| Library / Tipiṭaka / តិបិដក • Tipiṭaka / សុត្តនិបាតបាឡិ • Suttanipātapāḷi |
២. អាមគន្ធសុត្តំ
2. Āmagandhasuttaṃ
២៤២.
242.
‘‘សាមាកចិង្គូលកចីនកានិ ច, បត្តប្ផលំ មូលផលំ គវិប្ផលំ;
‘‘Sāmākaciṅgūlakacīnakāni ca, pattapphalaṃ mūlaphalaṃ gavipphalaṃ;
ធម្មេន លទ្ធំ សតមស្នមានា 1, ន កាមកាមា អលិកំ ភណន្តិ។
Dhammena laddhaṃ satamasnamānā 2, na kāmakāmā alikaṃ bhaṇanti.
២៤៣.
243.
‘‘យទស្នមានោ សុកតំ សុនិដ្ឋិតំ, បរេហិ ទិន្នំ បយតំ បណីតំ;
‘‘Yadasnamāno sukataṃ suniṭṭhitaṃ, parehi dinnaṃ payataṃ paṇītaṃ;
សាលីនមន្នំ បរិភុញ្ជមានោ, សោ ភុញ្ជសី កស្សប អាមគន្ធំ។
Sālīnamannaṃ paribhuñjamāno, so bhuñjasī kassapa āmagandhaṃ.
២៤៤.
244.
‘‘ន អាមគន្ធោ មម កប្បតីតិ, ឥច្ចេវ ត្វំ ភាសសិ ព្រហ្មពន្ធុ;
‘‘Na āmagandho mama kappatīti, icceva tvaṃ bhāsasi brahmabandhu;
សាលីនមន្នំ បរិភុញ្ជមានោ, សកុន្តមំសេហិ សុសង្ខតេហិ;
Sālīnamannaṃ paribhuñjamāno, sakuntamaṃsehi susaṅkhatehi;
បុច្ឆាមិ តំ កស្សប ឯតមត្ថំ, កថំ បការោ តវ អាមគន្ធោ’’។
Pucchāmi taṃ kassapa etamatthaṃ, kathaṃ pakāro tava āmagandho’’.
២៤៥.
245.
‘‘បាណាតិបាតោ វធឆេទពន្ធនំ, ថេយ្យំ មុសាវាទោ និកតិវញ្ចនានិ ច;
‘‘Pāṇātipāto vadhachedabandhanaṃ, theyyaṃ musāvādo nikativañcanāni ca;
អជ្ឈេនកុត្តំ 3 បរទារសេវនា, ឯសាមគន្ធោ ន ហិ មំសភោជនំ។
Ajjhenakuttaṃ 4 paradārasevanā, esāmagandho na hi maṃsabhojanaṃ.
២៤៦.
246.
‘‘យេ ឥធ កាមេសុ អសញ្ញតា ជនា, រសេសុ គិទ្ធា អសុចិភាវមស្សិតា 5;
‘‘Ye idha kāmesu asaññatā janā, rasesu giddhā asucibhāvamassitā 6;
នត្ថិកទិដ្ឋី វិសមា ទុរន្នយា, ឯសាមគន្ធោ ន ហិ មំសភោជនំ។
Natthikadiṭṭhī visamā durannayā, esāmagandho na hi maṃsabhojanaṃ.
២៤៧.
247.
‘‘យេ លូខសា ទារុណា បិដ្ឋិមំសិកា 7, មិត្តទ្ទុនោ និក្ករុណាតិមានិនោ;
‘‘Ye lūkhasā dāruṇā piṭṭhimaṃsikā 8, mittadduno nikkaruṇātimānino;
អទានសីលា ន ច ទេន្តិ កស្សចិ, ឯសាមគន្ធោ ន ហិ មំសភោជនំ។
Adānasīlā na ca denti kassaci, esāmagandho na hi maṃsabhojanaṃ.
២៤៨.
248.
‘‘កោធោ មទោ ថម្ភោ បច្ចុបដ្ឋាបនា 9, មាយា ឧសូយា ភស្សសមុស្សយោ ច;
‘‘Kodho mado thambho paccupaṭṭhāpanā 10, māyā usūyā bhassasamussayo ca;
មានាតិមានោ ច អសព្ភិ សន្ថវោ, ឯសាមគន្ធោ ន ហិ មំសភោជនំ។
Mānātimāno ca asabbhi santhavo, esāmagandho na hi maṃsabhojanaṃ.
២៤៩.
249.
‘‘យេ បាបសីលា ឥណឃាតសូចកា, វោហារកូដា ឥធ បាដិរូបិកា 11;
‘‘Ye pāpasīlā iṇaghātasūcakā, vohārakūṭā idha pāṭirūpikā 12;
នរាធមា យេធ ករោន្តិ កិព្ពិសំ, ឯសាមគន្ធោ ន ហិ មំសភោជនំ។
Narādhamā yedha karonti kibbisaṃ, esāmagandho na hi maṃsabhojanaṃ.
២៥០.
250.
‘‘យេ ឥធ បាណេសុ អសញ្ញតា ជនា, បរេសមាទាយ វិហេសមុយ្យុតា;
‘‘Ye idha pāṇesu asaññatā janā, paresamādāya vihesamuyyutā;
ទុស្សីលលុទ្ទា ផរុសា អនាទរា, ឯសាមគន្ធោ ន ហិ មំសភោជនំ។
Dussīlaluddā pharusā anādarā, esāmagandho na hi maṃsabhojanaṃ.
២៥១.
251.
‘‘ឯតេសុ គិទ្ធា វិរុទ្ធាតិបាតិនោ, និច្ចុយ្យុតា បេច្ច តមំ វជន្តិ យេ;
‘‘Etesu giddhā viruddhātipātino, niccuyyutā pecca tamaṃ vajanti ye;
បតន្តិ សត្តា និរយំ អវំសិរា, ឯសាមគន្ធោ ន ហិ មំសភោជនំ។
Patanti sattā nirayaṃ avaṃsirā, esāmagandho na hi maṃsabhojanaṃ.
២៥២.
252.
‘‘ន មច្ឆមំសានមនាសកត្តំ 13, ន នគ្គិយំ ន មុណ្ឌិយំ ជដាជល្លំ;
‘‘Na macchamaṃsānamanāsakattaṃ 14, na naggiyaṃ na muṇḍiyaṃ jaṭājallaṃ;
ខរាជិនានិ នាគ្គិហុត្តស្សុបសេវនា, យេ វាបិ លោកេ អមរា ពហូ តបា;
Kharājināni nāggihuttassupasevanā, ye vāpi loke amarā bahū tapā;
មន្តាហុតី យញ្ញមុតូបសេវនា, សោធេន្តិ មច្ចំ អវិតិណ្ណកង្ខំ។
Mantāhutī yaññamutūpasevanā, sodhenti maccaṃ avitiṇṇakaṅkhaṃ.
២៥៣.
253.
‘‘យោ តេសុ 15 គុត្តោ វិទិតិន្ទ្រិយោ ចរេ, ធម្មេ ឋិតោ អជ្ជវមទ្ទវេ រតោ;
‘‘Yo tesu 16 gutto viditindriyo care, dhamme ṭhito ajjavamaddave rato;
សង្គាតិគោ សព្ពទុក្ខប្បហីនោ, ន លិប្បតិ 17 ទិដ្ឋសុតេសុ ធីរោ’’។
Saṅgātigo sabbadukkhappahīno, na lippati 18 diṭṭhasutesu dhīro’’.
២៥៤.
254.
ឥច្ចេតមត្ថំ ភគវា បុនប្បុនំ, អក្ខាសិ នំ 19 វេទយិ មន្តបារគូ;
Iccetamatthaṃ bhagavā punappunaṃ, akkhāsi naṃ 20 vedayi mantapāragū;
ចិត្រាហិ គាថាហិ មុនី បកាសយិ, និរាមគន្ធោ អសិតោ ទុរន្នយោ។
Citrāhi gāthāhi munī pakāsayi, nirāmagandho asito durannayo.
២៥៥.
255.
សុត្វាន ពុទ្ធស្ស សុភាសិតំ បទំ, និរាមគន្ធំ សព្ពទុក្ខប្បនូទនំ;
Sutvāna buddhassa subhāsitaṃ padaṃ, nirāmagandhaṃ sabbadukkhappanūdanaṃ;
នីចមនោ វន្ទិ តថាគតស្ស, តត្ថេវ បព្ពជ្ជមរោចយិត្ថាតិ។
Nīcamano vandi tathāgatassa, tattheva pabbajjamarocayitthāti.
អាមគន្ធសុត្តំ ទុតិយំ និដ្ឋិតំ។
Āmagandhasuttaṃ dutiyaṃ niṭṭhitaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / សុត្តនិបាត-អដ្ឋកថា • Suttanipāta-aṭṭhakathā / ២. អាមគន្ធសុត្តវណ្ណនា • 2. Āmagandhasuttavaṇṇanā
