত্থ জালেত্ৰা, ভোজযিত্ৰা গণুত্তমং।
‘‘Padīpaṃ tattha jāletvā, bhojayitvā gaṇuttamaṃ;
নিয্যাদেসিং তং সঙ্ঘস্স, পসন্না সেহি পাণিভি॥
Niyyādesiṃ taṃ saṅghassa, pasannā sehi pāṇibhi.
৭৯১.
791.
‘‘তেন মে অম্বৰনং রম্মং, পাসাদেত্থ মহল্লকো।
‘‘Tena me ambavanaṃ rammaṃ, pāsādettha mahallako;
নানাতূরিযসঙ্ঘুট্ঠো, অচ্ছরাগণঘোসিতো॥
Nānātūriyasaṅghuṭṭho, accharāgaṇaghosito.
৭৯২.
792.
‘‘পদীপো চেত্থ জলতি, নিচ্চং সোৰণ্ণযো মহা।
‘‘Padīpo cettha jalati, niccaṃ sovaṇṇayo mahā;
দুস্সফলেহি রুক্খেহি, সমন্তা পরিৰারিতো॥
Dussaphalehi rukkhehi, samantā parivārito.
৭৯৩.
793.
‘‘তেন মেতাদিসো ৰণ্ণো…পে॰…ৰণ্ণো চ মে সব্বদিসা পভাসতী’’তি॥ –
‘‘Tena metādiso vaṇṇo…pe…vaṇṇo ca me sabbadisā pabhāsatī’’ti. –
সা দেৰতা ব্যাকাসি।
Sā devatā byākāsi.
৭৮৩. তত্থ মহল্লকোতি মহন্তো আযামৰিত্থারেহি উব্বেধেন চ ৰিপুলো, উল়ারতমোতি অত্থো। অচ্ছরাগণঘোসিতোতি তং পমোদিতুং সঙ্গীতিৰসেন চেৰ পিযসল্লাপৰসেন চ অচ্ছরাসঙ্ঘেন সমুগ্ঘোসিতো।
783. Tattha mahallakoti mahanto āyāmavitthārehi ubbedhena ca vipulo, uḷāratamoti attho. Accharāgaṇaghositoti taṃ pamodituṃ saṅgītivasena ceva piyasallāpavasena ca accharāsaṅghena samugghosito.
৭৮৪. পদীপো চেত্থ জলতীতি সূরিযরস্মিসমুজ্জলকিরণৰিতানো রতনপ্পদীপো চ এত্থ এতস্মিং পাসাদে অভিজলতি। দুস্সফলেহীতি দুস্সানি ফলানি এতেসন্তি দুস্সফলা। তেহি সমুগ্গিরিযমানদিব্বৰত্থেহীতি অত্থো।
784.Padīpo cettha jalatīti sūriyarasmisamujjalakiraṇavitāno ratanappadīpo ca ettha etasmiṃ pāsāde abhijalati. Dussaphalehīti dussāni phalāni etesanti dussaphalā. Tehi samuggiriyamānadibbavatthehīti attho.
৭৮৯. কারেন্তে নিট্ঠিতে মহেতি কতপরিযোসিতস্স ৰিহারস্স মহে পূজায করীযমানায চ। কত্ৰা দুস্সমযে ফলেতি দুস্সেযেৰ তেসং অম্বানং ফলং কত্ৰা।
789.Kārente niṭṭhite maheti katapariyositassa vihārassa mahe pūjāya karīyamānāya ca. Katvā dussamaye phaleti dusseyeva tesaṃ ambānaṃ phalaṃ katvā.
৭৯০. গণুত্তমন্তি গণানং উত্তমং ভগৰতো সাৰকসঙ্ঘং। নিয্যাদেসিন্তি সম্পটিচ্ছাপেসিং, অদাসিন্তি অত্থো। সেসং ৰুত্তনযমেৰ।
790.Gaṇuttamanti gaṇānaṃ uttamaṃ bhagavato sāvakasaṅghaṃ. Niyyādesinti sampaṭicchāpesiṃ, adāsinti attho. Sesaṃ vuttanayameva.
অম্বৰিমানৰণ্ণনা নিট্ঠিতা।
Ambavimānavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ৰিমানৰত্থুপাল়ি • Vimānavatthupāḷi / ৮. অম্বৰিমানৰত্থু • 8. Ambavimānavatthu
