| Library / Tipiṭaka / ತಿಪಿಟಕ • Tipiṭaka / ಸುತ್ತನಿಪಾತಪಾಳಿ • Suttanipātapāḷi |
೨. ಆಮಗನ್ಧಸುತ್ತಂ
2. Āmagandhasuttaṃ
೨೪೨.
242.
‘‘ಸಾಮಾಕಚಿಙ್ಗೂಲಕಚೀನಕಾನಿ ಚ, ಪತ್ತಪ್ಫಲಂ ಮೂಲಫಲಂ ಗವಿಪ್ಫಲಂ।
‘‘Sāmākaciṅgūlakacīnakāni ca, pattapphalaṃ mūlaphalaṃ gavipphalaṃ;
ಧಮ್ಮೇನ ಲದ್ಧಂ ಸತಮಸ್ನಮಾನಾ 1, ನ ಕಾಮಕಾಮಾ ಅಲಿಕಂ ಭಣನ್ತಿ॥
Dhammena laddhaṃ satamasnamānā 2, na kāmakāmā alikaṃ bhaṇanti.
೨೪೩.
243.
‘‘ಯದಸ್ನಮಾನೋ ಸುಕತಂ ಸುನಿಟ್ಠಿತಂ, ಪರೇಹಿ ದಿನ್ನಂ ಪಯತಂ ಪಣೀತಂ।
‘‘Yadasnamāno sukataṃ suniṭṭhitaṃ, parehi dinnaṃ payataṃ paṇītaṃ;
ಸಾಲೀನಮನ್ನಂ ಪರಿಭುಞ್ಜಮಾನೋ, ಸೋ ಭುಞ್ಜಸೀ ಕಸ್ಸಪ ಆಮಗನ್ಧಂ॥
Sālīnamannaṃ paribhuñjamāno, so bhuñjasī kassapa āmagandhaṃ.
೨೪೪.
244.
‘‘ನ ಆಮಗನ್ಧೋ ಮಮ ಕಪ್ಪತೀತಿ, ಇಚ್ಚೇವ ತ್ವಂ ಭಾಸಸಿ ಬ್ರಹ್ಮಬನ್ಧು।
‘‘Na āmagandho mama kappatīti, icceva tvaṃ bhāsasi brahmabandhu;
ಸಾಲೀನಮನ್ನಂ ಪರಿಭುಞ್ಜಮಾನೋ, ಸಕುನ್ತಮಂಸೇಹಿ ಸುಸಙ್ಖತೇಹಿ।
Sālīnamannaṃ paribhuñjamāno, sakuntamaṃsehi susaṅkhatehi;
ಪುಚ್ಛಾಮಿ ತಂ ಕಸ್ಸಪ ಏತಮತ್ಥಂ, ಕಥಂ ಪಕಾರೋ ತವ ಆಮಗನ್ಧೋ’’॥
Pucchāmi taṃ kassapa etamatthaṃ, kathaṃ pakāro tava āmagandho’’.
೨೪೫.
245.
‘‘ಪಾಣಾತಿಪಾತೋ ವಧಛೇದಬನ್ಧನಂ, ಥೇಯ್ಯಂ ಮುಸಾವಾದೋ ನಿಕತಿವಞ್ಚನಾನಿ ಚ।
‘‘Pāṇātipāto vadhachedabandhanaṃ, theyyaṃ musāvādo nikativañcanāni ca;
ಅಜ್ಝೇನಕುತ್ತಂ 3 ಪರದಾರಸೇವನಾ, ಏಸಾಮಗನ್ಧೋ ನ ಹಿ ಮಂಸಭೋಜನಂ॥
Ajjhenakuttaṃ 4 paradārasevanā, esāmagandho na hi maṃsabhojanaṃ.
೨೪೬.
246.
‘‘ಯೇ ಇಧ ಕಾಮೇಸು ಅಸಞ್ಞತಾ ಜನಾ, ರಸೇಸು ಗಿದ್ಧಾ ಅಸುಚಿಭಾವಮಸ್ಸಿತಾ 5।
‘‘Ye idha kāmesu asaññatā janā, rasesu giddhā asucibhāvamassitā 6;
ನತ್ಥಿಕದಿಟ್ಠೀ ವಿಸಮಾ ದುರನ್ನಯಾ, ಏಸಾಮಗನ್ಧೋ ನ ಹಿ ಮಂಸಭೋಜನಂ॥
Natthikadiṭṭhī visamā durannayā, esāmagandho na hi maṃsabhojanaṃ.
೨೪೭.
247.
‘‘ಯೇ ಲೂಖಸಾ ದಾರುಣಾ ಪಿಟ್ಠಿಮಂಸಿಕಾ 7, ಮಿತ್ತದ್ದುನೋ ನಿಕ್ಕರುಣಾತಿಮಾನಿನೋ।
‘‘Ye lūkhasā dāruṇā piṭṭhimaṃsikā 8, mittadduno nikkaruṇātimānino;
ಅದಾನಸೀಲಾ ನ ಚ ದೇನ್ತಿ ಕಸ್ಸಚಿ, ಏಸಾಮಗನ್ಧೋ ನ ಹಿ ಮಂಸಭೋಜನಂ॥
Adānasīlā na ca denti kassaci, esāmagandho na hi maṃsabhojanaṃ.
೨೪೮.
248.
‘‘ಕೋಧೋ ಮದೋ ಥಮ್ಭೋ ಪಚ್ಚುಪಟ್ಠಾಪನಾ 9, ಮಾಯಾ ಉಸೂಯಾ ಭಸ್ಸಸಮುಸ್ಸಯೋ ಚ।
‘‘Kodho mado thambho paccupaṭṭhāpanā 10, māyā usūyā bhassasamussayo ca;
ಮಾನಾತಿಮಾನೋ ಚ ಅಸಬ್ಭಿ ಸನ್ಥವೋ, ಏಸಾಮಗನ್ಧೋ ನ ಹಿ ಮಂಸಭೋಜನಂ॥
Mānātimāno ca asabbhi santhavo, esāmagandho na hi maṃsabhojanaṃ.
೨೪೯.
249.
‘‘ಯೇ ಪಾಪಸೀಲಾ ಇಣಘಾತಸೂಚಕಾ, ವೋಹಾರಕೂಟಾ ಇಧ ಪಾಟಿರೂಪಿಕಾ 11।
‘‘Ye pāpasīlā iṇaghātasūcakā, vohārakūṭā idha pāṭirūpikā 12;
ನರಾಧಮಾ ಯೇಧ ಕರೋನ್ತಿ ಕಿಬ್ಬಿಸಂ, ಏಸಾಮಗನ್ಧೋ ನ ಹಿ ಮಂಸಭೋಜನಂ॥
Narādhamā yedha karonti kibbisaṃ, esāmagandho na hi maṃsabhojanaṃ.
೨೫೦.
250.
‘‘ಯೇ ಇಧ ಪಾಣೇಸು ಅಸಞ್ಞತಾ ಜನಾ, ಪರೇಸಮಾದಾಯ ವಿಹೇಸಮುಯ್ಯುತಾ।
‘‘Ye idha pāṇesu asaññatā janā, paresamādāya vihesamuyyutā;
ದುಸ್ಸೀಲಲುದ್ದಾ ಫರುಸಾ ಅನಾದರಾ, ಏಸಾಮಗನ್ಧೋ ನ ಹಿ ಮಂಸಭೋಜನಂ॥
Dussīlaluddā pharusā anādarā, esāmagandho na hi maṃsabhojanaṃ.
೨೫೧.
251.
‘‘ಏತೇಸು ಗಿದ್ಧಾ ವಿರುದ್ಧಾತಿಪಾತಿನೋ, ನಿಚ್ಚುಯ್ಯುತಾ ಪೇಚ್ಚ ತಮಂ ವಜನ್ತಿ ಯೇ।
‘‘Etesu giddhā viruddhātipātino, niccuyyutā pecca tamaṃ vajanti ye;
ಪತನ್ತಿ ಸತ್ತಾ ನಿರಯಂ ಅವಂಸಿರಾ, ಏಸಾಮಗನ್ಧೋ ನ ಹಿ ಮಂಸಭೋಜನಂ॥
Patanti sattā nirayaṃ avaṃsirā, esāmagandho na hi maṃsabhojanaṃ.
೨೫೨.
252.
‘‘ನ ಮಚ್ಛಮಂಸಾನಮನಾಸಕತ್ತಂ 13, ನ ನಗ್ಗಿಯಂ ನ ಮುಣ್ಡಿಯಂ ಜಟಾಜಲ್ಲಂ।
‘‘Na macchamaṃsānamanāsakattaṃ 14, na naggiyaṃ na muṇḍiyaṃ jaṭājallaṃ;
ಖರಾಜಿನಾನಿ ನಾಗ್ಗಿಹುತ್ತಸ್ಸುಪಸೇವನಾ, ಯೇ ವಾಪಿ ಲೋಕೇ ಅಮರಾ ಬಹೂ ತಪಾ।
Kharājināni nāggihuttassupasevanā, ye vāpi loke amarā bahū tapā;
ಮನ್ತಾಹುತೀ ಯಞ್ಞಮುತೂಪಸೇವನಾ, ಸೋಧೇನ್ತಿ ಮಚ್ಚಂ ಅವಿತಿಣ್ಣಕಙ್ಖಂ॥
Mantāhutī yaññamutūpasevanā, sodhenti maccaṃ avitiṇṇakaṅkhaṃ.
೨೫೩.
253.
‘‘ಯೋ ತೇಸು 15 ಗುತ್ತೋ ವಿದಿತಿನ್ದ್ರಿಯೋ ಚರೇ, ಧಮ್ಮೇ ಠಿತೋ ಅಜ್ಜವಮದ್ದವೇ ರತೋ।
‘‘Yo tesu 16 gutto viditindriyo care, dhamme ṭhito ajjavamaddave rato;
ಸಙ್ಗಾತಿಗೋ ಸಬ್ಬದುಕ್ಖಪ್ಪಹೀನೋ, ನ ಲಿಪ್ಪತಿ 17 ದಿಟ್ಠಸುತೇಸು ಧೀರೋ’’॥
Saṅgātigo sabbadukkhappahīno, na lippati 18 diṭṭhasutesu dhīro’’.
೨೫೪.
254.
ಇಚ್ಚೇತಮತ್ಥಂ ಭಗವಾ ಪುನಪ್ಪುನಂ, ಅಕ್ಖಾಸಿ ನಂ 19 ವೇದಯಿ ಮನ್ತಪಾರಗೂ।
Iccetamatthaṃ bhagavā punappunaṃ, akkhāsi naṃ 20 vedayi mantapāragū;
ಚಿತ್ರಾಹಿ ಗಾಥಾಹಿ ಮುನೀ ಪಕಾಸಯಿ, ನಿರಾಮಗನ್ಧೋ ಅಸಿತೋ ದುರನ್ನಯೋ॥
Citrāhi gāthāhi munī pakāsayi, nirāmagandho asito durannayo.
೨೫೫.
255.
ಸುತ್ವಾನ ಬುದ್ಧಸ್ಸ ಸುಭಾಸಿತಂ ಪದಂ, ನಿರಾಮಗನ್ಧಂ ಸಬ್ಬದುಕ್ಖಪ್ಪನೂದನಂ।
Sutvāna buddhassa subhāsitaṃ padaṃ, nirāmagandhaṃ sabbadukkhappanūdanaṃ;
ನೀಚಮನೋ ವನ್ದಿ ತಥಾಗತಸ್ಸ, ತತ್ಥೇವ ಪಬ್ಬಜ್ಜಮರೋಚಯಿತ್ಥಾತಿ॥
Nīcamano vandi tathāgatassa, tattheva pabbajjamarocayitthāti.
ಆಮಗನ್ಧಸುತ್ತಂ ದುತಿಯಂ ನಿಟ್ಠಿತಂ।
Āmagandhasuttaṃ dutiyaṃ niṭṭhitaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಸುತ್ತನಿಪಾತ-ಅಟ್ಠಕಥಾ • Suttanipāta-aṭṭhakathā / ೨. ಆಮಗನ್ಧಸುತ್ತವಣ್ಣನಾ • 2. Āmagandhasuttavaṇṇanā
